ۇلتتىق قور ەسەبىنەن «تالدىقورعان – ءۇشارال» ماگيسترالدى گاز جەلىسىنىڭ قۇرىلىسىنا 131,7 ملرد تەڭگە بولىنگەن. سول ارقىلى 124 مىڭ تۇرعىنى بار اقسۋ, سارقان, الاكول اۋداندارى تابيعي گازعا قول جەتكىزەدى. قازىر گاز قۇبىرىنىڭ جەلىلىك بولىگىن سالۋ جۇمىستارى اياقتالعان. اۆتوماتتى گاز تاراتۋ ستانسالارى تۇرعىزىلىپ جاتىر. جالپى, 6 گاز قۇبىرى-بۇرماسىن جانە «جانسۇگىروۆ», «قاپال», «سارقان», «قويلىق», «قابانباي», ء«ۇشارال» – 6 اۆتوماتتى گاز تاراتۋ ستانساسىن سالۋ كوزدەلگەن.
«بۇل – مەملەكەت باسشىسىنىڭ تاپسىرماسىمەن, ۇلتتىق قوردىڭ قارجىلاي قولداۋىمەن قولعا الىنعان اۋقىمدى جوبا. وتكەن جىلى ۇكىمەت باسشىسى جەتىسۋ وبلىسىنا كەلگەندە قۇرىلىس جۇمىستارى باستالعان بولاتىن. جوبانىڭ الەۋمەتتىك ماڭىزىن ەسكەرە وتىرىپ, جۇمىستى قارقىندى جۇرگىزدىك. ناتيجەسىندە, جوبانى بەلگىلەنگەن مەرزىمىنەن ەرتەرەك اياقتايمىز دەپ جوسپارلاپ وتىرمىز. بۇل «QazaqGaz», وبلىس اكىمدىگى جانە مەردىگەر كومپانيا – ءۇش تاراپتىڭ بىرلەسكەن ۇلگىلى كوماندالىق جۇمىسىنىڭ ناتيجەسى», دەيدى وڭىرگە ساپارمەن كەلگەن «QazaqGaz» ۇك» اق باسقارما توراعاسى سانجار جاركەشوۆ.
ستانسالاردىڭ دايىندىعى وسى جىلدىڭ تامىز ايىنا جوسپارلانعان. قۇرىلىسقا 148 بىرلىك ارنايى تەحنيكا مەن 356 جۇمىسشى پەرسونال جۇمىلدىرىلدى. قۇرىلىس جۇمىستارى ەرەكشە باقىلاۋدا جانە كەستەدەن وزىپ كەلەدى.
وسى ورايدا وبلىس اكىمىنىڭ ورىنباسارى اسەت قاناعاتوۆ ەلدى مەكەندەردىڭ ىشكى جەلىلەرىن جۇرگىزۋدىڭ دايىندىق جۇمىستارى تۋرالى ايتتى.
«6 ەلدى مەكەندى بيىل, قالعان 60-ىن كەلەسى جىلى گازعا قوسامىز. سونىڭ ىشىندە اقسۋ قانت زاۋىتى دا بار. وسى شارالاردىڭ بارلىعى حالىقتىڭ تۇرمىس ساپاسىن جاقسارتۋدا, كاسىپكەرلىك پەن ءوندىرىس ورىندارىنىڭ جۇمىسى ءۇشىن ءتيىمدى. بۇل ءوڭىر ەكونوميكاسىن دامىتۋعا ۇلكەن سەرپىن بەرەدى», دەيدى وبلىس اكىمىنىڭ ورىنباسارى اسەت قاناعاتوۆ.
جەتىسۋ وبلىسىندا 192 ەلدى مەكەن گازداندىرۋعا جاتادى. وبلىس بولىنگەندە نەبارى 5 ەلدى مەكەندە عانا گاز بولسا, بۇگىندە يگىلىككە قول ىلىكتىرگەن ەلدى مەكەن سانى 84-كە جەتىپ, گازداندىرۋ دەڭگەيى 58,2% بولدى. جىل سوڭىنا دەيىن كوگىلدىر وتىن تارتىلعان ەلدى مەكەن سانىن 126-عا, گازداندىرۋ كورسەتكىشىن 71,4%-عا جەتكىزۋ جوسپارلانىپ وتىر. «تالدىقورعان – ءۇشارال» ماگيسترالدى گاز قۇبىرى قۇرىلىسىنىڭ ارقاسىندا 66 ەلدى مەكەن گازعا قوسىلىپ, 2028 جىلعا دەيىن وبلىستىڭ گازداندىرۋعا جاتاتىن 192 ەلدى مەكەنى تولىق كوگىلدىر وتىنعا قول جەتكىزبەك.
جەتىسۋ وبلىسى
