تاياۋدا ىسكە قوسىلاتىن جاڭا ءوندىرىس قاپتاما ونىمدەرىنىڭ وزىندىك قۇنىن تومەندەتۋگە, جۇزدەگەن جاڭا جۇمىس ورنىن اشۋعا جانە وتاندىق شيكىزات بازاسىن دامىتۋعا مۇمكىندىك بەرەدى.
«گوفروتارا» جشس ديرەكتورى گۇلنار قايداروۆانىڭ ايتۋىنشا, كومپانيا وندىرىستىك قۋاتىن تۇراقتاندىرۋ ماقساتىندا ماكۋلاتۋرانى ءوزى وڭدەۋگە بەل بۋعان.
– يمپورتتىق شيكىزات باعاسى قۇبىلعان سايىن ءونىمنىڭ وزىندىك قۇنى دا وسەدى. ال جاڭا زاۋىت شيكىزاتتى ءوزىمىز وندىرۋگە جول اشادى. بۇل – ستراتەگيالىق شەشىم. ونى جەرگىلىكتى بيلىك تە قولداپ وتىر, – دەدى ول.
جوبا ارنايى ەكونوميكالىق ايماقتا جۇزەگە اسىرىلىپ جاتىر. ول «دامۋ-ءوندىرىس» وڭدەۋشى ونەركاسىپتى قولداۋ باعدارلاماسى جانە «بيزنەستىڭ جول كارتاسى – 2025» مەملەكەتتىك باعدارلاماسى اياسىندا قارجىلاندىرىلۋدا.
كومپانيا وكىلدەرى جوبانى دايىنداۋ كەزىندە قىتاي مەن تۇركياداعى وزىق تاجىريبەنى زەرتتەگەن. بۇل ەلدەردە ساپانى باقىلاۋ تولىق اۆتوماتتاندىرىلعان.
– اۆتوماتتاندىرىلعان جۇيە قاعاز پولوتنوسىنىڭ قالىڭدىعى مەن تىعىزدىعىن مىڭداعان نۇكتەدە تەكسەرەدى. مۇنداي جابدىق بولاشاقتا وندىرىلەتىن كارتوننىڭ جوعارى ساپاسىن قامتاماسىز ەتەدى, – دەپ تولىقتىردى كاسىپورىن باسشىسى.
قازىرگى تاڭدا جۇمىس ىستەپ تۇرعان زاۋىت اي سايىن 1,2 ملن شارشى مەتر گوفروكارتون شىعارادى. ونىڭ قۋاتى – 2 ملن شارشى مەتر. ال جاڭا زاۋىت ىسكە قوسىلعان سوڭ جىلىنا 60 مىڭ توننا ماكۋلاتۋرا وڭدەلمەك.
پاۆلودار كارتوندارى تاماق ونەركاسىبىنەن باستاپ مەديتسيناعا دەيىن ءتۇرلى سالادا كەڭىنەن قولدانىلادى. ءوندىرىس تولىعىمەن اۆتوماتتاندىرىلعان: كوپ ءتۇستى باسپا (CMYK ستاندارتى), كەسۋ, قالىپپەن شابۋ جانە جەلىمدەۋ پروتسەسى تسيفرلى جۇيەمەن باسقارىلادى. ونىمدەر ەلىمىزدىڭ تۇكپىر-تۇكپىرىنە جەتكىزىلەدى.
وندىرىستىك تسەح باسشىسى ەۆگەني ءسينيننىڭ ايتۋىنشا, وتاندىق شيكىزاتتى قولدانۋ كومپانيانىڭ ىشكى جانە سىرتقى نارىقتاعى ورنىن كۇشەيتەدى.
– قازىر ەلىمىزدەگى ماكۋلاتۋرانىڭ باسىم بولىگى شەتەلگە جونەلتىلەدى. ال جاڭا زاۋىت ونى ەلىمىزدىڭ ىشىندە قايتا وڭدەۋگە مۇمكىندىك بەرەدى. بۇل – جوعارى قوسىلعان قۇنى بار ءونىم شىعارۋ دەگەن ءسوز, – دەدى ول.
كاسىپورىننىڭ 2026 جىلدىڭ سوڭىندا نەمەسە 2027 جىلدىڭ باسىندا ىسكە قوسىلۋى جوسپارلانىپ وتىر. جاڭا ءوندىرىس شامامەن 200 ادامدى جۇمىسپەن قامتاماسىز ەتپەك.
ماكۋلاتۋرانى قايتا وڭدەۋ زاۋىتى – بۇل تەك ونەركاسىپكە سالىنعان ينۆەستيتسيا عانا ەمەس, سونىمەن قاتار ءوڭىردىڭ ەكولوگيالىق تۇراقتىلىعىنا قوسىلعان ۇلەس. ەكىنشى شيكىزاتتى پايدالانۋ قورشاعان ورتاعا تۇسەتىن سالماقتى ازايتادى, تۇيىق تسيكلدى ەكونوميكانى قولدايدى جانە كومىرقىشقىل گازىنىڭ ءىزىن تومەندەتۋگە ىقپال ەتەدى.
