فوتو: ەڭبەك جانە حالىقتى الەۋمەتتىك قورعاۋ مينيسترلىگى
قازىرگى ۋاقىتتا 2025-2030 جىلدارعا ارنالعان ينكليۋزيۆتى ساياسات تۇجىرىمداماسى, «امانات» پارتياسىنىڭ 2023-2027 جىلدارعا ارنالعان جول كارتاسى جانە مەملەكەت باسشىسىنىڭ تاپسىرماسى بويىنشا ازىرلەنگەن «حالىقپەن بىرگە» جوباسى ىسكە اسىرىلىپ جاتىر.
«Amanat» پارتياسىنىڭ جول كارتاسىندا 2023-2027 جىلدار ارالىعىندا ينتەراكتيۆتى قولجەتىمدىلىك كارتاسىنا (بۇدان ءارى – كارتا) ەنگىزىلگەن 42 مىڭنان استام نىساندى بەيىمدەۋ بويىنشا جۇمىس كوزدەلگەن. جىل سايىن وسىنداي وبەكتىلەردىڭ 20%-ى بەيىمدەلۋى ءتيىس. وسىلايشا, 2023 جىلى – كارتاداعى وبەكتىلەردىڭ 20%, 2024 جىلى – 40%, 2025 جىلى – 60%, 2026 جىلى – 80%, 2027 جىلى – 100%-ى بەيىمدەلەدى. قازىرگى ۋاقىتتا ەل بويىنشا 23206 نىسان تولىقتاي بەيىمدەلگەن.
بۇگىنگى تاڭدا پاۆلودار وبلىسىندا 743 نىسان بەيىمدەلدى. 2025 جىلدىڭ سوڭىنا دەيىن تاعى 299 نىساندى بەيىمدەۋ جوسپارلانىپ جاتىر.
بەيىمدەلگەن نىسانداردىڭ جالپى سانىنان مۇگەدەكتىگى بار ادامداردىڭ بارلىق ساناتتارى ءۇشىن قولجەتىمدىلەرى:
- دەنساۋلىق ساقتاۋ وبەكتىلەرى – 76;
- ءبىلىم بەرۋ نىساندارى – 321;
- مادەنيەت نىساندارى – 42;
- مەملەكەتتىك جانە كۆازيمەملەكەتتىك ۇيىمدار – 173;
- سپورت نىساندارى – 87;
- الەۋمەتتىك قورعاۋ وبەكتىلەرى – 12;
- ساۋدا نىساندارى مەنويىن-ساۋىق ورتالىقتارى – 32.
«مۇمكىندىگى شەكتەۋلى جاندار ءۇشىن, ەمحانالارعا ەش قيىندىقسىز كىرە الۋ وتە ماڭىزدى. ءبىزدىڭ قالادا №3 جانە №4 قالالىق ەمحانالار مەن «مويىلدى» شيپاجايى بەيىمدەلگەن», دەپ پاۆلودار قالاسىنىڭ تۇرعىنى, ءبىرىنشى توپتاعى مۇگەدەكتىگى بار ەرلان قۇرمانعازين ويىمەن ءبولىستى.
بۇدان باسقا, پاۆلودار وبلىسى بويىنشا حالىقتى الەۋمەتتىك قورعاۋ سالاسىنداعى رەتتەۋ جانە باقىلاۋ كوميتەتىنىڭ دەپارتامەنتى 2025 جىلدىڭ باسىنان باستاپ پروفيلاكتيكالىق باقىلاۋ شەڭبەرىندە 6 جانە جوسپاردان تىس باقىلاۋ شەڭبەرىندە 1 تەكسەرۋ جۇرگىزدى. تەكسەرۋ قورىتىندىسى بويىنشا انىقتالعان بۇزۋشىلىقتاردى جويۋ تۋرالى 7 نۇسقاما ەنگىزىلدى.
وبەكتىلەردىڭ مەنشىك يەلەرىنە پروفيلاكتيكالىق باقىلاۋ جۇرگىزۋ كەزىندە بۇزۋشىلىقتار العاش رەت انىقتالعان كەزدە اكىمشىلىك جاۋاپكەرشىلىككە تارتپاي, ولاردى جويۋ تۋرالى نۇسقامالار عانا ەنگىزىلەتىنىن اتاپ ءوتۋ قاجەت. نۇسقاما بەلگىلەنگەن مەرزىمدە ورىندالماعان جاعدايدا ايىپپۇل سالىناتىن بولادى.
