بۇل قولداۋ ەلدى ەكولوگيالىق جاڭعىرتۋعا ەلەۋلى ۇلەس قوسىپ, جاسىل ەكونوميكا سالاسىنداعى وڭىرلىك كوشباسشى رەتىندەگى ۇستانىمىمىزدى نىعايتادى. جاسىل جوبالاردى ىلگەرىلەتۋ ماقساتىندا بىلتىر بۇۇ قورى ءۇشىن ارنايى ەلدىك باعدارلاما دايىندالدى. «حالىقارالىق ۇيىمداردىڭ قولداۋىمەن قازاقستانعا وسى قور تاراپىنان شامامەن 280 ملن اقش دوللارىنا قارجىلاندىرۋ قاراستىرىلعان. اتالعان قاراجات جاڭارتىلاتىن ەنەرگيا كوزدەرىن دامىتۋعا, ونەركاسىپ سەكتورىندا تومەن كومىرتەكتى تەحنولوگيالاردى ەنگىزۋدى ىنتالاندىرۋعا, سونداي-اق ەلەكتروموبيلدەردى دامىتۋدى قولداۋعا باعىتتالدى», دەدى ە. نىسانباەۆ.
جاسىل جوبالاردى ىلگەرىلەتۋ ءۇشىن Readiness II جوباسى اياسىندا بىلتىر ازىرلەنگەن ەلدىك باعدارلاماعا 7 جوبا ەنگىزىلگەن. جوبالار ەنەرگەتيكا سەكتورىنداعى پارنيكتىك گازدار شىعارىندىلارىن ازايتۋعا, اۋىلدى ەلدى مەكەندەردەگى ورتالىقتاندىرىلعان سۋمەن جابدىقتاۋ جۇيەلەرىنىڭ تۇراقتىلىعىن ارتتىرۋعا, مال شارۋاشىلىعى فەرمالارىن جاڭعىرتۋعا, سونداي-اق «جاسىل» قارجىلاندىرۋ سالاسىنداعى جەكە سەكتوردىڭ باستامالارىن قولداۋعا ارنالعان. بۇل جوبالاردىڭ قۇنى شامامەن 1 ملرد دوللاردى قۇراسا, ونىڭ 630 ميلليونىن اتالعان قور قارجىلاندىرۋى مۇمكىن.
سونىمەن قاتار ەلىمىزدە جاڭارتىلاتىن ەنەرگيا كوزدەرى بويىنشا جاسىل كليماتتىق قور مەن ەۋروپالىق قايتا قۇرۋ جانە دامۋ بانكى باعدارلاماسى اياسىندا جالپى قۋاتتىلىعى 330 مۆت بولاتىن جاڭارتىلاتىن ەنەرگيا كوزى سالاسىندا 11 جوبانىڭ قۇرىلىسىن قولداۋ كوزدەلگەن. قازىرگى ۋاقىتتا 9 جوبا قارجىلاندىرىلدى. ەكولوگيالىق جوبالار ءۇشىن اۋقىمدى حالىقارالىق قارجىلاندىرۋدى تارتۋ قازاقستاننىڭ ەكونوميكانى دەكاربونيزاتسيالاۋعا جانە كومىرتەگى بەيتاراپتىعىنا قول جەتكىزۋگە باعىتتالعان ستراتەگيالىق باعىتىن كورسەتەدى. باعدارلامانى تابىستى ىسكە اسىرۋ قورشاعان ورتاعا ەكولوگيالىق جۇكتەمەنى ەداۋىر تومەندەتۋگە, ينفراقۇرىلىمدى جاڭعىرتۋعا جانە مىڭداعان جاڭا «جاسىل» جۇمىس ورىندارىن قۇرۋعا جاعداي جاسايدى. ساراپشىلار مۇنداي اۋقىمدى ينۆەستيتسيالار جەرگىلىكتى ەكولوگيالىق مىندەتتەردى شەشۋگە ىقپال ەتىپ قانا قويماي, كليماتتىڭ وزگەرۋىنە قارسى كۇرەس جونىندەگى جاھاندىق باستامالاردا ەلىمىزدىڭ سەنىمدى ارىپتەس رەتىندەگى ءيميدجىن نىعايتاتىنىن اتاپ وتەدى.
