فوتو: kbtu.edu.kz
دەپۋتاتتىڭ ايتۋىنشا, ءبىر جىلدىڭ ىشىندە ەلىمىزدە كوشى-قون زاڭناماسىن 106 مىڭنان استام شەتەلدىك بۇزعان. ال شەتەلدىك «ەكسكۋرسوۆودتاردىڭ» باقىلاۋسىز كەلۋى — جۇيەلى پروبلەماعا اينالعان.
«تۋريستەردى تۋرا اۋەجايدا قارسى الىپ, قوناق ۇيلەردەن الىپ كەتىپ, قازاقستان نارىعى مەن سالىق جۇيەسىن اينالىپ وتەدى» دەدى سمولياكوۆا.
الماتى قالاسىنداعى جاعدايعا ەرەكشە الاڭداۋشىلىق بىلدىرگەن دەپۋتات جاقىندا الماتى قالاسىندا وتكەن دوڭگەلەك ۇستەلدە تۋريزم سالاسىنىڭ وكىلدەرى كوتەرگەن ماسەلەگە توقتالىپ, ءۇندىستان مەن پاكىستاننان كەلگەن ستۋدەنتتەر ەلىمىزدە زاڭسىز گيد بولىپ جۇمىس ىستەيتىنىن, ولاردىڭ ۇسىنىستارى كوبىنە مادەني ەمەس باعىتتا ءوربىپ جاتقانىن ايتتى.
«شەتەلدىك گيدتەر قازاقستاننىڭ تاريحىن دا, ءداستۇرىن دە بىلمەيدى. بىراق تۋريستەرگە سىبايلاس جەمقورلىق, قىلمىس پەن ساياسات تۋرالى اقپارات بەرۋگە دايىن. بۇل – جاي عانا كولەڭكەلى بيزنەس ەمەس, بۇل – اقپاراتتىق قاۋىپ» دەدى دەپۋتات.
سمولياكوۆا دەمالىس كۇندەرى تۋريستىك باقىلاۋدىڭ جوقتىعىنا دا توقتالدى. ونىڭ ايتۋىنشا, تۋريستىك جانە كولىك پوليتسياسى كەي جەرلەردە مۇلدە جوق نەمەسە تەك جۇمىس كۇندەرى عانا قىزمەت اتقارادى. ونىڭ ايتۋىنشا, دەمالىس كۇندەرى, تۋريست كوپ كەلەتىن كەزدە, باقىلاۋ اتىمەن جوق. بۇل – جول بەرۋگە بولمايدى.
ماسەلەنى شەشۋ ءۇشىن دەپۋتات مىنا ماسەلەگە, ياعني بارلىق گيدتەرگە مىندەتتى سەرتيفيكاتتاۋ ەنگىزۋ; ەلگە كىرۋدى باقىلاۋ ءۇشىن بيومەتريالىق جۇيەلەردى قولدانۋ;تۋريستىك ايماقتاردى سەنىمدى باسقارۋعا جەكە ينۆەستورلارعا بەرۋ;شەتەلدىك ازاماتتار ءۇشىن ۆاليۋتالىق شەكتەۋدى الىپ تاستاۋ; e-Qonaq جۇيەسىنە باقىلاۋدى كۇشەيتۋ; دامحانالارداعى سانيتارلىق تالاپتار مەن تاۋداعى قاۋىپسىزدىكتى قامتاماسىز ەتۋگە نازار اۋدارۋ قاجەتتىگىن العا تارتتى.
ەگەر دە وسىعان نازار اۋدارىپ, سالادا ءتارتىپ ورناتا الساق, وندا ءتۋريزمنىڭ ءجىو-دەگى ۇلەسىن 3–4 پايىزعا جەتكىزۋگە بولادى.
