وتىرىستىڭ اشىلۋىندا ۇلتتىق كوميسسيا توراعاسى, قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالاەۆا ءسوز سويلەدى.
ءىس-شاراعا ۇلتتىق كوميسسيا مۇشەلەرى, ورتالىق جانە جەرگىلىكتى اتقارۋشى ورگانداردىڭ, ازاماتتىق سەكتور جانە حالىقارالىق ۇيىمداردىڭ وكىلدەرى قاتىستى.
وتىرىس ۇلتتىق كوميسسيانىڭ جاڭارتىلعان قۇرامىمەن ءوتتى. مەملەكەت باسشىسىنىڭ جارلىعىمەن بەكىتىلگەن روتاتسيا اياسىندا كوميسسيا قۇرامىنا قوعام قايراتكەرلەرى, ساراپشىلىق جانە عىلىمي قاۋىمداستىق وكىلدەرى سەكىلدى 8 جاڭا مۇشە ەندى. سونىمەن قاتار, ۇلتتىق كوميسسيا توراعاسىنىڭ جاڭا ورىنباسارى بولىپ ايمان وماروۆا تاعايىندالدى.
جيىننىڭ نەگىزگى كۇن تارتىبىندە جاسوسپىرىمدەر اراسىنداعى ەرتە جۇكتىلىكتىڭ الدىن الۋ شارالارى, رەپرودۋكتيۆتى دەنساۋلىق اپتالىعىنىڭ قورىتىندىلارى ءسوز بولدى.
«جاسوسپىرىمدەر مەن جاستاردىڭ رەپرودۋكتيۆتى دەنساۋلىعىن ساقتاۋ, ەرتە جۇكتىلىك پەن بوسانۋدىڭ الدىن الۋ ماسەلەلەرى قازىرگى جاعدايدا ايرىقشا الەۋمەتتىك ماڭىزعا يە. ويتكەنى جاستار – ەلىمىزدىڭ زياتكەرلىك, ساياسي, ەكونوميكالىق, الەۋمەتتىك, مادەني ءارى رەپرودۋكتيۆتى الەۋەتىنىڭ قاينار كوزى. ۇلتتىق كوميسسيا ساراپشىلارىنىڭ پىكىرىنشە, جاسوسپىرىمدەر مەن جاستاردىڭ جىنىستىق جانە رەپرودۋكتيۆتى ساۋاتتىلىق دەڭگەيىنىڭ تومەندىگى – ەرەكشە الاڭداتارلىق جايت», – دەپ اتاپ ءوتتى ۇلتتىق كوميسسيا توراعاسى ايدا بالاەۆا.
ءوز كەزەگىندە قر دەنساۋلىق ساقتاۋ ءمينيسترى اقمارال ءالنازاروۆا جاسوسپىرىمدەر اراسىنداعى جۇكتىلىك دەڭگەيى جانە ونى تومەندەتۋ شارالارى تۋرالى باياندادى.
«جاسوسپىرىمدەر اراسىندا جۇكتىلىك پەن جاساندى تۇسىك جاساۋ كورسەتكىشى ءالى دە جوعارى. ءبىز بالالارعا گينەكولوگيالىق كومەكتى جەتىلدىرۋگە باعىتتالعان 2023-2025 جىلدارعا ارنالعان جول كارتاسىن جانە بالالارعا پروفيلاكتيكالىق كومەكتى جاقسارتۋ جونىندەگى ءىس-شارالار جوسپارىن قابىلدادىق. جوسپار اياسىندا كونتراتسەپتيۆتەرگە قولجەتىمدىلىكتى ارتتىرۋ, اقپاراتتىق ءتۇسىندىرۋ جۇمىستارىن جۇرگىزۋ, كادر الەۋەتىن كۇشەيتۋ جانە باسقا دا كەشەندى شارالار كوزدەلگەن», – دەدى ا. ءالنازاروۆا.
بالالاردىڭ قۇقىقتارىن قورعاۋ كوميتەتىنىڭ توراعاسى ناسىمجان وسپانوۆا ءبىلىم بەرۋ جۇيەسىندە جىنىستىق تاربيە مەن ءتۇسىندىرۋ جۇمىستارىنىڭ بارىسى جونىندە اقپارات ۇسىندى.
رەسپۋبليكالىق رەپرودۋكتيۆتى دەنساۋلىق اپتالىعىنىڭ قورىتىندىسى تۋرالى ۇلتتىق كوميسسيا توراعاسىنىڭ ورىنباسارى جۇلدىزاي ىسقاقوۆا باياندادى. ول جاستار اراسىندا دەنساۋلىق پەن بولاشاق اتا-انا بولۋدىڭ جاۋاپكەرشىلىگىنە قاتىستى كەڭ اۋقىمدى اعارتۋشىلىق ناۋقانداردىڭ ماڭىزىن اتاپ ءوتتى.
وتىرىستى قورىتىندىلاعان ايدا بالاەۆا ەرتە جۇكىتىلىك پەن بوسانۋ – ەلىمىزدە قولعا الىنىپ جاتقان كەشەندى شارالارعا قاراماستان, ءالى دە وزەكتى ماسەلە بولىپ وتىرعانىن ايتتى.
«بۇل باعىتتا الدىن الۋ جۇمىستارى كوپقىرلى تاسىلدەرمەن, جاسوسپىرىمدەردىڭ جىنىستىق مىنەز-ق ۇلىق ەرەكشەلىكتەرىن جان-جاقتى ەسكەرە وتىرىپ جۇرگىزىلۋى ءتيىس», – دەدى مينيستر.
وتىرىس بارىسىندا جاسوسپىرىمدەر مەن جاستار اراسىندا ەرتە جۇكتىلىك, جىنىستىق جولمەن بەرىلەتىن اۋرۋلار, رەپرودۋكتيۆتى دەنساۋلىققا تونەتىن قاۋىپتەر تۋرالى اقپاراتتاندىرۋ دەڭگەيىن ارتتىرۋعا جانە سالاۋاتتى ءومىر سالتىن ناسيحاتتاۋعا باعىتتالعان جاڭا پروفيلاكتيكالىق ستراتەگيانى ازىرلەۋ تۋرالى شەشىم قابىلداندى.
ايمان وماروۆا ايەلدەردىڭ جازاسىن وتەۋ ورىندارىندا, سونداي-اق زورلىق-زومبىلىق كورگەن ءجاسوسپىرىم قىزدارعا كومەك كورسەتۋ بارىسىندا كلينيكالىق پسيحولوگتار تاپشى ەكەنىن ءسوز ەتتى.
وتىرىس بارىسىندا جاسوسپىرىمدەر مەن جاستار اراسىنداعى ەرتە جۇكتىلىكتىڭ, جىنىستىق جولمەن بەرىلەتىن ينفەكتسيالاردىڭ الدىن الۋ ماسەلەلەرى بويىنشا اقپاراتتىق دەڭگەيىن ارتتىرۋعا, سالاۋاتتى ءومىر سالتىن ۇستانۋعا, ۇلت ساۋلىعى مەن دەنى ساۋ ۇرپاق تاربيەلەۋگە باعىتتالعان جاڭا الدىن الۋ ستراتەگياسىن ازىرلەۋ تۋرالى شەشىم قابىلداندى.
ايدا بالاەۆا سونداي-اق مەكتەپ وقۋشىلارى مەن ستۋدەنتتەردىڭ جىنىستىق تاربيەسىن ارتتىرۋ ماقساتىندا جاسوسپىرىمدەر مەن جاستارعا ارنالعان ءموبيلدى قوسىمشا ازىرلەۋدى تاپسىردى.
سونىمەن قاتار, جاسوسپىرىمدەر اراسىنداعى جۇكتىلىك دەڭگەيى جوعارى وڭىرلەردە جىل بويى ۇلتتىق كوميسسيا مۇشەلەرىنىڭ, جەرگىلىكتى اتقارۋشى ورگانداردىڭ, اتا-انالار قاۋىمداستىعى مەن ازاماتتىق سەكتور وكىلدەرىنىڭ قاتىسۋىمەن كوشپەلى سەمينارلار وتكىزۋ جوسپارلانۋدا.
ۋاكىلەتتى مەملەكەتتىك ورگاندارعا جاستار دەنساۋلىعى ورتالىقتارىنىڭ جۇمىسىن قايتا قاراپ, جاسوسپىرىمدەرگە ارنالعان قىزمەتتى جاڭارتۋ, حالىق اراسىندا سالاۋاتتى ءومىر سالتىن كەڭىنەن ناسيحاتتاۋ ۇسىنىلدى. سونىمەن قاتار, كەزدەسۋگە قاتىسۋشىلار وڭىرلىك دەڭگەيدە ۆەدومستۆوارالىق ءوزارا بايلانىستى كۇشەيتۋدىڭ ماڭىزىن اتاپ ءوتتى. وتباسىنى قولداۋ ورتالىق جۇمىسىنىڭ تيىمدىلىگىن ارتتىرۋ ماسەلەسىنە ەرەكشە نازار اۋدارىلدى.
ۇلتتىق كوميسسيا مۇشەلەرى مەن دەنساۋلىق ساقتاۋ مينيسترلىگى بىرلەسىپ, جاسوسپىرىمدەر مەن جاستار اراسىنداعى ەرتە جۇكتىلىكتىڭ الدىن الۋ جونىندەگى جۇمىس باعىتىن ارتتىرۋ ماقساتىندا جۋرناليستەرگە ارنالعان ۇسىنىمدار ازىرلەيدى.
سونىمەن قاتار ۇلتتىق كوميسسيا مۇشەلەرى «انالار ساۋلىعى» باعدارلاماسىن زەردەلەپ, ونى ىسكە اسۋ جولدارىن جەتىلدىرۋ بويىنشا ۇسىنىمدار دايىندايدى.
