قانجاردىڭ سابى ءمۇيىز, جەتەسىن قورعاسىن قۇيىپ شەگەندەگەن. تەگى بۇل بەرتىندە جاسالعان رەستاۆراتورلار جۇمىسى بولسا كەرەك. قانجاردىڭ قىر ارقاسىنان باستاپ, جەتەسىنەن سوزىلعان قوس ويما قوبى سىزىعى بار. ۇش جاعى كادىمگى پىشاق سياقتى قايقى. قانجار-ەكسپوناتتىڭ قۇجاتىندا: جالپى ۇزىندىعى – 34,4 سم, سابى – 11 سم, سالماعى 0,8 كيلو دەلىنىپتى جانە بۇل بۇيىمدى مۋزەي قورىنا وتكىزگەن ادام رەتىندە تانىمال سۋرەتشى ساحي رومانوۆ ەسىمى تىركەلگەن.
اتالعان جادىگەر تۋرالى قابانبايتانۋشى جانە ەلوردا ماڭىنداعى باتىر زيراتىنىڭ شىراقشىسى كامال ءابدىراحمان اعامىزدان سۇراپ كوردىك.
«بۇل «قانجار» ەمەس, ساپى, – دەيدى كامال اعا. – جادىگەردى 1980 جىلى بەلگىلى مەملەكەت قايراتكەرى وزبەكالى جانىبەكوۆ مۋزەيگە وتكىزگەن. مەن بۇل تۋرالى وزاعاڭنىڭ وزىنەن سۇراپ, تولىق مالىمەت العانمىن. ول كىسىدەن «اعا, تۇركىستانداعى باتىر اتامىزدىڭ ساپىسىن مۋزەيگە ءسىز تاپسىرعان ەكەنسىز, ول بۇيىم قولىڭىزعا قالاي تۇسكەنىن ايتىپ بەرمەيسىز بە؟» دەدىم. سونداعى وزاعانىڭ بەرگەن جاۋابى: «1723 جىلى ءابىلمانسۇردىڭ اتاسى قانىشەر ابىلاي تۇركىستاندى جاۋعا تاستاپ قاشىپ كەتكەن تۇستا, قابانباي باتىر ۇرانداپ ءجۇرىپ بىتىراعان حالىقتى جيناپ, جاۋعا قارسى تۇرادى. باتىردىڭ جانقيارلىعىنا ريزا بولعان حالىق باسشىسىز قالعان ەلگە قابانبايدى حان كوتەرىپتى. قاباكەڭنىڭ «حان باتىر» اتانعان سەبەبى سول. وسى ءراسىم كەزىندەگى «حان تالاپايدا» قابەكەڭنىڭ ساپىسى ءبىزدىڭ اتالارىمىزدىڭ قولىنا ءتۇسىپتى. ۇرپاقتان-ۇرپاققا جالعاسىپ ماعان جەتتى. مەن ونى مۋزەيگە وتكىزدىم. بار-جوعى وسى», دەپتى.
