فوتو: پاۆلودار وبلىسى اكىمىنىڭ ءباسپاسوز قىزمەتى
قاتتى داۋىلدان پاۆلودار وبلىسىنىڭ ينفراقۇرىلىمىنا ايتارلىقتاي زيان كەلگەن. كوپتەگەن ەلدى مەكەندەردە, سونىڭ ىشىندە اقسۋ قالاسىندا, باياناۋىل اۋدانىندا ەلەكتر قۋاتى ءوشىپ قالعان.
-19 ماۋسىم كۇنى پاۆلودار وبلىسىندا جىلدامدىعى سەكۋندىنا 43 مەترگە دەيىن جەتەتىن داۋىلدى جەل تىركەلدى. توتەنشە جاعدايلار قىزمەتىنىڭ مالىمەتى بويىنشا, 16 ادام زارداپ شەككەن, ونىڭ ىشىندە ءۇش بالا بار. اقسۋ قالاسىندا 1968 جىلى تۋعان تۇرعىن قايتىس بولدى.
«وبلىس ورتالىعىندا 47 نىساننىڭ, ونىڭ ىشىندە 6 الەۋمەتتىك مەكەمەنىڭ شاتىرىنا زاقىم كەلدى. اقسۋ مەن ەكىباستۇزدا 23 نىسان, باياناۋىل اۋدانىندا 7 نىسان زارداپ شەكتى, سونداي-اق ماي جانە پاۆلودار اۋداندارىندا عيماراتتاردىڭ زاقىمدانۋى تىركەلدى. ءوڭىر قالالارى مەن اۋداندارىنىڭ ەلەكترمەن جابدىقتاۋ جەلىلەرىندە اقاۋلار بايقالادى. قازىرگى ۋاقىتتا اقسۋ قالاسىندا جانە باياناۋىل اۋدانىندا ەلەكتر قۋاتىنىڭ ءوشۋى تىركەلىپ وتىر», دەپ حابارلادى پاۆلودار وبلىسى اكىمىنىڭ ءباسپاسوز قىزمەتىنەن.
قازىرگى ساتتە اپاتتىڭ سالدارىن جويۋ بويىنشا جۇمىستار جالعاسىپ جاتىر. بايلانىس جانە ەلەكترمەن جابدىقتاۋ جەلىلەرىنىڭ 16 باعاناسى قالپىنا كەلتىرىلۋدە. بارلىق جۇمىستارعا 300-دەن استام ادام جانە 103 ارنايى تەحنيكا جۇمىلدىرىلعان.
بارلىق شۇعىل ارەكەت ەتۋ قىزمەتتەرى كۇشەيتىلگەن رەجيمدە جۇمىس ىستەپ جاتىر.
پاۆلودار وبلىسى
