«Saran» يندۋستريالىق ايماعىنىڭ كاسىپورىندارى, «Qarmet» اق ءوندىرىس نىساندارى, ونىڭ ىشىندە مەتاللۋرگيا كومبيناتى مەن «ساران» شاحتاسىنا باردى. ەنەرگەتيكا, كوممۋنالدىق جانە اۋىل شارۋاشىلىعى سالالارىنداعى جوبالارعا نازار اۋدارىلدى.
پرەمەر-مينيستر قاراعاندى وبلىسىنىڭ ساران قالاسىندا ورنالاسقان «Saran» يندۋستريالىق ايماعىنىڭ دامۋىمەن تانىستى. «قازاقستاندىق ىستىق مىرىشتاۋ زاۋىتى» جشس مىرىشتالعان مەتالل بۇيىمدارىن وندىرەتىن جاڭا كاسىپورىننىڭ اشىلۋىن مىسالعا الا وتىرىپ, قوسىلعان قۇنى جوعارى ءونىم شىعارۋدى ارتتىرۋ باعىتىندا اتقارىلىپ جاتقان جۇمىستار تەكسەرىلدى. ىستىق مىرىشتاۋ نەمەسە مەتالل بۇيىمدارىن توت باسۋدان قورعاۋ قۇرىلىستا, ماشينا جاساۋ مەن اۋىل شارۋاشىلىعىندا جانە ەكونوميكانىڭ باسقا سالالارىندا كەڭىنەن قولدانىلادى. ەلىمىزدىڭ ونەركاسىبىندەگى وڭ ديناميكانى ەسكەرە وتىرىپ, مىرىشتالعان مەتالل بۇيىمدارىنا سۇرانىس جىل سايىن ارتىپ كەلەدى. قۋاتى جىلىنا 50 مىڭ توننا ءونىم شىعارۋعا جەتەتىن كاسىپورىندى ىسكە قوسۋ وتاندىق مەتالل كونسترۋكتسيالارىن وندىرۋشىلەر قاجەتتىلىگىنىڭ 80%-ىن وتەۋگە مۇمكىندىك بەرەدى. جوباعا 6,2 ملرد تەڭگە ينۆەستيتسيا تارتىلىپ, ونىڭ 80%-ى – «بايتەرەك» حولدينگىنىڭ تەتىكتەرى ارقىلى ۇسىنىلاتىن قارىز قاراجاتى. زاۋىت مەملەكەتتىك قولداۋ شارالارىنىڭ تيىمدىلىگىنىڭ ناتيجەسىندە ىسكە قوسىلدى. 115 تۇراقتى جۇمىس ورنىن اشۋ جوسپارلانىپ وتىر. سونىمەن قاتار ءىرى ءوندىرىس وشاعى توڭىرەگىندە شاعىن جانە ورتا بيزنەس بەلدەۋىن دامىتۋعا قوسىمشا سەرپىن بەرىلمەك.
پرەمەر-مينيستر ساران قالاسىنداعى شينالار شىعاراتىن «Tengri Tyres» جشس زاۋىتىندا بولدى. كاسىپورىن يمپورتقا تاۋەلدىلىكتى ازايتىپ, جەرگىلىكتى ءوندىرىستى دامىتۋعا باعىتتالعان. تولىق تسيكلدى زاۋىتتا حالىقارالىق ستاندارتتارعا ساي تەحنولوگيالىق بارلىق پروتسەسس ىسكە قوسىلدى. بيىلعى قاڭتار-ناۋرىز ايلارىندا Attar برەندىمەن جالپى قۇنى 2,6 ملرد تەڭگە بولاتىن 135,4 جەڭىل جانە جۇك كولىكتەرى دوڭگەلەكتەرى جانە قىسقى شينالار شىعارىلدى. ىشكى نارىقتىڭ قاجەتتىلىكتەرىن قامتاماسىز ەتۋمەن قاتار, جەڭىل كولىك شينالارى ەكسپورتى جۇزەگە اسىرىلادى. «Tengri Tyres» جشس ديرەكتورى الەكساندر ۋستاۆششيكوۆ جىل سوڭىنا دەيىن قۇنى 29,3 ملرد تەڭگە بولاتىن 1,2 ملن شينا شىعارۋ جوسپارى تۋرالى ايتتى. قازىرگى تاڭدا زاۋىتتا 850 ادام جۇمىس ىستەيدى. تولىق جوبالىق قۋاتىنا شىعۋ جالپى 1 125 تۇراقتى جۇمىس ورنىن اشۋدى قامتاماسىز ەتەدى.
پرەمەر-مينيستر جەتكىزىلىمدەر كولەمىن ودان ءارى ارتتىرۋدىڭ جانە ساتۋ نارىعىن كەڭەيتۋدىڭ ماڭىزدىلىعىن اتاپ ءوتتى.
«Silk Road Electronics» جشس تۇرمىستىق تەحنيكا وندىرەتىن كاسىپورنىن ارالاۋ بارىسىندا ءوندىرىستى لوكاليتسازيالاۋدى ارتتىرۋ جوسپارلارىنا نازار اۋدارىلدى. بۇل كورسەتكىش بۇگىندە 50%-دان اسادى. ءارى قاراي ءوسۋ ءۇشىن جابدىقتى جاڭعىرتۋعا قوماقتى ينۆەستيتسيا سالىندى. شىعارىلاتىن ونىمدەر – تەلەديدار, سۋ جىلىتقىش, شاعىن پەش, سورعى, شاڭسورعىش, كىر جۋاتىن ماشينا, اس ءۇي پليتاسى جانە باسقا دا تەحنيكالار ەلىمىزدە جانە كورشىلەس ەلدەرگە ساتىلادى.
پرەمەر-مينيستر «ساران» شاحتاسىندا جۇمىسشىلاردىڭ ەڭبەك قاۋىپسىزدىگىن قامتاماسىز ەتۋ بويىنشا جۇرگىزىلىپ جاتقان جۇمىستارمەن تانىستى. 520 مەتر تەرەڭدىكتەگى شاحتاعا ءتۇسۋ بارىسىندا ۇڭعىما ۋچاسكەلەر قارالدى. «Qarmet» اق كومىر دەپارتامەنتىنىڭ ديرەكتورى جاقان مۇحامەدجانوۆ ناقتى ۋاقىت رەجىمىندە جەراستى قازبالارىنداعى قىزمەتكەرلەردىڭ ورنالاسقان جەرىن باقىلاۋعا مۇمكىندىك بەرەتىن پەرسونالدى پوزيتسيالاۋ جۇيەسىن الەمدىك ستاندارتتارعا سايكەس ەنگىزۋ تۋرالى حاباردار ەتتى. بۇل قاۋىپسىزدىكتى باقىلاۋدى كۇشەيتەدى جانە توتەنشە جاعدايلاردا جەدەل ارەكەت ەتۋگە مۇمكىندىك بەرەدى. جۇمىس ورىندارىنداعى شاحتەرلەرمەن بەينەبايلانىستىڭ تەحنيكالىق مۇمكىندىكتەرى تانىستىرىلدى. جاڭعىرتۋ باعدارلاماسى سونىمەن قاتار ۇڭعىما جابدىقتارىن جاڭارتۋدى, جەلدەتۋ جۇيەلەرىن جاقسارتۋدى, ورتتەن قورعاۋدى كۇشەيتۋدى جانە جەراستى جۇمىستارىنىڭ تسيفرلىق ينفراقۇرىلىمىن كەڭەيتۋدى قامتيدى.
كەنشىلەرمەن اڭگىمەلەسۋ بارىسىندا ءوندىرىستى تسيفرلاندىرۋعا بەيىمدەۋ ماسەلەلەرى تالقىلاندى. ولجاس بەكتەنوۆ جۇمىسشىلاردىڭ ەڭبەك قاۋىپسىزدىگىن قامتاماسىز ەتۋ ءۇشىن باسقا شاحتالاردا وسىنداي قوندىرعىلاردى جەدەلدەتۋ قاجەتتىگىن اتاپ ءوتتى. Qarmet كومىر كاسىپورىندارىن جاڭعىرتۋعا سالىنعان ينۆەستيتسيالاردىڭ جالپى كولەمى شامامەن 500 ملن دوللاردى قۇرايدى. وزىق جۇيەلەردى ەنگىزۋ بويىنشا اۋقىمدى جۇمىستارمەن باسقا دا شاحتالار قامتىلاتىن بولادى.
پرەمەر-مينيستر تەمىرتاۋ قالاسىنداعى Qarmet مەتاللۋرگيالىق كومبيناتىندا بولدى. بيىلعى بەس ايدا كاسىپورىن قاتتى بولات ءوندىرىسىن 13%-عا – 1,5 ملن تونناعا دەيىن ۇلعايتتى.
پرەمەر-مينيسترگە قۋاتتىلىعى جىلىنا 4 ملن تونناعا دەيىن سۇيىق بولات كونۆەرتەر تسەحىنىڭ الاڭىندا پرەزيدەنتتىڭ تاپسىرماسىنا سايكەس وندىرىستىك قۋاتتاردى تابيعي گازعا قوسۋ بويىنشا جۇرگىزىلىپ جاتقان جۇمىس تۋرالى باياندالدى. وتكەن جىلى №1 جانە №2 كونۆەرتەرلەرگە كۇردەلى جوندەۋ جۇرگىزىلىپ, كورپۋستار تولىق اۋىستىرىلدى, اناعۇرلىم زاماناۋي ءارى ورنىقتى كونسترۋكتسيالار ورناتىلدى. بۇل بولات بالقىتۋ كولەمىن ۇلعايتۋعا جانە تسەحتىڭ وندىرىستىك تيىمدىلىگىن ارتتىرۋعا مۇمكىندىك بەردى.
مۇندا ولجاس بەكتەنوۆ №8 جانە №9 كوكس باتارەيالارىنىڭ قۇرىلىسىمەن تانىستى. قۋاتتىلىعى جىلىنا 1,5 ملن قۇرعاق كوكس بولاتىن ينۆەستيتسيالىق جوبا پرەمەر-ءمينيستردىڭ 2024 جىلعى 5 قاراشادا قىتاي حالىق رەسپۋبليكاسىنا جۇمىس ساپارى كەزىندە قول جەتكىزىلگەن ۋاعدالاستىقتار شەڭبەرىندە قىتايلىق ACRE Coking & Refractory Engineering Consulting Co., Ltd كومپانياسىمەن بىرلەسىپ جۇزەگە اسىرىلۋدا. 2027 جىلعا جوسپارلانعان ءوندىرىستىڭ نەگىزگى پارامەترلەرى تانىستىرىلدى.
پرەمەر-مينيستر تەمىرتاۋ قالاسىنداعى جىلۋ جەلىلەرىن رەكونسترۋكتسيالاۋ ۋچاسكەسىن قاراپ شىقتى. ولجاس بەكتەنوۆ جىلىتۋ ماۋسىمىنا دايىندىق ەرەكشە باقىلاۋدا ەكەنىن اتاپ ءوتتى.
سونداي-اق نۇرا اۋدانىندا ورنالاسقان «رامادان ءسۇت فەرماسى» جشس-عا بارعان ولجاس بەكتەنوۆ ءوڭىردىڭ اگروونەركاسىپ كەشەنىنىڭ دامۋىمەن تانىستى.
