ىشكى ىستەر مينيسترلىگىنىڭ مالىمەتىنشە, ەلىمىزدە قارۋ-جاراق پەن وق-دارىلەردىڭ زاڭسىز اينالىمىنا قارسى اۋقىمدى رەيد جۇرگىزىلدى. شارا بارىسىندا 400 زاڭسىز قارۋ, 2 500-دەن استام وق-ءدارى مەن 6 جارىلعىش زات تاركىلەندى. سونداي-اق, 40 جاسىرىن قارۋ قويماسى انىقتالدى.
اتالعان ءىس-شارا قاڭتار وقيعاسى كەزىندە ۇرلانعان پوليتسيا قارۋلارى مەن ارنايى قۇرالدارىن دا قايتارۋعا مۇمكىندىك بەردى. تاركىلەنگەن زاتتار قاتارىندا 2 كالاشنيكوۆ اۆتوماتى, 4 تاپانشا, 4 اڭشى مىلتىعى, قىزمەتتىك برونەجيلەتتەر, كاسكالار مەن قالقاندار بار.
ازاماتتاردىڭ دا بەلسەندىلىگى بايقالدى – ولار 87 قارۋدى ءوز ەركىمەن تاپسىرعان. بۇل جاعداي حالىقتىڭ زاڭسىز قارۋ اينالىمىنا بەي-جاي قارامايتىنىن دالەلدەيدى.
رەيد شەڭبەرىندە 29 000-نان استام ازاماتتىق قارۋ تەكسەرىلىپ, 845 ادام اكىمشىلىك جاۋاپكەرشىلىككە تارتىلدى. سونىمەن قاتار پوليتسيا قىزمەتكەرلەرى 10 000-نان استام شارۋا قوجالىعىن ارالاپ, 65 زاڭسىز قارۋدى تاركىلەدى.
قر ءىىم كريمينالدىق پوليتسيا دەپارتامەنتىنىڭ باستىعى قانات نۇرماعامبەتوۆتىڭ ايتۋىنشا, قارۋ-جاراق پەن وق-دارىلەردىڭ زاڭسىز اينالىمىنا قارسى جۇيەلى جۇمىستار الداعى ۋاقىتتا دا جالعاسادى.
