ەۆاكۋاتسيا ءوڭىردىڭ دوستاس مەملەكەتتەرىنىڭ اۋماقتارى ارقىلى ترانزيتپەن جۇزەگە اسىرىلدى. اتاپ ايتقاندا, 89 ادام يراننان تۇرىكمەنستان ارقىلى جانە 20 ادام ازەربايجان ارقىلى ءوتتى. بارلىق ازاماتقا كونسۋلدىق-قۇقىقتىق كومەك كورسەتىلدى جانە وتانعا ورالۋ ءۇشىن قاجەتتى جاعداي جاسالدى.
سىرتقى ىستەر مينيسترلىگى يران, تۇرىكمەنستان جانە ازەربايجان بيلىگىنە وتانداستارىمىز بۇكىل باعىتى بويىنشا قاۋىپسىز جانە ۋاقتىلى ءوتۋىن قامتاماسىز ەتۋدە ماڭىزدى ءرول اتقارعان كومەك پەن ناتيجەلى ءوزارا ءىس-قيمىل كورسەتكەنى ءۇشىن ريزاشىلىعىن بىلدىرەدى.
ەۆاكۋاتسيالىق ءىس-شارالاردى دايىنداۋ جانە وتكىزۋ بارىسىندا ەل ديپلوماتتارى تاۋلىك بويى جەرگىلىكتى بيلىكپەن ءىس-قيمىلدى ۇيلەستىرىپ, مارشرۋتتاردىڭ لوگيستيكاسىن قامتاماسىز ەتتى, سونداي-اق قۇزىرەتتى ورگاندارمەن ءوزارا ءىس-قيمىل جاسادى جانە وتانداستارىمىزعا قاجەتتى قولداۋ كورسەتتى.
قىسقا مەرزىمدە 200-دەن اسا ازاماتىمىز حابارلاسىپ, ولارعا كومەك كورسەتىلدى. يرانداعى بارلىق ەل ازاماتتارىمەن ۇزدىكسىز بايلانىس ورناتىلىپ, ولاردىڭ الدىن الا كەلىسىلگەن ترانزيتتىك باعىتتارى بويىنشا ءجۇرىپ-تۇرۋى ۇيىمداستىرىلدى.
وتانداستارىمىزدى ەلگە قايتارۋ بويىنشا جۇمىس ءالى دە جالعاسادى. سونداي-اق قازىرگى ۋاقىتتا ءسىم باسقا قۇزىرەتتى ۆەدومستۆولارمەن بىرلەسىپ ەل ازاماتتارىن يزرايل مەملەكەتىنەن ەۆاكۋاتسيالاۋدى پىسىقتاپ جاتىر. شەتەلدەگى ازاماتتارىمىزدىڭ قۇقىعى, قاۋىپسىزدىگى مەن اماندىعى – ەلىمىزدىڭ سىرتقى ساياسي باعىتىنىڭ اسا ماڭىزدى باسىمدىعى.
وسىدان بىرەر كۇن بۇرىن سىرتقى ىستەر مينيسترلىگى تاياۋ شىعىس وڭىرىندەگى قاۋىپتى اسكەري شيەلەنىسكە بايلانىستى ءوز الاڭداۋشىلىعىن ءبىلدىرىپ, ەلدىڭ يزرايل مەملەكەتىندەگى ەلشىلىگى سول ايماقتاعى وتانداستار ءۇشىن جەدەل جەلى تەلەفون نومىرلەرىن جاريالادى.
«تاياۋ شىعىستاعى جاعدايدىڭ ۋشىعۋىنا بايلانىستى ەلىمىزدىڭ تەل-اۆيۆتەگى ەلشىلىگى يزرايلدەگى بارلىق ازاماتتارىمىزعا تىل قولباسشىلىعىنىڭ نۇسقاۋلارىن (https://www.oref.org.il/ru)
ساقتاۋعا, قاۋىپسىزدىك شارالارىن بارىنشا كۇشەيتۋدى, ساقتىق پەن قىراعىلىق تانىتۋدى, سوڭعى جاڭالىقتاردى قاداعالاۋدى, سونداي-اق قازاقستان ەلشىلىگىمەن بايلانىستا بولۋدى سۇرايدى», دەلىنگەن حابارلامادا.
