سۋرەتتى تۇسىرگەن – جۇماباي مۇسابەك
الەمدىك ءھام ۇلتتىق تانىمدى ۇشتاستىراتىن جاس بۋىندى تاربيەلەۋ – بۇگىنگى كۇننىڭ تالابى. وسى ماقساتتا قۇرىلعان ادەبي مەكتەپ – جاس ۇرپاقتىڭ جازۋعا دەگەن ىنتاسىن وياتىپ, ءسوز قۇدىرەتىن تەرەڭ سەزىنۋگە باۋليدى. باستى مۇرات – سوزگە ادال, ويعا جۇيرىك, جۇرەككە جاقىن ۇرپاق قالىپتاستىرۋ.
وسىدان 3 اي بۇرىن «قۇرمەت» وردەنىنىڭ يەگەرى, ء«Jetىsý» گازەتىنىڭ باس رەداكتورى جۇماتاي وسپان ۇلى باستاعان جەتىسۋلىق قالامگەرلەردىڭ رۋحاني جوباسى ساناۋلى ۋاقىتتا تالاي جاس جۇرەكتىڭ شامىن جاقتى. وبلىس اكىمدىگى جانە مادەنيەت, ءبىلىم باسقارمالارىنىڭ قولداۋىمەن جۇزەگە اسقان جوبا كوكتەمدە جەتىسۋ جەرىندەگى وسكەلەڭ ۇرپاقتى ادەبيەتكە تارتتى, كىتاپ وقۋعا دەگەن ىنتالارىن وياتىپ, ولەڭ, ەسسە جازۋعا شىڭدادى. وسىلايشا باستاپقىدا 200 بالا وقىتىپ, اراسىنان تىم بولماسا, 20 جاس تالانتتى تاۋىپ, قاناتتاندىرساق دەپ جوسپارلاعان جوبانىڭ قورىتىندى كەشىندە 100-گە جۋىق بالا بەلسەندىلىك تانىتتى.
ءيا, قازاق حالقىنىڭ باي ادەبيەتىمەن وتىققان, رۋحاني ۋىزعا قانىپ وسكەن ۇرپاقتىڭ بولاشاعى جارقىن بولماق. اسىرەسە, ەلجاندىلىق پەن وتانسۇيگىشتىك قاسيەتتى ءجيى ۇران ەتكەن بۇگىنگى ۋاقىتتا ءاربىر جاستى تۇلعا ەتىپ قالىپتاستىرۋدىڭ ەڭ ءتيىمدى جولى – ولارعا ادەبيەتى مەن تاريحىن تانىتۋ. وسىلاي ويى اشىق, ساناسى سەرگەك بۋىن تاربيەلەۋگە بولادى. ەل مۇراتىنا مۇرىندىق بولار ىزگىلىكتى ىسكە ارنا تارتقان «ميزام» جىلجىمالى ادەبيەت مەكتەبىنىڭ ۇستازدارى 3 اي كولەمىندە اۋىل-اۋىلداردى ارالاپ, ءار وڭىردە اپتا بويى جاس تالانتتارعا ءدارىس بەردى. وسىلايشا, كەۋدەسىندە قوزداپ جاتقان دارىن شوعىن ۇرلەپ, جالىنعا اينالدىرعانداي جاس وسكىننىڭ جانارىنا وت, جىگەرىنە سەرپىن بەرگەن «ميزام» جوباسى مارەسىنە جەتتى.
العاشقى كەزەڭدە كوزدەگەن ماقساتتان بيىك ناتيجە كورسەتكەن جوبانىڭ اۋقىمى كەڭەيۋى مۇمكىن. ويتكەنى اتالعان جىلجىمالى ادەبيەت مەكتەبىنە ەلىمىزدىڭ باتىس قازاقستان, شىعىس قازاقستان, جامبىل وبلىستارى دا ىنتا تانىتىپ وتىر.
وبلىس ورتالىعىنداعى وقۋشىلار سارايىندا ورنەك تاپقان قورىتىندى كەشتىڭ العاشقى بولىمىندە 8 اۋدان, 2 قالادان ارنايى كەلگەن شاكىرتتەر مەن ولاردىڭ جەتەكشىلەرىن قارسى الۋ سالتاناتى ۇيىمداستىرىلدى. جازۋ شەبەرلىگى مەن كىتاپ وقۋ مادەنيەتى بويىنشا ءتالىم العان 200-دەن استام وقۋشىنىڭ فينالدىق كەزەڭگە جولداما العان 100-ءى قىزىل كىلەممەن ءجۇرىپ ءوتىپ, وقۋشىلار سارايىنا ەندى. وندا بۇگىندە ۇلت ادەبيەتىنە ءوزىنىڭ كەسەك-كەسەك, شىرايلى تۋىندىلارى ارقىلى ولجا سالىپ, ەل ءسۇيىپ وقيتىن اۆتورعا اينالعان ەسبولات ايدابوسىن, قانات تىلەۋحان, ەرعالي باقاش سىندى اقىن-جازۋشىلاردان قولتاڭبا الۋ ءراسىمى ءوتتى. اقتىق سىنعا كەلگەن 100 وقۋشى «ميزام» جىلجىمالى ادەبيەت مەكتەبى سىيلاعان 100 كىتاپقا قولتاڭبا قويىلدى.
قورىتىندى كەشتىڭ كەلەسى بولىمىندە ادەبيەت بايقاۋلارىندا توپ جارعان, ەلگە ەسىمى تانىلعان ەسبولات ايدابوسىن, ەرعالي باقاش, قانات تىلەۋحان سىندى اقىن-جازۋشىلار «ميزام» مەكتەبى سارالاعان وقۋشىلارمەن كەزدەستى. سۇراق-جاۋاپ فورماتىندا وتكەن كەزدەسۋ بارىسىندا ءار شاكىرت ءوزىن تولعاندىرعان ساۋالداردى قويدى. ادەبيەت, مادەنيەت, قوعام مەن زامان, قۇندىلىقتار, ادام باقىتى, ارمانى قۇنسىزدانعان ۋاقىتتاعى ماسەلەلەر دە سۇراق بولىپ جاۋدى.
جازۋشى قانات تىلەۋحان «مەدال» شىعارماسى حاقىندا قويىلعان بىرنەشە ساۋال توڭىرەگىندە ءوز ويىن ايتىپ: «قاندايدا ءبىر ەڭبەك لايىقتى باعاسىن الۋى كەرەك, دەگەنمەن كەيبىر اتاق پەن قۇرمەت ادامداردى قۇردىمعا, قۇلدىراۋعا الىپ بارادى. رەجيسسەر بولات اتاباەۆ «اتاق مەنىڭ تالانتىما تالانت قوسىپ بەرمەيدى» دەگەن ەدى. ءارى ول كىسى جوعارى ماراپات پەن اتاقتاردان سانالى تۇردە باس تارتتى», دەپ تولعاندى.
وسىلايشا, اقىن-جازۋشىلاردىڭ شىعارماسىنان ءوزىن تولعاندىرعان تۇسىن سۇراپ, سان ءتۇرلى تاقىرىپ تالقىعا تۇسكەن كەشتە «ميزام» مەكتەبىنىڭ شاكىرتتەرى كوپتى العىرلىعىمەن قۋانتتى. ءمىردىڭ وعىنداي ساۋالدار قويدى. ۇلتتىق تۇرعىدا تولعاندىرار تاقىرىپتارعا باستار سان ساۋالعا جاۋاپ ىزدەدى. يگىلىكتى شارانىڭ نەگىزگى بولىمىندە جۇماتاي وسپان ۇلى «ميزام» جىلجىمالى ادەبي مەكتەبىنىڭ جۇمىسىنا از-كەم توقتالىپ ءوتتى. ارنايى دايىندالعان بەينەروليك كورسەتىلدى.
قازاقتىڭ كورنەكتى اقىندارى, قازاقستاننىڭ قۇرمەتتى جازۋشىسى امىرە ءارىن, ءنۇسىپباي ءابدىراحىم باستاعان زيالى قاۋىم وكىلدەرى مەن ءىس-شارانىڭ قادىرمەندى مەيماندارى فينالدىق كەزەڭگە جولداما العان 100 وقۋشىنىڭ اراسىنان ۇزدىك تانىلعان 15 وقۋشىنى ماراپاتتادى. ۇزدىك 15 شاكىرت ساپىنان تانىلعان جاس ساڭلاقتار «ميزام» مەكتەبىنىڭ العىس حاتىمەن, 50 مىڭ تەڭگەلىك سەرتيفيكاتپەن ماراپاتتالدى.
جەتىسۋ وبلىسى
