سالتاناتتى اشىلۋ راسىمىنە ماڭعىستاۋ وبلىسىنىڭ اكىمى, «سامۇرىق-قازىنا» ۇلتتىق ءال-اۋقات قورى» اق مەن «قازاقستان تەمىر جولى» ۇلتتىق كومپانياسى» اق باسشىلىعى, حالىقارالىق سەرىكتەستەر مەن جەتەكشى لوگيستيكالىق كومپانيالاردىڭ وكىلدەرى قاتىستى. جوباعا تىكەلەي اتسالىسىپ, ونىڭ ءساتتى جۇزەگە اسۋىنا ۇلەس قوسقان ازاماتتارعا ارنايى ماراپاتتار تابىستالدى.
«بۇل جوبانىڭ ءساتتى جۇزەگە اسۋىنا اتسالىسقان بارلىق ازاماتتارعا العىس ايتامىن. قازاقستان ءۇشىن ترانزيتتىك-كولىكتىك الەۋەتتى دامىتۋ – ستراتەگيالىق ماڭىزى بار باعىتتاردىڭ ءبىرى. وسى جولدا «سامۇرىق-قازىنا» قورى مەن قتج بىرلەسىپ, تەك ەلىمىزدە عانا ەمەس, شەتەلدە دە اۋقىمدى جۇمىستار جۇرگىزىپ جاتىر. سوڭعى ون جىلدا قتج مەن قىتايدىڭ ليانيۋنگان پورتى اراسىنداعى ارىپتەستىك اياسىندا ليانيۋنگاندا قازاقستان-قىتاي تەرمينالى, قورعاس قاقپاسىنداعى «Khorgos Gateway» قۇرعاق پورتى اشىلدى. ەندى مىنە, اقتاۋدا كونتەينەرلىك حاب ىسكە قوسىلدى. بۇل – ەلىمىزدىڭ كولىك-لوگيستيكا سالاسىنداعى ىلگەرى قادامى», دەدى «سامۇرىق-قازىنا» اق باسقارما توراعاسى نۇرلان جاقىپوۆ.
جاڭا حاب ەلىمىزدىڭ ترانزيتتىك الەۋەتىن ەداۋىر ارتتىرىپ, قازاقستاننىڭ شىعىس – باتىس, سونداي-اق سولتۇستىك – وڭتۇستىك باعىتتارى بويىنشا حالىقارالىق كولىك دالىزدەرىندەگى ءرولىن نىعايتا تۇسەدى. زاماناۋي لوگيستيكالىق ينفراقۇرىلىم مەن ەلىمىزدە تەڭدەسى جوق جاڭا تەحنولوگيالاردىڭ ارقاسىندا كونتەينەرلىك جۇكتەردى وڭدەۋ ەداۋىر جىلدام جۇزەگە اسادى.
نىسان جۇمىسىنىڭ باستالۋىن قىتايدان كەلگەن 100 مىڭىنشى كونتەينەردىڭ كەلۋىمەن اتاپ ءوتتى. بۇل جۇك ترانسكاسپي حالىقارالىق كولىك مارشرۋتى (تمتم) بويىنشا جەتكىزىلگەن.
ايتا كەتەيىك, جوبا «KTZ Express» اكتسيونەرلىك قوعامى, قىتايدىڭ ەڭ ءىرى تەڭىز ايلاقتارىنىڭ ءبىرى – ليانيۋنگان پورتى جانە «اقتاۋ حالىقارالىق تەڭىز ساۋدا پورتى» اق اراسىنداعى سەرىكتەستىك نەگىزىندە جۇزەگە اسىرىلعان.
جوبانىڭ باس مەردىگەرى – قىتايدىڭ ءىرى مەملەكەتتىك كورپوراتسيالارىنىڭ ءبىرى سانالاتىن China Communications Construction Company (CCCC) كونسورتسيۋمى. كومپانيا كولىك ينفراقۇرىلىمىن سالۋدا جانە پورت قۇرىلىسى سالاسىنداعى ءىرى جوبالاردى جۇزەگە اسىرۋدا مول تاجىريبەگە يە. وزىق تەحنيكالىق شەشىمدەرى مەن ءتيىمدى قۇرىلىس باسقارۋ جۇيەسىنىڭ ارقاسىندا حاب قىسقا مەرزىم ىشىندە ىسكە قوسىلىپ وتىر.
