ءاسىرەسە قاۋىپ-قاتەر جاعدايىندا – اسكەري ءىس-قيمىلداردا, توتەنشە جاعدايلاردا جانە لاڭكەستىككە قارسى وپەراتسيالاردا مەديتسينالىق كومەك كورسەتەتىندەر ءۇشىن ەرەكشە مانگە يە. سول سەبەپتى ۇلتتىق ۇلان قۇرىلىمىندا 2025 جىلعى ماڭىزدى باستامانىڭ ءبىرى – تاكتيكالىق مەديتسينا قىزمەتىن قۇرۋ بولدى.
تاكتيكالىق مەديتسينا – شۇعىل جاعدايلاردا, ساناۋلى مينۋتتار شەشۋشى ءرول اتقاراتىن كەزدە, ءداستۇرلى ازاماتتىق مەديتسينانىڭ تاسىلدەرى ءتيىمسىز بولاتىن ساتتەردە كومەك كورسەتۋ جۇيەسى. جالپىعا ءمالىم, ءىىم ۇلتتىق ۇلانىنىڭ اسكەري قىزمەتشىلەرى قوعامدىق قاۋىپسىزدىكتى قامتاماسىز ەتۋگە, ارنايى وپەراتسيالارعا, لاڭكەستىككە قارسى ءىس-شارالارعا, تابيعي اپاتتار مەن توتەنشە جاعدايلاردىڭ سالدارىن جويۋعا قاتىسادى. مۇنداي جاعدايدا كاسىبي مەديتسينا ماماندارى كەلگەنگە دەيىن العاشقى مەديتسينالىق كومەكتى جەدەل ءارى ساۋاتتى كورسەتە ءبىلۋ اسا ماڭىزدى.
ۇلتتىق ۇلاندا تاكتيكالىق مەديتسينالىق دايىندىق Tactical Combat Casualty Care (TCCC) حالىقارالىق ستاندارتى بويىنشا جۇرگىزىلەدى. بۇل – ۇرىس جاعدايىندا جاراقات العاندارعا كومەك كورسەتۋ حاتتاماسى. ول قۇقىقتىق ءتارتىپ اسكەرلەرىنىڭ مىندەتتەرىنە بەيىمدەلگەن جانە ءۇش نەگىزگى كەزەڭنەن تۇرادى:
Care Under Fire – وق استىندا كومەك كورسەتۋ (قان توقتاتاتىن تاڭعىشتار سالۋ, قاۋىپسىزدىكتى قامتاماسىز ەتۋ);
Tactical Field Care – دالا جاعدايىندا كومەك كورسەتۋ (قان كەتۋدى توقتاتۋ, تىنىس الۋدى قالپىنا كەلتىرۋ, جاعدايدى تۇراقتاندىرۋ);
Tactical Evacuation Care – ەۆاكۋاتسيا كەزىندە كومەك (مەديتسينالىق مەكەمەگە دەيىن سۇيەمەلدەۋ جانە كومەك كورسەتۋ).
وقىتۋ ارنايى وقۋ ورتالىقتارىندا وتكىزىلەدى. باعدارلاما تەوريالىق ساباقتارمەن قاتار, جاۋىنگەرلىك جاراقاتتار مەن توتەنشە جاعداي ستسەناريلەرىن ناقتى مودەلدەيتىن زاماناۋي ترەناجەرلاردا پراكتيكالىق جاتتىعۋلاردى قامتيدى.
تاكتيكالىق مەديتسينالىق دايىندىق – ءبىر رەتتىك شارا ەمەس, ول قۇقىقتىق ءتارتىپ اسكەرىن جاڭعىرتۋعا باعىتتالعان ۇزاقمەرزىمدى ستراتەگيالىق قادام. ونىڭ ماقساتى – اسكەري بولىمدەردىڭ جاۋىنگەرلىك قابىلەتىن ارتتىرۋ, جەكە قۇرام اراسىنداعى ادام شىعىنىن ازايتۋ جانە اسكەري ورتادا مەديتسينالىق ساۋاتتىلىق مادەنيەتىن قالىپتاستىرۋ.
بۇعان قوسا, ءىىم ۇلتتىق ۇلانىنىڭ پاترۋلدىك قىزمەت اتقاراتىن اسكەري قىزمەتشىلەرىنىڭ ارقايسىسى العاشقى مەديتسينالىق كومەكتىڭ بازالىق داعدىلارىنا ۇيرەتىلەدى. بۇل جاۋىنگەر جاراقات العان ساتتە نەمەسە بەيبىت تۇرعىن زارداپ شەككەن جاعدايدا, كاسىبي مەديتسينا ماماندارى كەلگەنگە دەيىن دۇرىس ارەكەت ەتە ءبىلۋ ءۇشىن قاجەت.
تاكتيكالىق مەديتسينا نۇسقاۋشىلارى وقۋ-جاتتىعۋ ساباقتارىن ۇنەمى وتكىزىپ تۇرادى, ونىڭ ىشىندە شىنايى جاعدايعا بارىنشا جاقىن ورتادا دالالىق جاتتىعۋلار ۇيىمداستىرىلادى. بۇل –اسكەري قىزمەتشىلەردىڭ كۇيزەلىسكە توزىمدىلىگىن ارتتىرىپ, ءوزىنىڭ نە وزگەنءىڭ ومىرىنە تونگەن قاۋىپكە شۇعىل ارەكەت ەتۋدى ۇيرەنۋگە مۇمكىندىك بەرەدى.
