فوتو: اقوردا
پرەزيدەنت بۇل رەفورمانىڭ وزەگى – حالىقپەن ءتيىمدى بايلانىس ورناتۋ ەكەنىن ايتتى.
ء«تورتىنشى. قۇقىق قورعاۋ ورگاندارىنىڭ جۇمىسىنا سەرۆيستىك مودەل قاعيداتتارىن كەڭىنەن ەنگىزىپ, كادرلىق الەۋەتىن كۇشەيتۋ قاجەت. پوليتسيا مەن باسقا دا قۇرىلىمدار بيلىك جانە قوعام اراسىن بايلانىستىراتىن التىن كوپىر بولۋعا ءتيىس. ول ءۇشىن «مەملەكەت پەن ازامات – ءبىرتۇتاس» دەگەن ىرگەلى قاعيداتىمىزعا تولىق ساي كەلەتىن حالىقپەن قارىم-قاتىناستىڭ جاڭا مادەنيەتىن قالىپتاستىرۋ كەرەك. بۇل باعىتتا ىلگەرىلەۋ بار. بىراق قابىلدانعان شارالار ءالى تيىمدىلىگىن كورسەتپەدى, ويتكەنى بىرىزدىلىك جوق. حالىقپەن تىكەلەي جۇمىس ىستەۋگە كەدەرگى كەلتىرەتىن باسى ارتىق بيۋروكراتيادان ارىلۋ كەرەك. رەفورمالاردىڭ شىنايىلىعىنا, ادىلدىككە جانە مەملەكەتتىك باسقارۋ جۇيەسىنىڭ تيىمدىلىگىنە ازاماتتاردىڭ سەنىمى كوبىنە قۇقىق قورعاۋ ورگاندارىنىڭ كاسىبي دەڭگەيىنە بايلانىستى», دەدى قاسىم-جومارت توقاەۆ.
پرەزيدەنت ۋچاسكەلىك ينسپەكتورلاردىڭ ءرولىن كۇشەيتۋدىڭ ماڭىزىن ەرەكشە اتاپ ءوتتى. اسىرەسە, اۋىلدىق جەرلەردە ولاردىڭ اتقاراتىن قىزمەتى – تەك قۇقىق قورعاۋ ەمەس, ازاماتتارعا قولداۋ كورسەتۋ, كەڭەس بەرۋ جانە ادىلەت ورناتۋ ەكەنىنە نازار اۋداردى.
«ۋچاسكەلىك ينسپەكتورلاردىڭ الەۋەتىن ودان ءارى نىعايتۋ قاجەت. سەبەبى ولار ءىس جۇزىندە مەملەكەت مەن قوعام اراسىنداعى باستى دانەكەر سانالادى. اسىرەسە, بۇل اۋىلدىق جەردە انىق بايقالادى. ويتكەنى جەرگىلىكتى تۇرعىندار ءۇشىن ۋچاسكەلىك ينسپەكتور – قورعاۋشى, قۇقىقتىق كەڭەسشى, ءتىپتى, ادىلدىك سۇراپ جۇگىنەتىن سوڭعى ينستانتسيا. مەنىڭ ويىمشا, اۋىلداعى ۋچاسكەلىك ينسپەكتورلارعا شەن بەرگەن كەزدە جەڭىلدىك جاساپ, ياعني ءبىر جىلدىق ەڭبەك ءوتىلىن 1,5 جىل دەپ ەسەپتەۋ قاجەت. اۋىلداعى ۋچاسكەلىك ينسپەكتورلاردى باسپانامەن قامتىپ, ماتەريالدىق-تەحنيكالىق بازاسىن نىعايتۋ كەرەك. ءوڭىر اكىمدەرى وسى ماسەلەگە مۇقيات نازار اۋدارعانى دۇرىس. ۋچاسكەلىك پوليتسيانى جاڭعىرتۋمەن قاتار پاترۋلدىك بەكەتتەر قىزمەتىنىڭ جۇمىسىن قايتا قاراۋ قاجەت. پاترۋل قىزمەتكەرلەرى ازاماتتارمەن جۇمىس بارىسىندا ادەپ ساقتاپ, كاسىبيلىك تانىتقانى ءجون. ءوز كەزەگىندە ازاماتتار دا پوليتسيانىڭ زاڭدى تالابىنا باعىنۋعا مىندەتتى. ايتپەسە كوشەدە ءتارتىپ بولمايدى», دەدى مەملەكەت باسشىسى.
مەملەكەت باسشىسى رەفورمالار تەك وزگەرىس ءۇشىن ەمەس, قوعامنىڭ قۇقىق قورعاۋ ورگاندارىنا دەگەن سەنىمىن ارتتىرۋ ءۇشىن جۇرگىزىلۋى ءتيىس ەكەنىن مالىمدەدى. ءاربىر قۇقىق قورعاۋ قىزمەتكەرىنىڭ ادىلەتتىلىگى مەن ادالدىعى – تۇتاس جۇيەنىڭ بەدەلىن قالىپتاستىرادى.
«جالپى ازاماتتاردىڭ قاۋىپسىزدىگى مەن زاڭ تالاپتارىن مۇلتىكسىز ساقتاۋ ءۇشىن قۇقىق قورعاۋ جۇيەسىن ودان ءارى رەفورمالاۋ كەرەك. بىراق رەفورمالار رەفورما ءۇشىن عانا جاسالمايدى. باستى ماقسات – قوعامنىڭ قۇقىق قورعاۋ جۇيەسىنە سەنىمىن ارتتىرۋ. كەيبىر قىزمەتكەرلەردىڭ ادىلەتسىز نەمەسە نەمقۇرايدى ارەكەتى كۇشتىك قۇرىلىم وكىلدەرىنىڭ اتىنا كىر كەلتىرەدى. ازاماتتار مەن بيزنەستەن زاڭدى تالاپ ەتكەندە, وزدەرىڭىز لايىقتى ۇلگى كورسەتۋلەرىڭىز قاجەت. سوندا عانا پوليتسيا قىزمەتكەرلەرى مەن ازاماتتار اراسىندا سەنىمدى ارىپتەستىك ورنايدى. قۇقىق قورعاۋ ورگاندارىنىڭ قىزمەتىن جەتىلدىرۋ قانشالىقتى تابىستى بولاتىنى سىزدەرگە بايلانىستى», دەدى پرەزيدەنت.
قۇقىق قورعاۋ ورگاندارىنىڭ قىزمەتىن لايىقتى باعالاۋ ماقساتىندا بيىلدان باستاپ ەڭبەكاقى تولەۋدىڭ جاڭا جۇيەسى ەنگىزىلدى. بۇل, اسىرەسە, اۋداندىق دەڭگەيدەگى قىزمەتكەرلەر ءۇشىن ۇلكەن قولداۋ بولدى. ماسەلەن, ءۇش جىل تاجىريبەسى بار پوليتسيا جەدەل ۋاكىلىنىڭ جالاقىسى 60 پايىزعا وسكەن.
سونىمەن قاتار, ۆەدومستۆولىق اكادەميا تۇلەكتەرىنە قولداۋ كورسەتۋ تەتىكتەرى دە قايتا قارالماق.
«بۇل رەتتە مەملەكەت قوعام قاۋىپسىزدىگى مەن ەلدەگى زاڭ ۇستەمدىگىن قامتاماسىز ەتەتىن جانداردى جان-جاقتى قولداۋعا ارقاشان ايرىقشا ءمان بەرەدى. مەنىڭ تاپسىرماممەن بيىلدان باستاپ كۇشتىك قۇرىلىمدار ەڭبەكاقى تولەۋدىڭ جاڭا جۇيەسىنە كوشتى. بۇل ءتاسىل, ەڭ الدىمەن, اۋدان دەڭگەيىندەگى قىزمەتكەرلەردىڭ جالاقىسىن كوتەرۋگە مۇمكىندىك بەردى. ماسەلەن, ءۇش جىلدىق تاجىريبەسى بار پوليتسيا جەدەل ۋاكىلىنىڭ ەڭبەكاقىسى 60 پايىزعا ءوستى. ءبىز ءتارتىپ ساقشىلارىن قۇقىقتىق جانە الەۋمەتتىك تۇرعىدان قورعاۋ ءۇشىن كەشەندى شارالار قابىلدايمىز. ۆەدومستۆولىق جوعارى وقۋ ورىندارى كۋرسانتتارىنا جاعداي جاساپ, ىنتالاندىرۋ ماڭىزدى. ولار – ءبىزدىڭ كۇشتىك قۇرىلىمداردىڭ بولاشاعى. وقۋدا ۇزدىك ناتيجە كورسەتكەن جانە ۇلگىلى تارتىبىمەن ەرەكشەلەنگەن اكادەميا تۇلەكتەرىنە بىردەن «اعا لەيتەنانت» شەنىن بەرۋ قاجەت دەپ سانايمىن. سونداي-اق ولارعا بوس جۇمىس ورىندارىنان ءوزى قالاعان قىزمەت ءتۇرىن تاڭداۋىنا مۇمكىندىك بەرىلۋى كەرەك. ۇكىمەت زاڭعا ەنگىزىلەتىن وزگەرىستەردى ازىرلەسىن», دەدى قاسىم-جومارت توقاەۆ.
