سۋرەتتى تۇسىرگەن – جۇماباي مۇسابەك
ادام بالاسىنىڭ رۋحاني الەمى جاڭبىر تىلەگەن كوكتەمگى اسپانداي كەيدە مۇلگىپ, شولدەپ تۇراتىنى راس. سونداي ساتتەردە جانعا شيپا, جۇرەككە مەدەت بولار جالعىز عانا مەكەن بار – ول تەاتر. سەبەبى تەاتر – ءتىرى ونەر. ول – ادامنىڭ ىشكى الەمىن سوزبەن دە, سەزىممەن دە تەربەتەتىن شىندىقتىڭ ساحناسى, ءومىردىڭ بوياۋىن بوياماسىز بەرەتىن ايناسى. وسى كيەلى ونەردىڭ تاربيەلىك قۋاتىن جاس ۇرپاقتىڭ بويىنا ءسىڭىرۋ ماقساتىندا جەتىسۋ ولكەسىندە تۇڭعىش رەت مەكتەپىشىلىك تەاترلار اراسىندا بايقاۋ ۇيىمداستىرىلىپ, ءۇش كۇن بويى تالدىقورعان قالاسى ونەر مەن شابىتتىڭ ورداسىنا اينالدى. بۇل بايقاۋ – ونەر ارقىلى تاربيە بەرۋدىڭ, جاس سانانى وياتۋدىڭ, رۋحاني قۇندىلىقتاردى دارىتۋدىڭ وزىق ۇلگىسى.
وبلىستىڭ تۇكپىر-تۇكپىرىنەن كەلگەن 50 مەكتەپتىڭ تەاتر ۇجىمى ءوزارا سايىسقا ءتۇسىپ, وزەكتىلىگى جوعارى بەس تاقىرىپ اياسىندا قويىلىم ۇسىندى. «ناشاقورلىق», «جاسوسپىرىمدەر بۋللينگى», «ۇستازىن ۇلىقتاعان ۇرپاق ءۇنى», «اتا-انا, وقۋشى, ۇستاز», «مەنىڭ ارمانىم» سىندى تاقىرىپتاردا ساحناعا شىققان جاس اكتەرلەر كورەرمەنگە تەرەڭ وي تاستاي الدى. ونەرپاز ورەندەر ساحنا ءتىلى مەن اكتەرلىك شەبەرلىكتى كاسىبي دەڭگەيدە يگەرگەنىن كورسەتتى. بايقاۋدىڭ قازىلار القاسى قۇرامىندا قازاقستاننىڭ ەڭبەك سىڭىرگەن قايراتكەرى كەندەباي تەمىرباي ۇلى مەن حالىق ءارتىسى الماحان كەنجەبەكوۆا سىندى تەاتر تارلاندارى بولدى.
«وقۋشىلار تەاترى – جاي ساحنا ەمەس, ول – بالانىڭ ىشكى جان دۇنيەسىن تۇلەتەتىن, قيالىنا قانات بىتىرەتىن, جۇرەگىندەگى شىراقتى مازداتاتىن ەرەكشە الاڭ. مۇندا بالا تەك ءرول ويناپ قويمايدى, ءومىردى ءتۇسىنىپ, ءوزىن تانۋعا, ادام بولمىسىنا ۇڭىلۋگە ماشىقتانادى. بۇل – تاربيەنىڭ ەڭ نازىك, ەڭ اسەرلى ءتۇرى», دەدى ا.كەنجەبەكوۆا.
بايقاۋعا قاتىسۋشىلار كوركەمدىك, تەحنيكالىق تۇرعىدان دا دايارلىقپەن كەلگەن. «تەاتر Time» ۇيىرمەسىنىڭ جەتەكشىسى جانار بەيسەنباەۆانىڭ ايتۋىنشا, بۇل بايقاۋعا وقۋشىلار 2 اي كولەمىندە دايىندالعان.
«ستسەناري – مەنىڭ ۇستاز رەتىندەگى ىشكى تولعانىسىمنان تۋعان دۇنيە. وقۋشىم قۋانىشپەن بىرگە زاماناۋي ۇستاز بەينەسىن جاساۋعا تىرىستىق. قويىلىمدا تەك اكتەرلەر ەمەس, كوستيۋمەر, گريمەر, موبيلوگراف سىندى شىعارماشىلىق توپ تا ەڭبەك ەتتى. بۇل – بارلىعىمىزدىڭ ورتاق جەڭىسىمىز», دەيدى ول.
كەيىپكەرلەر ارقىلى ساحنا تورىندە وتباسى قۇندىلىعى, دوستىقتىڭ ءمانى, ۇستازعا دەگەن قۇرمەت پەن وتانسۇيگىشتىك رۋح كوركەم تىلمەن جەتكىزىلدى. وقۋشىلار جاي عانا كورىنىس كورسەتىپ قويعان جوق, ولار ءوز ويلارىن, ازاماتتىق ۇستانىمدارىن اشىق ايتىپ, ساحنا ارقىلى قوعاممەن سۇحبات قۇردى.
فەستيۆالدىڭ سوڭعى كۇنىندە وتكەن سالتاناتتى ماراپاتتاۋ كەشى ناعىز ونەر مەرەكەسىنە اينالدى. كورەرمەن زالىن تولتىرعان اتا-انالار, ۇستازدار مەن قوناقتار جاس ساحناگەرلەردىڭ شەبەرلىگىنە ءتانتى بولدى. كەشكە وبلىس اكىمىنىڭ ورىنباسارى مارلەن كولباەۆ ارنايى قاتىسىپ, قاتىسۋشىلارعا جۇرەكجاردى لەبىزىن ءبىلدىردى.
«تەاتر – ۇلت رۋحىنىڭ ايناسى, رۋحاني جاڭعىرۋدىڭ نەگىزگى دىڭگەگى. وسىنداي باستامالار – جاس بۋىننىڭ بولاشاقتا سانالى ازامات بولىپ قالىپتاسۋىنا ۇلكەن سەرپىن بەرەدى. بۇل بايقاۋ تەك ونەر سايىسى ەمەس, جاس بۋىندى تاربيەلەۋدىڭ, ولاردىڭ وي-ساناسىن وياتۋدىڭ ۇلكەن قۇرالىنا اينالدى. ءار قويىلىمدا بۇگىنگى قوعامنىڭ كۇردەلى ماسەلەلەرى – جاسوسپىرىمدەردىڭ ىشكى كۇيزەلىسى, وتباسى مەن مەكتەپ اراسىنداعى بايلانىس, ۇستازعا قۇرمەت, ۇلتتىق ارمان مەن بولاشاققا سەنىم تەرەڭ بەينەلەندى», دەدى م.كولباەۆ.
ونىڭ ايتۋىنشا, جاستاردى رۋحاني قولداۋعا باعىتتالعان جوبالار جالعاسادى. كەلەر جىلى بۇل بايقاۋدىڭ اۋقىمى كەڭەيىپ, ءداستۇرلى شاراعا اينالادى. بايقاۋ بارىسىندا ۇزدىك شىققان وقۋشىلار مەن تەاتر ۇجىمدارى قارجىلاي سىيلىقتارعا يە بولدى. ءتىپتى «ۇزدىك جاس اكتريسا» «ۇزدىك جاس اكتەر», «ۇزدىك ساحنالىق كوستيۋم», «ۇزدىك جاس رەجيسسەر», «ۇزدىك دەكوراتسيا» سەكىلدى اتالىم يەگەرلەرىنە دە اقشالاي سەرتيفيكات تابىستالدى.
تەاتر ارقىلى بالا ءوز بولمىسىن تانيدى, ءومىردى باعالاۋدى ۇيرەنەدى. جەتىسۋ جەرىندەگى بۇل يگى باستاما الداعى ۋاقىتتا ەلىمىزدىڭ وزگە وڭىرلەرىنە دە ۇلگى بولىپ, ۇلتتىق ونەردىڭ جاڭا كوكجيەگىن اشادى دەگەن سەنىم مول. ساحنا – شىندىقتىڭ ايناسى. سول ايناعا قاراپ وسكەن ۇرپاق ەرتەڭگى ەلدىڭ ەڭسەسىن كوتەرەر ازاماتتارى بولماق. وقۋشىلاردىڭ تەاترعا دەگەن قىزىعۋشىلىعى مەن بەلسەندىلىگى بايقاۋدىڭ تابىستى وتكەنىن دالەلدەدى.
جەتىسۋ وبلىسى
