ءامىردىڭ جي تاقىرىبىنا قىزىعۋشىلىعى بىلتىرعى وقۋ جىلىنان باستالدى. مەكتەپتەگى «Digital Society» ءپانى اياسىندا جاڭا تەحنولوگيانىڭ الەۋمەتتىك, ەكولوگيالىق جانە ەتيكالىق سەبەپ-سالدارىن زەرتتەدى. اسىرەسە ونى وتكەن جىلى جەلتوقسان ايىندا كاليفورنيا شتاتىندا بولعان ءىرى ورمان ءورتى تەرەڭ ويعا قالدىردى. ءورت سەبەپتەرىنىڭ ءبىرى رەتىندە دەرەك ورتالىعىنىڭ كوپ كولەمدە سۋ تۇتىنعانى كورسەتىلگەن. وسى اقپاراتتى وقىعاننان كەيىن ول «ChatGPT»-ءدىڭ ءبىر عانا ساۋالىنا قانشا رەسۋرس جۇمسالاتىنىن زەرتتەۋگە كىرىستى.
شىنىندا دا, زەردەلى وقۋشىنىڭ زەرتتەۋ جۇمىسى وتە ماڭىزدى. ويتكەنى بۇعان دەيىن بۇل تاقىرىپ كوپ زەرتتەلمەگەن. ءبىر جاعىنان, وسى جوبا ارقىلى جي مەن ونىڭ رەسۋرستاردى تۇتىنۋىنا بايلانىستى ماسەلەلەر نازار اۋدارتادى.
«بىردە جاڭالىقتاردان «OpenAI» باس ديرەكتورى سەم التماننىڭ «راحمەت» نەمەسە «وتىنەمىن» سياقتى سۇرانىستاردىڭ وزىنە قانشا سۋ مەن قارجى كەتەتىنىن بىلمەيمىز دەگەنىن وقىدىم. بۇل ماسەلە ماعان وي سالدى. بىراق وسى تاقىرىپتى وعان دەيىن دە بىرنەشە رەت دوستارىممەن تالقىلاعان ەدىم. ويتكەنى ءوزىم كەيىنگى كەزدە «ChatGPT»-ءدى قولدانۋدى ازايتتىم. جالپى, بالا كۇنىمنەن زەرتتەۋمەن اينالىسقاندى جاقسى كورەمىن. قازىر ءبىز مەكتەپتە «IBDP» باعدارلاماسىن وقيمىز. سەبەبى وسى باعدارلاما اياسىندا ۇنەمى زەرتتەۋ جاساپ, تالداۋ جۇرگىزەمىز. ال مۇنداي بەلسەندىلىك وقۋ ۇدەرىسىن جەڭىلدەتىپ, ءبىلىمىمىزدى تەرەڭدەتۋگە كومەكتەسەدى», دەدى ول.
ءامىردىڭ ەسەپتەۋىنشە, ءبىر عانا «ChatGPT» سۇرانىسى «Google» ىزدەۋ سۇرانىسىمەن سالىستىرعاندا 10 ەسە كوپ ەنەرگيا تۇتىنادى ەكەن. (شامامەن 0.0029 كۆت/ساع). ونىڭ ايتۋىنشا, الەم بويىنشا اپتاسىنا 500 ميلليوننان استام ادام جي چات-بوتتارىن پايدالانادى. ال ولاردىڭ 78 پايىزى ءوز سۇراۋلارىنا «راحمەت», «وتىنەمىن» سياقتى قاراپايىم سوزدەردى قوسادى. ناتيجەسىندە, تەك وسىنداي سوزدەرگە «OpenAI» اپتاسىنا 3,5 ميلليون گاللون (13 ميلليون ليتر) سۋ, 600 000 كۆت/ساع ەلەكتر ەنەرگيا جۇمسايدى. بۇل كومپانياعا اپتاسىنا 1,6 ميلليون دوللار شىعىن كەلتىرەدى.
ونىڭ بۇل زەرتتەۋىنە «Digital Society» ءپانىنىڭ مۇعالىمى رابيا جەكسەمباەۆا جەتەكشىلىك ەتىپ, عىلىمي ءستيلى مەن قۇرىلىمىنا كومەكتەسكەن. مۇنداي جۇمىس جي-ءدىڭ ەكولوگيالىق ىزىنە عانا ەمەس, سونىمەن بىرگە ەلىمىزدەگى دەرەك ورتالىعىنىڭ بولاشاق دامۋىنا دا اسەر ەتۋى مۇمكىن. جاس زەرتتەۋشى بىزبەن اڭگىمەسىندە ەلىمىزدەگى ەلەكتر ەنەرگياسىنىڭ باسىم بولىگى تابيعي رەسۋرستاردى جاعۋ ارقىلى وندىرىلەتىنىن ايتتى. سوندىقتان ەكولوگيالىق جانە رەسۋرستىق تيىمدىلىك وزەكتى ماسەلە رەتىندە قاراستىرىلۋعا ءتيىس دەيدى.
ەندى ءامىر ءوز زەرتتەۋىن «OpenAI» كومپانياسىنا جىبەرۋدى جوسپارلاپ وتىر. سونداي-اق بۇل ەڭبەگىن اقش ۋنيۆەرسيتەتتەرىنە ءوتىنىم بەرۋ بارىسىندا پورتفوليوسىنا دا قوسپاق. بولاشاقتا تالاپتى جاس ەلىمىزدەگى دەرەك ورتالىعىن سالۋ جۇمىسىنا قاتىسىپ, سول سالادا ەڭبەك ەتكىسى كەلەدى.
«مەنىڭ ماقساتىم – ەلىمىزدەگى دەرەك ورتالىعىنىڭ جۇمىس ىستەۋ قاعيداسىن وزگەرتىپ, سۋ مەن ەلەكتر ەنەرگياسىن از تۇتىناتىن, بىراق تيىمدىلىگى مەن فۋنكتسيونالدىعى تومەندەمەيتىن جۇيە قۇرۋ», دەيدى ول.
