بيىل لاگەرلەرگە اعىمدىق جوندەۋ مەن ارلەۋ جۇمىستارىن جۇرگىزۋگە 393 ملن تەڭگە بولىنگەن. سونىڭ ىشىندە 368 ملن تەڭگە 5 لاگەردى جوندەۋ مەن جابدىقتاۋعا ءبولىندى. دالىرەك ايتقاندا, اققايىڭ اۋدانىنداعى «وقجەتپەس» لاگەرىنە – 4 ملن, م.جۇماباەۆ اۋدانىنداعى «بەرەزكا» لاگەرىنە – 81,2 ملن, جامبىل اۋدانىنداعى «لەسنايا پوليانا لاگەرىنە – 86,8 ملن, ع.مۇسىرەپوۆ اۋدانىنداعى «اققايىڭ» لاگەرىنە – 3 ملن تەڭگە ءبولىندى. ەڭ ۇلكەن قاراجات – 192,8 ملن تەڭگە – ەسىل اۋدانىنداعى «رودنيك» بالالار لاگەرىنە ءبولىندى.
بۇدان باسقا, 5 بالالار لاگەرىن سەنىمدى باسقارۋشىلار العان. ولار وزدەرى بەلگىلەگەن اقىلى نەگىزدە جەتكىنشەكتەرگە قىزمەت كورسەتەدى. بۇلاردىڭ دەمالىس جاعدايى, كوڭىل كوتەرۋ باعدارلامالارى, تاماقتانۋى بيۋدجەتتەن قارجىلاندىراتىندارعا قاراعاندا جوعارى ەكەنىن ايتا كەتۋ كەرەك. بۇل لاگەرلەرگە دە بيىل جوندەۋ جۇمىستارىنا 25 ملن تەڭگە بولىنگەن. سونىڭ 15 ملن تەڭگەسى تايىنشا اۋدانىنداعى «ەدەلۆەيس-بۋراباي» لاگەرىنە اۋدارىلعان. ال پەتروپاۆل قالاسىنىڭ اۋماعىندا ورنالاسقان «دوستىق» جانە «اققايىڭ» لاگەرلەرىن جوندەۋگە 10 ملن تەڭگەدەن قارجى بولىنگەن.
وسى 6 ماۋسىمدا وڭىردەگى دەمالىس جانە ساۋىقتىرۋ لاگەرلەرى اشىلدى. جۇمىسىن باستاعان لاگەرلەردىڭ ءبارى سەس قورىتىندىسىن العان. قازىر 6 200 (10%) وقۋشى قالا سىرتىنداعى لاگەرلەردە دەمالىپ جاتىر.
سونىمەن بىرگە 2 ماۋسىمنان باستاپ مەكتەپ جانىنداعى 58 570 وقۋشىنى قامتىعان دەمالىس لاگەرى ۇيىمداستىرىلدى. وندا بالالار تاماقتاناتىن 424 الاڭ جۇمىس ىستەيدى.
وبلىستىق ءبىلىم باسقارماسىنىڭ باسشىسى ايناگۇل سۇراعانوۆانىڭ ايتۋىنشا, جازعى كەزەڭدە وقۋشىلار 4 باعىت بويىنشا جۇمىسپەن قامتىلادى. ونىڭ ىشىندە 8 414 وقۋشى ەڭبەكپەن قامتىلىپ, كوگالداندىرۋ جانە اباتتاندىرۋ بريگادالارى قاتارىندا جۇمىس ىستەمەك. ال 15 965 بالا سپورتتىق-تۋريزم, ولكە وڭىرلەرىنە ساياحات, باسقا دا ەكسكۋرسيالار, ارحەولوگيالىق ەكسپەديتسيالارعا تارتىلادى. سونىمەن قاتار 26 130 وقۋشى شىعارماشىلىقپەن اينالىسىپ, 30 ساعات قوسىمشا ءبىلىم الادى. ولار اۋلا كلۋبتارى قاتارىندا ءتۇرلى ۇيىرمەلەرگە قاتىسادى. ال 13 مىڭنان ارتىق ورەن زياتكەرلىك ونەرلەرمەن اينالىسىپ, كوشباسشىلىق مەكتەپتەرىندە بەلسەندىلىك كورسەتەدى.
جۋىردا وبلىس اكىمى عاۋەز نۇرمۇحامبەتوۆ اققايىڭ اۋدانىنداعى «وقجەتپەس» لاگەرىندە بولىپ, جاڭا ماۋسىمنىڭ اشىلۋىنا قاتىستى. «بالالاردىڭ جازعى دەمالىستى بەلسەندى, مازمۇندى ءارى كوتەرىڭكى كوڭىل-كۇيمەن باستاعانىنا قۋانىشتىمىن», دەپ جازدى ول ءوزىنىڭ الەۋمەتتىك پاراقشاسىندا.
بۇل لاگەردە بالالاردىڭ قاۋىپسىز ءارى جايلى دەمالىسى ءۇشىن بارلىق جاعداي جاسالعان. دەمالىس ۇيلەرى تەگىس جوندەلىپ, اۋماقتارى اباتتاندىرىلدى. سونىمەن بىرگە بەينە باقىلاۋلار ورناتىلىپ, ساپالى تاماقتانۋ, مەديتسينالىق قىزمەت جانە ءار تاقىرىپقا ارنالعان قىزىقتى ويىن-ساۋىق باعدارلامالارى ۇيىمداستىرىلعان.
سولتۇستىك قازاقستان وبلىسى
