سۋ قاۋىپسىزدىگىن قامتاماسىز ەتۋ, ترانسشەكارالىق ىنتىماقتاستىقتى دامىتۋ, سۋ پايدالانۋ تيىمدىلىگىن ارتتىرۋ جانە تسيركۋليارلى ەكونوميكاعا كوشۋ شارالارى تالقىلاندى. سونىمەن قاتار قازاقستاننىڭ ەو-مەن ەكولوگيالىق تەحنولوگيالار ەنگىزۋ, ينۆەستيتسيالار تارتۋ جانە وزىق تاجىريبەلەر الماسۋ سالاسىنداعى ارىپتەستىگىنىڭ كەلەشەگى قارالدى.
پرەمەر-مينيستر ءوز سوزىندە ەلىمىزدىڭ سۋ بالانسىنا جۇكتەمەنىڭ كۇشەيۋى جاعدايىندا سۋ رەسۋرستارىن ۇتىمدى ءارى ورنىقتى باسقارۋدىڭ ماڭىزدىلىعىن اتاپ ءوتتى. قازاقستان ۇكىمەتىنىڭ الدىندا تۇرعان مىندەتتەردى ەسكەرە وتىرىپ, ونىڭ ىشىندە سۋ شارۋاشىلىعى ينفراقۇرىلىمىن جاڭعىرتۋ جانە سۋ پايدالانۋدىڭ تيىمدىلىگىن ارتتىرۋ, اسىرەسە اۋىل شارۋاشىلىعىندا سۋ رەسۋرستارىن باسقارۋ جۇيەسىن دامىتۋ تۇجىرىمداماسى ىسكە اسىرىلىپ جاتىر. قازاقستان مەن ەۋروپالىق وداق اراسىنداعى ترانسشەكارالىق ىنتىماقتاستىق اياسىندا جۇزەگە اسىرىلىپ جاتقان بىرقاتار باستاما وڭ باعالاندى. وسىلايشا, Sustainable Energy Connectivity in Central Asia (SECCA) اياسىندا تۇراقتى سۋ پايدالانۋ جانە ەنەرگيا تيىمدىلىگىن ارتتىرۋ سالاسىنداعى پيلوتتىق جوبالار ىسكە قوسىلدى. Team Europe Initiative on Water, Energy and Climate Change وڭىرلىك باعدارلاماسى قازاقستاننىڭ سۋ سەكتورىنا جەكە ينۆەستيتسيا تارتۋ قۇرالى رەتىندە قىزمەت ەتەدى.
قالدىقتاردى باسقارۋ ماسەلەسىنە ەرەكشە نازار اۋدارىلدى. كەيىنگى 10 جىلدا قازاقستاندا قالدىقتاردى قايتا وڭدەۋ ۇلەسى 1%-دان 25%-عا دەيىن ءوستى. 2030 جىلعا قاراي بۇل كورسەتكىشتى 40%-عا دەيىن جەتكىزۋ جوسپارلانىپ وتىر. ءوندىرۋشى جاۋاپكەرشىلىگىنىڭ كەڭەيتىلگەن جۇيەسىن ەنگىزۋدىڭ, قالدىقتاردى ەنەرگەتيكالىق كادەگە جاراتۋ ينفراقۇرىلىمى مەن تەحنولوگيالارىن دامىتۋدىڭ ءرولى ەرەكشە اتاپ ءوتىلدى.
پرەمەر-مينيستر قازاقستان مەن ەۋروپالىق وداق اراسىنداعى ارىپتەستىكتى نىعايتۋ ەكولوگيالىق يننوۆاتسيالاردى ەنگىزۋ, ينفراقۇرىلىمدىق جوبالاردى بىرلەسىپ جۇزەگە اسىرۋ جانە «جاسىل» كۇن ءتارتىبىن ىلگەرىلەتۋ ءۇشىن جاڭا مۇمكىندىكتەر اشاتىنىنا توقتالدى.
«پرەزيدەنت قاسىم-جومارت توقاەۆ سۋ رەسۋرستارىن ورنىقتى باسقارۋ جانە حالىقارالىق سەرىكتەستەرمەن, اتاپ ايتقاندا, ەۋروپالىق وداقپەن ديالوگتى دامىتۋ ماسەلەلەرىنە ۇلكەن ءمان بەرەدى. بۇگىنگى كەزدەسۋ – بۇل جاي عانا پىكىر الماسۋ ەمەس, سۋدى ۇقىپتى ءارى ءادىل پايدالاناتىن بولاشاقتى بىرلەسىپ قالىپتاستىرۋعا ارنالعان پلاتفورما, قالدىقتار قۇندىلىق پەن جاڭا ەنەرگيانىڭ قاينار كوزىنە اينالادى, ال قازاقستان مەن ەو سەرىكتەستىگى وڭىردەگى «جاسىل» دامۋ مەن يننوۆاتسيالىق كوشباسشىلىقتىڭ ۇزدىك ۇلگىسىنە اينالادى. مۇددەلى تاراپتاردى ناقتى جوبالاردى جۇزەگە اسىرۋ, تەحنولوگيالاردى ەنگىزۋ جانە ەكولوگيالىق مىنەز-قۇلىقتى ترانسفورماتسيالاۋ ءۇشىن كۇش بىرىكتىرۋگە شاقىرامىن. قازاقستان ۇكىمەتى بۇل ماسەلەلەردە سەنىمدى سەرىكتەس بولۋعا دايىن», دەپ اتاپ ءوتتى و.بەكتەنوۆ.
ەۋروپالىق وداقتىڭ ديالوگتىك پلاتفورماسىنىڭ وتىرىسىندا ەو ەلشىسى الەشكا سيمكيچ, گەرمانيا ەلشىسى مونيكا يۆەرسەن, فينليانديا ەلشىسى ياننە حەيسكانەن, نيدەرلاند ەلشىلىگىنىڭ ۋاقىتشا سەنىمدى وكىلى مارتين ۆان بيۋرەن; ەۋروپالىق كومپانيالاردان – كاۆكازداعى جانە ورتالىق ازياداعى Aqualia بيزنەستى دامىتۋ جونىندەگى ديرەكتورى يراكلي بابۋحاديا, «SOIL SOLUTION» جشس قۇرىلتايشىسى جانە قازاقستانداعى Water&Soil كومپانياسىنىڭ رەسمي وكىلى دانيەل رەپاسسي, ورتالىق ازيا جانە كاۆكاز ايماعىنىڭ «Xylem» باسقارۋشى ديرەكتورى لەۆ اپپاكوۆ, MicroStep-MIS Slovak Consortium Solution for Water Management ايماقتىق مەنەدجەرى ابدۋللا ابدۋل-رازاكوۆ ۇسىنىستارىن ايتىپ, پىكىر قوستى.
ەۋروپالىق وداقتىڭ ەلشىسى الەشكا سيمكيچ ەو-نىڭ قازاقستاننىڭ قالدىقتاردى باسقارۋ سالاسىنداعى نەگىزگى جوبالارىن قولداۋعا دايىن ەكەنىن اتاپ ءوتىپ, جەرگىلىكتى ينستيتۋتتاردى Horizon Europe زەرتتەۋلەر مەن يننوۆاتسيالار باعدارلاماسىنا بەلسەندى قاتىسۋعا شاقىردى.
ەلشى مونيكا يۆەرسەن «جاسىل ورتالىق ازيا» باستاماسى اياسىندا جانە Team Europe قولداۋىمەن گەرمانيا سۋ رەسۋرستارى, ەنەرگەتيكا جانە كليمات سالاسىنداعى وڭىرلىك ىنتىماقتاستىقتى دامىتۋدى جالعاستىراتىنىن اتاپ ءوتتى. نەگىزگى جوبالاردىڭ قاتارىندا ترانسشەكارالىق وزەندەردى باسقارۋ بويىنشا تاجىريبە الماسۋ, تابيعي اپاتتاردىڭ الدىن الۋ ءۇشىن كليماتتىق پروفيلدەردى دايىنداۋ جانە سۋ شارۋاشىلىعى كومپانيالارىنىڭ قازاقستانعا بيزنەس – ميسسياسىن ۇيىمداستىرۋ بار.
فينليانديا ەلشىسى ياننە حەيسكانەن قازاقستاندا ونەركاسىپتىك جانە مۋنيتسيپالدىق نىسانداردا اعىندى سۋدى تازارتۋدىڭ ەنەرگيالىق ءتيىمدى تەحنولوگيالارىن ەنگىزىپ جاتقان بىرقاتار فين كومپانيالارىنىڭ تاجىريبەسىمەن تانىستىردى.
نيدەرلاند وكىلى مارتين ۆان بيۋرەن نيدەرلاند پەن بەنيليۋكس ەلدەرىنىڭ كومپانيالارى كونسورتسيۋمىنىڭ اقتاۋدا قۋاتى تاۋلىگىنە 150 مىڭ تەكشە مەتر بولاتىن سۋ تۇششىتۋ قوندىرعىسىن سالۋ جوباسىن جۇزەگە اسىرۋعا دايىندىعى تۋرالى حابارلادى. سونداي-اق گوللانديالىق DRRS توبى وتاندىق ماماندارمەن بىرلەسىپ جۇمىس ىستەيتىن سۋ تاسقىنى تۋرالى ۇلتتىق ەرتە حابارلاۋ جۇيەسىن قۇرۋ جونىندەگى باستاماعا قولداۋ ءبىلدىرىلدى.
ەۋروپالىق كومپانيا وكىلدەرىنىڭ ايتۋىنشا, سۋدى قايتا پايدالانۋ تەحنولوگيالارىن ەنگىزۋ, شىعىنداردى ازايتۋ جانە سۋ رەسۋرستارىن باسقارۋدا تسيفرلىق پلاتفورمالاردى پايدالانۋ ماسەلەلەرى وزەكتى. وندىرىستەردى لوكاليزاتسيالاۋ, تەحنيكالىق ورتالىقتار قۇرۋ, تازارتۋ قۇرىلىستارىن ماتەماتيكالىق مودەلدەۋ تاجىريبەسىن كەڭەيتۋ بويىنشا ۇسىنىستار ايتىلدى.
قويىلعان سۇراقتارعا قاتىستى مەملەكەتتىك ورگاندار تاراپىنان سۋ رەسۋرستارى جانە يرريگاتسيا ءبىرىنشى ۆيتسە-ءمينيسترى نۇرلان الدامجاروۆ, ەكولوگيا جانە تابيعي رەسۋرستار ۆيتسە-ءمينيسترى جومارت اليەۆ, «بايتەرەك» حولدينگى باسقارما توراعاسىنىڭ مىندەتىن اتقارۋشى ەرسايىن حاميتوۆ جاۋاپ بەردى.
