فوتو: اشىق دەرەككوز
«بۇل – «قولجەتىمدى ينتەرنەت» ۇلتتىق جوباسىنىڭ ءبىر بولىگى. جوبا ەكى جارىم ميلليون ادامدى قامتيدى. كەيبىر اۋىلداردا ينتەرنەت بار, بىراق ونىڭ ساپاسى جەتكىلىكسىز. سەبەبى ۇيلەردە قۇرىلعىلار كوبەيىپ, ينتەرنەتكە سۇرانىس ءوسىپ جاتىر», دەدى ەكاتەرينا سمىشلياەۆا.
دەپۋتاتتىڭ ايتۋىنشا, جوبا اياسىندا مىڭنان استام ءىرى اۋىلدا ءار ۇيگە دەيىن تالشىقتى-وپتيكالىق بايلانىس جەلىسى تارتىلادى. بۇل – «سوڭعى ميل» دەپ اتالادى. بۇل بايلانىس ءتۇرى – ەڭ جىلدام, تۇراقتى جانە قاۋىپسىز.
«ۇيلەردە سىمدى ينتەرنەت بولعان جاعدايدا, وتباسىنىڭ بايلانىسقا جۇمسايتىن شىعىنى ازايادى. اۋىلداعى ادامدار «اقىلدى» قۇرىلعىلاردى, سمارت-تەحنيكانى مەگاپوليس تۇرعىندارى سياقتى پايدالانا الادى. سونىمەن بىرگە, جەر ءۇستى جەلىلەرىن كەڭەيتۋ ارقىلى ءبىز تەك اۋىل ءومىرىن جاقسارتپايمىز, سونىمەن قاتار ەلدىڭ تەحنولوگيالىق ەگەمەندىگىن نىعايتامىز», دەدى دەپۋتات.
كەلىسىم شارتتارىنا سايكەس, قارىز جاپونيانىڭ ۇلتتىق ۆاليۋتاسى – يەنمەن بەرىلەدى. بۇل ۆاليۋتادا بازالىق مولشەرلەمە تومەن ءارى تۇراقتى. جوبانى جۇزەگە اسىرۋ مەرزىمى ناقتى كورسەتىلگەن جانە ول قارىزدى تولەۋ باستالعانعا دەيىن اياقتالۋى ءتيىس.
«جەتكىزۋشىلەردى تاڭداۋ اشىق كونكۋرس ارقىلى وتەدى. مونوپولياعا جول بەرمەۋ ءۇشىن ءبىر كومپانياعا بەرىلەتىن قارجى مولشەرى شەكتەلگەن. سونداي-اق, جەتكىزۋشىلەر تاراپىنان قوسىمشا قارجىلاندىرۋ دا قاراستىرىلعان», دەدى دەپۋتات.
سمىشلياەۆانىڭ ايتۋىنشا, بۇل زاڭ جوباسى بويىنشا جۇمىس توبى مەن كوميتەتتىڭ كەڭەيتىلگەن وتىرىسى وتكىزىلگەن, بارلىق تۇراقتى كوميتەتتەر ءوز قورىتىندىلارىن بەرگەن.
«وسىعان بايلانىستى, وسى زاڭدى قابىلداۋدى جانە ونى قازاقستان رەسپۋبليكاسى پارلامەنتىنىڭ سەناتىنا جىبەرۋدى ۇسىنامىز. قولداۋلارىڭىزدى سۇرايمىن. راقمەت», دەپ قورىتىندىلادى دەپۋتات.
