ەلىمىزدە ەلەكتر جانە جىلۋ جەلىلەرى جاڭعىرتىلادى

اتالعان باعدارلاما ماڭىزدى ينفراقۇرىلىمنىڭ توزۋىن ايتارلىقتاي تومەندەتۋگە جانە ميلليونداعان قازاقستاندىقتاردى جىلۋ جانە ەلەكتر قۋاتىمەن تۇراقتى قامتاماسىز ەتۋگە باعىتتالعان.

ايتا كەتەيىك, ەنەرگەتيكا جانە كوممۋنالدىق سەكتورلاردى جاڭعىرتۋ جونىندەگى ۇلتتىق جوبا اياسىنداعى ىرىكتەۋ ناتيجەلەرىن ەنەرگەتيكا مينيسترلىگى ەلەكتر ەنەرگەتيكاسىن دامىتۋ دەپارتامەنتىنىڭ ديرەكتورى اسىلجان مۋسين Power Central Asia + China ايماقتىق ەنەرگەتيكالىق فورۋمىندا جاريالادى.

ۇكىمەت بەكىتكەن ۇلتتىق جوبانىڭ نەگىزگى ماقساتى — ەنەرگەتيكالىق اكتيۆتەردىڭ توزۋ دەڭگەيىن 40%-عا دەيىن تومەندەتۋ ارقىلى بۇكىل جۇيەنىڭ سەنىمدىلىگىن ارتتىرۋ.

«بۇل — ءاربىر قازاقستاندىق وتباسىنىڭ جايلى ءومىرى مەن قاۋىپسىزدىگىنە, كاسىپورىندارىمىزدىڭ ءۇزىلىسسىز جۇمىسىنا جانە ەكونوميكامىزدىڭ تۇراقتى بولاشاعىنا تىكەلەي ينۆەستيتسيا. ءبىز ۇزدىك قارجى قۇرالدارىن تارتىپ, وتاندىق وندىرۋشىلەرگە باسىمدىق بەرەمىز. ءاربىر جۇمسالعان تەڭگە قازاقستاننىڭ يگىلىگىنە جۇمىس ىستەۋى ءتيىس», دەدى اسىلجان مۋسين.

ءبىرىنشى جارتىجىلدىق اياسىندا كەلەسى جوبالار ىرىكتەلدى:

• ەلەكتر جەلىلەرىن جاڭعىرتۋعا باعىتتالعان 47 جوبا – 90 ملرد تەڭگە;
• جىلۋمەن قامتاماسىز ەتۋ جۇيەلەرىن جاڭارتۋعا ارنالعان 28 جوبا – 120 ملرد تەڭگە.

جوبا اياسىندا ۇلتتىق ەكونوميكانى قولداۋعا ەرەكشە نازار اۋدارىلعان. ەلەكتر ەنەرگەتيكاسى سالاسىنداعى جاڭا وندىرىستەردى جەرگىلىكتەندىرۋ جانە وتاندىق ونىمدەردى مىندەتتى تۇردە پايدالانۋ جاڭا جۇمىس ورىندارىن قۇرۋعا جانە قازاقستاندىق بىلىكتىلىكتى دامىتۋعا مۇمكىندىك بەرەدى.

ەنەرگەتيكا مينيسترلىگى ازاماتتاردىڭ ءومىر ءسۇرۋ ساپاسىن ارتتىرۋ جانە ەلدىڭ ەنەرگەتيكالىق قاۋىپسىزدىگىن نىعايتۋ ماقساتىندا ستراتەگيالىق ماڭىزى بار نىسانداردى جۇيەلى تۇردە جاڭعىرتۋدى جالعاستىرادى.