2027 جىلعى وسىناۋ مەرەيتويعا وراي, قازاقستان كورەيلەرى قاۋىمداستىعى ىرگەتاسى قالانىپ جاتقان جاڭا الاتاۋ قالاسىنان K-PARK اتتى مادەني-ىسكەرلىك ورتالىعىن قۇرۋعا مۇرىندىق بولىپ وتىر. وسىناۋ ورتالىق, ەڭسەسى بولەك عيمارات تاۋقىمەتتى جىلداردان تابىسقا تولى بۇگىنگە, قازىرگى زاماننان يننوۆاتسيالىق بولاشاققا قادام باسقان ەلىمىزدىڭ كوپەتنوستى حالقىنىڭ باقۋات ءومىرىنىڭ رامىزىنە اينالادى.
اقيقاتىندا, ەلىمىزدەگى كورەيلەر تاريحى – اۋىرتپالىقتىڭ, تابىس پەن العىستىڭ شەجىرەسى ىسپەتتى. جەر اۋدارىلعان كورەيلەر – قازاقتىڭ كەڭ پەيىلى, قوناقجايلىلىعى, شىنايى جاناشىرلىعى ارقاسىندا وسى ەلدەن تولىق باقىتىن تاپقانىن ايتۋدان تانباي كەلە جاتقان حالىق. بۇل باۋىرمالدىقتىڭ وتەۋى رەتىندە كورەيلەر تاريحتىڭ بارلىق كەزەڭىندە قازاقستاننىڭ يگىلىگى ءۇشىن ايانباي ەڭبەك ەتىپ كەلەدى. مىسالى, كەشەگى كەڭەس داۋىرىندە 67 كورەيدىڭ سوتسياليستىك ەڭبەك ەرى اتانعانى, تاۋەلسىزدىك جىلدارىندا ەل دامۋىنا ۇلەس قوسقان قانشاما كورەيدىڭ مەملەكەتتىك ماراپات العانى – سونىڭ ايعاعى. ەلىمىزدىڭ ءتۇرلى قالالارى مەن اۋىلدارىندا 36 كوشە كورەي حالقىنىڭ كورنەكتى تۇلعالارىنىڭ اتىمەن اتالىپ,
22 مەموريالدىق تاقتا قويىلدى.
جاقسىلىقتى ۇمىتپايتىن حالىقتىڭ قيىن كۇندەردە پانا بولعان قازاقتارعا العىسى – جادىندا ماڭگىلىككە جازىلعان ۇجىمدىق ەستەلىك. ەندىگى جەردە ەلىمىزدەگى كورەيلەر التىن كوپىر مىندەتىن اتقارىپ, قازاقستان مەن كورەيا رەسپۋبليكاسى اراسىنداعى تابىستى ىنتىماقتاستىقتىڭ بار الەۋەتىن پايدالانىپ وتىر. قازىرگى تاڭدا قازاقستان كورەيلەرى ەلدىڭ ساياسي جانە ەكونوميكالىق ومىرىنە بەلسەنە ارالاسادى, ورتاق مۇددەلەردەن قالىس قالىپ كورگەن جەرى جوق. ال مۇنىڭ ناقتى دالەلى جوعارىدا اتاپ وتكەن – K-PARK كەشەنى.
جاسامپازدىق اۋماعى اتانعان جوبا جۇرتتى جۇمىلدىرىپ, مادەني ارالاس-قۇرالاستىق ءۇشىن جاڭا مۇمكىندىكتەر تۋدىرىپ, ەكونوميكانى قولداپ, حالىق اراسىندا ءوزارا تۇسىنىستىكتى بەكەمدەۋدى مۇرات تۇتادى. وسىلايشا, K-PARK ەلىمىزدە مادەنيەت, بيزنەس, ءبىلىم مەن يننوۆاتسيالار ورتالىعىنا اينالماق. بۇل قازاق جانە كورەي داستۇرلەرىنىڭ توعىسقان, ءبىرىن-ءبىرى تولىقتىرىپ, جاڭا مۇمكىندىكتەر اشاتىن ورىن بولادى. ءارى مۇنى شىعارماشىلىق پەن ىنتىماقتاستىققا ارنالعان كەڭىستىك, ورتاق تاريحىمىزدى دارىپتەيتىن, ەلىمىزدىڭ دامۋىنا باستايتىن مادەني جانە بيزنەس جوبالار پايدا بولاتىن شاڭىراق دەسەك تە بولادى. وسى جوبانى جۇزەگە اسىرۋ ارقىلى قازاقستان كورەيلەرى بەرەكەلى قازاق جەرىنەن مەكەن تاۋىپ, وركەندەپ, كوپەتنوستى حالىقتىڭ لايىقتى وكىلدەرى ەكەنىن تاعى دا كورسەتپەك.
K-PARK-تىڭ تاعى ءبىر توقتالا كەتەتىن تۇسى ءارى باستى نىشانى – بۇل جەرگە تۋريستەردى تارتۋعا سەپتىگى تيەتىن ەتنواۋىل سالىنادى. ونىڭ اۋماعىندا كورەيلەر العاش كوشىپ كەلگەن جىلداردا تۇرعان جەر ۇيلەر ورناتىلىپ, جانىنا قازاقتاردىڭ دەپورتاتسيالانعان كورەيلەردى باۋىرىنا باسقان كەزەڭدى ەسكە سالاتىن كيىز ۇيلەر تىگىلەدى.
ەگەر ءتۋريزمنىڭ اجىراماس ءبىر بولشەگى – ۇلتتار اسحاناسى ەكەنىن ايتساق, ەتنواۋىل اۋماعىندا ءداستۇرلى قازاق جانە كورەي تاعامدارى دايىندالادى. البەتتە, بۇل باستامانىڭ بارشاسى قوسىمشا جۇمىس ورىندارىن قۇرۋعا جول اشاتىنى ءسوزسىز. جەرگىلىكتى حالىق تا ۇلتتىق كادەسىي مەن باسقا دا تابارىكتەرىن ساۋدالاپ, تۋريستەرگە قىزمەت كورسەتەدى. مىسالى, قۇسبەگىلىك, اتپەن سەرۋەندەۋ سىندى جەرگىلىكتى قىزمەت تۇرلەرى الىس-الىس ەلدەردەن كەلگەن ساياحاتشىلارعا ۇنايتىنى داۋسىز. قوناقتار ءداستۇرلى قازاق تاعامدارىن دايىنداۋ ساتتەرىنە قاتىسىپ, سول جەردە ازىرلەنگەن استان بىردەن اۋىز ءتيىپ, ساتىپ الا الادى.
سول سياقتى K-PARK اۋماعىندا ءداستۇرلى قولونەر جانە شەبەرلىك دارىستەرى وتەتىن ايماق ورنالاستىرىلماق. بۇل جەردە تۋريستەر قىشتان, ماتا مەن قاعازدان جاسالاتىن ءداستۇرلى قازاق جانە كورەي بۇيىمدارىن جاساۋعا قاتىسا الادى.
جالپى, جوبانىڭ باستى مىندەتى – ايماقتىڭ نەگىزگى باسىمدىقتارىنا سايكەس تۇراقتى الەۋمەتتىك-ەكونوميكالىق دامۋىن قامتاماسىز ەتەتىن حالىقارالىق تانىمالدىلىققا يە بىرەگەي مادەني-ىسكەرلىك ورتالىق قۇردى. سول سياقتى زاماناۋي تەحنولوگيالار ارقىلى مادەني مۇرانى ساقتاۋدى, حالىقارالىق مادەني ءىس-شارالار ارقىلى تۋريستەردى تارتىپ, قازاق جەرىن مەكەندەيتىن ەتنوستاردىڭ ەرەكشەلىگىمەن تانىستىرۋدى كوزدەيدى.
10 گەكتارداي جەردى الاتىن K-PARK ورتالىعى الاتاۋدا بوي كوتەرەدى. جالپى اۋماعى 89 مىڭ گەكتاردى قۇرايتىن جاڭا شاھار پرەزيدەنت جارلىعىنا سايكەس, الاتاۋ قالاسى الماتى وبلىسىنىڭ ىلە اۋدانىنداعى جەتىگەن اۋىلىنىڭ نەگىزىندە سالىنىپ جاتىر. بۇل مەكەن ەلىمىزدىڭ ەڭ ءىرى قالاسى – الماتى ماڭىندا جانە رەسپۋبليكالىق ماڭىزى بار ا-3 اۆتوموبيل جولىنىڭ بويىندا ورنالاسقاندىقتان كولىك قاتىناسىن وڭايلاتادى.
مادەني-ىسكەرلىك ورتالىقتىڭ اشىلۋى 2027 جىلدىڭ قازان ايىنا, كورەيلەردىڭ قازاقستاندا تۇرىپ جاتقانىنا 90 جىل تولۋ قارساڭىنا مەجەلەنگەن. حالىقارالىق جانە رەسپۋبليكالىق دەڭگەيدەگى اۋقىمدى جوبا قازاقستان حالقى اسسامبلەياسىنىڭ قولداۋىمەن جۇزەگە اسادى. قازاقستان كورەيلەر قاۋىمداستىعى وسى جوبانى جۇزەگە اسىرۋدى تولىقتاي ءوز موينىنا الىپ وتىر. جوبانى قارجىلاندىرۋ وتاندىق, شەتەلدىك سەرىكتەستەردىڭ دەمەۋشىلىگىمەن, گرانتتار مەن قايىرىمدىلىقتارعا قوسا, بيزنەس-جوبالارعا قاتىسۋ ارقىلى جۇرگىزىلەدى.
الماتى
