وسىنداي قوڭىرقاي تىرشىلىك كەشىپ جاتقان اۋىلدا كۇن جىلىنا سالا جوندەۋ جۇمىستارى قولعا الىندى. ءساۋىردىڭ سوڭىندا تەرىساققان – قوسكول باعىتىنداعى اۋداندىق دارەجەدەگى 45 شاقىرىمدىق تاسجولدا اعىمداعى جوندەۋ جۇمىستارى باستالدى. جول جوندەۋگە اۋداندىق بيۋدجەتتەن 52 ملن تەڭگە بولىنگەن. جاۋاپتى مەردىگەر – «Constructive Stroy KZ» جشس.
قازىر قىزۋ جۇمىس ءجۇرىپ جاتىر. نەگىزىنەن جولدىڭ الاسا بولىكتەرىن كوتەرۋ, قوسىمشا سۋاعارلار قويۋ جانە جاڭبىر كەزىندە باتپاق بولاتىن جول بولىكتەرىنە ەزىلمەيتىن ماتەريال توسەۋ جۇمىستارى جۇرگىزىلمەك. بىلتىرعى سۋ تاسقىنىندا شايىلىپ كەتكەن جەرلەردى قالپىنا كەلتىرۋ وتە ماڭىزدى.
تاۋلى ايماق بولعان سوڭ, جول جوندەۋ ماسەلەسى دە كۇردەلى. مۇندا توبىلعى ساي جانە اقتان ساي دەگەن سايلار بار. توبىلعى سايداعى ەكى سايدىڭ ورتاسى – 3 شاقىرىم, اقتان سايدىڭ اراسى – 5 شاقىرىم. وسى سايلاردى قىستا ۇنەمى قار باسىپ قالادى. سالدارىنان ەكى سايدىڭ ورتاسىندا كولىكتەر قار تۇتقىنىنا ءجيى ءتۇسىپ جاتادى. قازىر تەحنيكانىڭ ءبارى وسى جەرلەردى بيىكتەتۋ جۇمىسىنا جۇمىلدىرىلعان. ءبىر سايدىڭ وزىنە كەم دەگەندە 300 كاماز-دان ارتىق توپىراق توگىلەدى.
«كۇردەلى جەرلەرگە كوپ كوڭىل ءبولىپ جاتىرمىز. قولدانىستاعى گريدەر جولدىڭ ەنى كەي جەردە – 9 مەتر, كەي تۇسى 12 مەترگە دەيىن بارادى. گريدەر وتىرعان. ساي تەرەڭدەي بەرەدى. سونى تەڭەستىرۋگە كوپ قارجى, تەحنيكا, توپىراق كەرەك», دەيدى تەرىساققان اۋىلدىق وكرۋگىنىڭ اكىمى جانتورە عازيز ۇلى.
كوشەنى جارىقتاندىرۋ جۇمىسى دا نازاردا. وسى باعىتتا اۋىلدىڭ كىرەبەرىس جەلدىادىر, ۇلىتاۋ, شەڭبەر كوشەلەرىنە 46 دانا جارىق باعانى ورناتىلدى. اۋداندىق بيۋدجەتتەن 11 ملن تەڭگە ءبولىنىپ, بۇل جاۋاپتى جۇمىستى شىمكەنت قالاسىنىڭ «قۋانىش راي» مەردىگەرى موينىنا العان.
ۇلىتاۋ وبلىسى
