اتالعان جوعارى وقۋ ورنىندا «جاساندى ينتەللەكت تەحنولوگيالارى» ءبىلىم باعدارلاماسى ەلىمىزدىڭ جاڭا كاسىپتەر اتلاسىنا بايلانىستى 2020 جىلى اشىلدى.
«وسىدان 5 جىل بۇرىن جاڭا ماماندىقتى اشقاندا جاقىن ارادا جي-مەن جۇمىس ىستەيتىن كادرلار سۇرانىسقا يە بولادى ويلادىق. بۇل بولجامىمىز دۇرىس بولدى. العاشقى جىلى ستۋدەنتتەردىڭ ءبىر توبىن عانا قابىلدادىق. قازىر جاساندى ينتەللەكت بويىنشا ءبىلىم العىسى كەلەتىندەردىڭ سانى ءتورت ەسەگە ءوستى», دەدى جاساندى ينتەللەكت تەحنولوگيالارى كافەدراسىنىڭ مەڭگەرۋشىسى بيبىگۇل رازاحوۆا.
باكالاۆرياتتىڭ ءتورت جىلىندا ستۋدەنتتەر كومپيۋتەرلىك لينگۆيستيكا سالاسىندا ماشينالىق وقىتۋدى, دەرەكتەردى تالداۋدى, ونتولوگيالىق ينجەنەريانى, نەيروندىق جۇيە قوسىمشالارىن ازىرلەۋ جانە تابيعي ءتىلدى وڭدەۋ بويىنشا ءبىلىم الدى. سونداي-اق ۇلتتىق جانە جەكە IT-كومپانيالار مەن ورتالىقتاردا تاعىلىمدامادان ءوتتى.
بۇل ءبىلىم باعدارلاماسى «ASIIN» حالىقارالىق اگەنتتىگىندە اككرەديتتەلگەن. ونى ۋنيۆەرسيتەت جۇمىس بەرۋشىلەرمەن بىرلەسىپ, ولاردىڭ سۇرانىسىن ەسكەرىپ جاساعان.
«جاساندى ينتەللەكت تەحنولوگياسىن مەڭگەرۋ وڭاي ەمەس. بىراق ونى قىزىقتى ەتەتىن دە وسى كۇردەلىلىك. ماماندىق ماعان ينتەللەكتۋالدى وسۋگە تۇراقتى مۇمكىندىك بەردى. ترەنينگ بارىسىندا تەوريا مەن تاجىريبەنىڭ جاقسى ۇيلەسىمى قۇرىلدى. ءبىز «Python», «TensorFlow», «Scikit-learn», «PyTorch» سياقتى قۇرالداردى پايدالانا وتىرىپ, ناقتى جوبالار جاسادىق. كۋرستىق جۇمىستا العان ءبىلىمىمىزدى تاجىريبەدە قولداندىق. سونىمەن قاتار كوماندالىق جۇمىسقا اتسالىسىپ, عىلىمي جوبالاردى ىسكە اسىرىپ, حاكاتوندارعا قاتىستىق», دەيدى جاس مامان يەسى دايانا وسپانوۆا. بولاشاقتا دايانا جاساندى ينتەللەكت سالاسىندا ينجەنەر-ساراپشى بولىپ جۇمىس ىستەگىسى كەلەدى.
ءبىر ايتا كەتەرلىگى, بۇل ماماندىق بويىنشا ءبىزدىڭ عانا ەمەس, تمد ەلدەرىنەن كەلگەن شەتەلدىك ستۋدەنتتەر دە ءبىلىم الادى. ولارعا وتاندىق وقىتۋشىلارمەن بىرگە اقش, قىتاي, مالايزيا سەكىلدى جەتەكشى جوعارى وقۋ ورىندارىنىڭ عالىمدارى ءدارىس وقيدى.
