كۋرستاردى اياقتاعان سوڭ 83 قازاقستاندىق تۇراقتى جۇمىسقا ورنالاستى. قىزىلوردا قالاسىنىڭ تۇرعىنى, التى بالانىڭ اناسى زۋحرا مىرزاحمەتوۆا ءوزىنىڭ تابىس تاريحىمەن ءبولىستى.
2006 جىلى قورقىت اتا اتىنداعى قىزىلوردا ۋنيۆەرسيتەتىن «باستاۋىش ءبىلىم بەرۋدىڭ ينفورماتيكا مۇعالىمى» ماماندىعى بويىنشا تامامداعان, بىراق ءوز ماماندىعىمەن جۇمىس ىستەمەگەن.
«كىشى قىزىم 5-كە تولعاندا مەن بەلسەندى تۇردە جۇمىس ىزدەي باستادىم. 7 اي بويى ىزدەنىسىمنەن ناتيجە شىقپادى, اقىرى جاڭا ماماندىقتى يگەرۋگە بەل بۋدىم. وسى ماقساتتا 2024 جىلدىڭ قىركۇيەگىندە مەن ءبىزدىڭ مانساپ ورتالىعىنا حابارلاستىم, وندا ماعان قىسقا مەرزىمدى كاسىپتىك وقىتۋ كۋرستارىنان ءوتۋدى ۇسىندى», – دەدى زۋحرا مىرزاحمەتوۆا.
زۋحرا ءۇي شارۋاسىنان بوس ۋاقىتىن بالالارىنا مەرەكەلىك كيىمدەر, توسەك-ورىن, پەردە, داستارحان تىگىپ وتكىزەتىن بولعان, سول سەبەپتى تىگىنشىلىك كۋرستارىن تاڭداپتى.
«مانساپ ورتالىعى ماعان «كەرىم سۇلۋ-Qyzylorda» جك جۇمىس بەرۋشىنىڭ جۇمىس ورنىندا كاسىپتىك وقۋعا جولداما بەردى», – دەيدى كوپبالالى انا.
ءۇش اي وقىپ, كۋرستى اياقتاعان كوپبالالى انا «كەرىم سۇلۋ-Qyzylorda» جك تۇراقتى قىزمەتكەرى بولىپ جۇمىسقا قابىلداندى.
«جۇمىس بەرۋشى مانساپ ورتالىعى ارقىلى ءوتىنىش بىلدىرگەن جۇمىسسىز ادامدى ۋاقىتشا جۇمىسقا قابىلدايدى, ونىمەن ەڭبەك شارتىن جاسايدى جانە تاجىريبەلى جۇمىسشىلار اراسىنان تالىمگەردى تاعايىنداي وتىرىپ, تاجىريبەلىك ساباقتاردى وتكىزەدى. وقۋدى اياقتاعان سوڭ جۇمىس بەرۋشى جۇمىسسىز ادامدى تۇراقتى جۇمىسقا اۋىستىرادى.
وقىتۋ كەزەڭىندە كاسىپتىك ءبىلىم الۋشىنىڭ ەڭبەكاقىسىن جەرگىلىكتى بيۋدجەت ەسەبىنەن ەڭبەك رەسۋرستارىنىڭ ۇتقىرلىعى ورتالىعى تولەيدى. ايلىق جالاقىسى 20 اەك قۇرايدى», – دەپ حابارلادى قر ەحاقم حالىقتى جۇمىسپەن قامتۋ دەپارتامەنتىنىڭ باسشىسى اياۋلىم بەرەكەنوۆا.
وبلىستىق ەسەپپەن العاندا وقۋعا جىبەرىلگەندەردىڭ ەڭ كوپ سانى الماتى وبلىسىندا – 305 ادام, جامبىل وبلىسىندا – 210 ادام, قاراعاندى وبلىسىندا – 201 جانە جەتىسۋ وبلىسىندا – 195 ادام تىركەلدى.
ستۋدەنتتەر اراسىندا سۇرانىسقا يە ماماندىقتار: تىگىنشى – 450 ادام, اسپاز – 219 ادام, شاشتاراز – 141 ادام, تراكتورشى-ماشينيست – 100 ادام, ەلەكتر جانە گازبەن دانەكەرلەۋشى – 60 ادام.
