جوباعا سايكەس, قولدانىستاعى «باۋىرجان مومىش ۇلى» ستانتسياسىنان «قالقامان» ستانتسياسىنا دەيىنگى ارالىقتاعى تۋننەلدەردىڭ ۇزىندىعى 1,98 شاقىرىم. بۇگىنگى تاڭدا سول جاق باعىتتاعى توننەل تولىق قازىلىپ بىتكەن, ال وڭ جاق باعىتتا 887 مەتر جەر قازىلعان.
«BCN group» ديرەكتورلار كەڭەسىنىڭ توراعاسى الەكساندر بەلوۆيچتىڭ مالىمەتىنشە, تۋننەل قازۋ جۇمىستارىمەن ءبىر ۋاقىتتا ستانتسيانىڭ قۇرىلىسى دا بەلسەندى تۇردە جۇرگىزىلىپ جاتىر. قازىرگى تاڭدا جەلدەتۋ ۇڭعىماسى سالىندى, قازۋ جۇمىستارى اياقتالدى, ال بەتون قۇيۋ جۇمىستارى 28 پايىزعا ورىندالدى.
«نىساندى 2026 جىلدىڭ قاڭتار ايىنا دەيىن تولىق اياقتاۋ ءۇشىن قۇرىلىس قارقىنىن ارتتىرۋ قاجەت. وسى ماقساتتا ارنايى شتاب قۇرىلاتىن بولادى. ونىڭ قۇرامىنا قالا اكىمىنىڭ سالا بويىنشا ورىنباسارى, ءتيىستى باسقارما باسشىلارى, مەردىگەر ۇيىم وكىلدەرى, سونداي-اق تەحنيكالىق جانە اۆتورلىق قاداعالاۋ ماماندارى كىرەدى. شتاب وتىرىستارىندا جۇمىستاردىڭ بارىسى اپتا سايىن تالقىلانىپ, قاتاڭ باقىلاۋدا بولادى», - دەدى الماتى اكىمى.
قۇرىلىس الاڭىندا قالا اكىمىنە مەترو جەلىسىن ءارى قاراي كەڭەيتۋ بويىنشا اتقارىلىپ جاتقان جۇمىستار تۋرالى دا باياندالدى.
الماتى قالاسى اكىمىنىڭ ورىنباسارى اسقار ءامرين «قالقامان» ستانتسياسىنان «بارلىق» بازارىنا دەيىنگى ارالىقتا تاعى ءۇش بەكەتتى قامتيتىن جاڭا باعىتتىڭ جوبالىق-سمەتالىق قۇجاتتاماسى دايىندالعانىن جەتكىزدى. جوبانى قۇرىلىس باستالعان ساتتەن باستاپ ءۇش جىل ىشىندە جۇزەگە اسىرۋ جوسپارلانىپ وتىر.
سونىمەن قاتار «جىبەك جولى» ستانتسياسىنان حالىقارالىق اۋەجايعا دەيىنگى ەكىنشى جەلىنىڭ تەحنيكالىق-ەكونوميكالىق نەگىزدەمەسى ازىرلەنۋدە. ال «سايران» ستانتسياسىنان الاتاۋ قالاسىنا دەيىنگى ءۇشىنشى جەلىنىڭ تەن جوباسىن ازىرلەۋگە بايقاۋ جاريالانعان.
ء«بىز «بارلىققا» دەيىنگى جەلى قۇرىلىسىن كۇتىپ وتىرماي, مەترونىڭ تاعى ەكى جەلىسىنىڭ قۇرىلىسىن قاتارىنان باستاۋدى قاراستىرۋىمىز كەرەك. ياعني, ءۇش جىل كۇتپەي, بارلىق جەلى بويىنشا جۇمىس قاتار ءجۇرۋى ءتيىس. جالپى, مەترو – الماتى قالاسىنىڭ كولىك جۇيەسىنىڭ ماڭىزدى ەلەمەنتى. ول قالا تۇرعىندارىنىڭ قوزعالىسىن جەڭىلدەتىپ, كۇن سايىن قالا جولدارىمەن جۇرەتىن كولىك سانىن ازايتۋعا مۇمكىندىك بەرەدى. سوندىقتان مەتروپوليتەندى دامىتۋعا ەرەكشە نازار اۋدارىلاتىن بولادى», - دەپ اتاپ ءوتتى دارحان ساتىبالدى.
