تاگير 33 جاستا. ول داعىستاننىڭ قازبەك اۋدانىندا تۋدى. ۇلتى – اۆار. بوزبالا شاعىنان جاۋىنگەرلىك سامبومەن شۇعىلدانعان ۇلانبەكوۆتىڭ الەم چەمپيونى دەگەن اتاعى بار. سودان كەيىن ارالاس جەكپە-جەككە دەن قويدى. اتاعى اڭىزعا اينالعان باپكەر ابدۋلماناپ نۇرماعومەدوۆتىڭ قول استىندا جاتتىعىپ, اتاقتى حابيب نۇرماعومەدوۆ پەن يسلام ماحاچەۆ جانە تاعى باسقا ساڭلاقتارمەن ءبىر زالدا دايىندالادى. بارلىعى 19 رەت وكتاگونعا شىققان تاگير سونىڭ 17-سىندە جەڭىسكە جەتتى. 10 باسەكەدە ايقىن باسىمدىق تانىتتى. 2020 جىلدان بەرى UFC-دە ونەر كورسەتۋدە. سول پروموۋشەندەگى التى كەزدەسۋدىڭ بەسەۋىندە جەڭىسكە جەتتى. اتاپ ايتساق, برازيليالىق برۋنو سيلۆا (ۇپاي سانىمەن) پەن الان ناسيمەنتو (ۇپاي سانىمەن), امەريكالىق نەيتي ماننيس (قىلقىندىرۋ ادىسىمەن), كودي دەردەن (قىلقىندىرۋ ادىسىمەن) جانە كلەيتون كارپەنتەر (ۇپاي سانىمەن) ۇتىپ, تيم ەلليوتقا (ۇپاي سانىمەن) ەسە جىبەردى. قازىرگى كەزدە ۇلانبەكوۆ ءوز سالماعى بويىنشا UFC رەيتينگىندە 11 ورىندا تۇر.
اۆار جىگىتىنىڭ جولى قازاقتارمەن ءتورت مارتە قيىستى. 2015 جىلى بابايۋرتتە نۇرتىلەك قوناشەۆتىڭ قولىنا اۋىرتۋ ءتاسىلىن قولدانسا, 2016 جىلى دونداعى روستوۆتا شىڭعىس قايرانوۆتى ۇپاي سانىمەن ەڭسەردى. 2017 جىلى ماحاچكالادا اسۋ الماباەۆتى تەحنيكالىق نوكاۋتپەن ۇتتى. ال 2018 جىلى استانادا جالعاس جۇماعۇلوۆتان جەڭىلىپ, AMC Fight Nights Global نۇسقاسىنىڭ چەمپيوندىق اتاعىنان ايىرىلدى. سونداي-اق, 2019 جىلى ۇلانبەكوۆ اتىراۋدا وتكەن تۋرنيردە برازيليانىڭ فايتەرى دەنيس اراۋجودان ايلاسىن اسىرىپ, «Gorilla Fighting Championship» پروموۋشەنىنىڭ التىن بەلبەۋىن جەڭىپ الدى.
ازات ماقسۇم ءوز كارەراسىن قازاقتىڭ ءتول ونەرى – جەكپە-جەكتەن باستادى. 2017 جىلى تۇساۋكەسەر كەزدەسۋىن وتكىزدى. 2023 جىلعا دەيىن 17 رەت ايقاس الاڭىنا شىعىپ, بارلىق باسەكەدە ءوز قارسىلاستارىنان باسىم ءتۇستى. 12 ايقاستى مەرزىمىنەن بۇرىن اياقتادى. بىرنەشە پروموۋشەندەردىڭ چەمپيونى بولدى. 2023 جىلى UFC-مەن كەلسىمشارتقا وتىردى. سول ماۋسىمدا امەريكالىق تايسون نەمدى ۇتتى. بىراق بىلتىر اقش-تىڭ تاعى ءبىر وكىلى چارلز دجونسوننان ويدا-جوقتا جەڭىلىپ قالدى.
