150 ملرد تەڭگەدەن استام ينۆەستيتسيا
«سامۇرىق-قازىنا» قورى جۇزەگە اسىرىپ جاتقان يمپورتتى الماستىرۋ جوبالارى بۇگىندە ءوندىرىستى جانداندىرىپ قانا قويماي, وڭىرلىك جۇمىسپەن قامتۋ, بيۋدجەتكە تۇسەتىن سالىق كولەمى, ەكسپورتتىق الەۋەت سياقتى ماڭىزدى باعىتتارعا ناقتى ۇلەس قوسىپ وتىر. بۇل تۋرالى قور وكىلدەرى ارنايى ءباسپاسوز جيىنىندا حابارلادى.
قوردىڭ باسقارۋشى ديرەكتورى نيكولاي كازۋتيننىڭ ايتۋىنشا, بىلتىر «سامۇرىق-قازىنا» كومپانيالارى توبى وتاندىق تاۋار وندىرۋشىلەرمەن سەرىكتەستىك اۋقىمىن كەڭەيتىپ, كەلىسىمشارتتار جاساسقان.
«وتاندىق تاۋار وندىرۋشىلەرمەن, جۇمىستار مەن قىزمەتتەر اياسىندا قولدانىلاتىن تاۋارلاردى قوسقاندا 1,1 ترلن تەڭگەدەن استام سوماعا شارتتار جاسالدى. ال 2022 جىلمەن سالىستىرعاندا وتاندىق تاۋار وندىرۋشىلەردەن ساتىپ الۋ كولەمى 7 ەسە ءوستى. 2025 جىلى قاڭتار-مامىر ارالىعىندا جۇمىستارداعى تاۋارلاردى قوسا ەسەپتەگەندە وتاندىق تاۋار وندىرۋشىلەرمەن 433,3 ملرد تەڭگەگە كەلىسىمشارتتار جاسالدى. جىل سوڭىنا دەيىن بۇل كورسەتكىش 25%-عا وسپەك», دەدى ن. كازۋتين.
ال ساتىپ الۋ ەرەجەلەرىندە وتاندىق تاۋار وندىرۋشىلەردى قولداۋعا ارنالعان 16 شارا قاراستىرىلعان. ولاردىڭ بىرقاتارى وزگە رەتتەلەتىن ساتىپ الۋلاردا بالاماسى جوق, بىرەگەي ساناتقا جاتادى. اسىرەسە وتاندىق تاۋار وندىرۋشىلەرگە ءسوزسىز باسىمدىق بەرۋ, ۇزاقمەرزىمدى وفتەيك-كەلىسىمشارتتار جاساسۋ, جەتكىزۋشىلەر ءۇشىن جەدەل تولەم, الدىن الا تولەم جاساۋ قىزمەتتەرى بار.
«وفتەيك-كەلىسىمشارتتار – «سامۇرىق-قازىنا» قورىنىڭ ساتىپ الۋ جۇيەسىندە وتاندىق ءوندىرىستى قولداۋدىڭ ەڭ پارمەندى تەتىكتەرىنىڭ ءبىرى. بۇل كەلىسىم ءتۇرى بولاشاقتا شىعارىلاتىن ونىمدەرگە الدىن الا ۇزاقمەرزىمدى شارتتار جاساسۋ ارقىلى كاسىپورىندارعا كەپىلدى نارىق ۇسىنۋعا مۇمكىندىك بەرەدى. 2024 جىلى وسىنداي وفتەيك-كەلىسىمشارتتار اياسىندا جالپى 191 ملرد تەڭگەگە 367 كەلىسىم بەكىتىلگەن. بۇل الدىڭعى جىلمەن سالىستىرعاندا 10 ەسە كوپ. وسى تەتىكتىڭ ارقاسىندا 500-دەن استام جاڭا جۇمىس ورنىن اشۋدى, 150 ملرد تەڭگەدەن استام ينۆەستيتسيا تارتىپ, اسا ماڭىزدى تاۋارلاردىڭ جەرگىلىكتى ءوندىرىسىن جولعا قويۋدى كوزدەپ وتىرمىز. ال 2025 جىلدىڭ العاشقى 5 ايىندا 115 ملرد تەڭگەگە 148 وفتەيك-كەلىسىمشارت جاسالىپ, قوسىمشا 97 ملرد تەڭگەگە 24 جوبا ازىرلەنىپ جاتىر. جىل سوڭىنا دەيىن بۇل كورسەتكىشتى 210 ملرد تەڭگەگە جەتكىزۋ جوسپارلانعان. وسىلايشا, وفتەيك-كەلىسىمدەر يمپورتتى الماستىرىپ قانا قويماي, ىشكى ءوندىرىس پەن وڭىرلىك جۇمىسپەن قامتۋدى نىعايتاتىن ناقتى قۇرالعا اينالىپ وتىر», دەيدى باسقارۋشى ديرەكتور.
«سامۇرىق-قازىنا» ەلەكتروندى دۇكەنى قالاي جۇمىس ىستەيدى؟
«سامۇرىق-قازىنا» قورى وتاندىق كاسىپكەرلەر مەن تاپسىرىس بەرۋشىلەر اراسىندا ءتيىمدى ءارى اشىق ساۋدا الاڭىن قۇرۋ ماقساتىندا «SKstore.kz» ەلەكتروندى دۇكەنىن ىسكە قوستى. جۇيەنىڭ باستى ماقساتى – شاعىن جانە ورتا بيزنەسكە, سونىڭ ىشىندە وتاندىق تاۋار وندىرۋشىلەرگە كەڭىنەن مۇمكىندىك بەرۋ. بۇرىنعىداي كۇردەلى تەندەرلىك راسىمدەر مەن ۇزاق ۇدەرىستەردىڭ ورنىنا مۇندا بارلىعى جەڭىل ءارى ناقتى الگوريتمدەر ارقىلى جۇزەگە اسادى. «SKstore.kz» جۇيەسىندە ساتىپ الۋلار ەكى باعىتتا جۇرگىزىلەدى. ءبىرىنشىسى – تىكەلەي ساتىپ الۋ. بۇل ءتاسىل 100 ايلىق ەسەپتىك كورسەتكىشكە دەيىنگى, ياعني شامامەن 393 مىڭ تەڭگە شاماسىنداعى ساتىپ الۋلارعا قولدانىلادى. ەكىنشىسى – ساۋدا-ساتتىق (تەندەرلىك) ءادىس. بۇل باعىت 20 000 اەك-كە دەيىنگى كولەمدەگى, ياعني 79 ميلليون تەڭگەگە دەيىنگى 49 ءتۇرلى تاۋار ساناتىنا ارنالادى. وسى ەكى قۇرال ارقىلى قوردىڭ كومپانيالارى توبىنا كىرەتىن تەلەكوم, مۇناي-گاز, ەنەرگەتيكا جانە اتوم سالاسىنداعى ۇيىمدار وزدەرىنە قاجەتتى تاۋارلار مەن قىزمەتتەردى جەتكىزۋشىلەردەن تىكەلەي ءارى ءادىل ساتىپ الا الادى.
تاعى ءبىر ەلەۋلى ماسەلە – ايماقتارداعى كاسىپكەرلەردىڭ قاتىسۋى. بۇرىن مۇنداي تسيفرلىق پلاتفورمالارعا رەسپۋبليكالىق دەڭگەيدەگى كومپانيالار عانا قول جەتكىزە الاتىن بولسا, ەندى «SKstore.kz» ارقىلى وڭىرلىك بيزنەس وكىلدەرى دە بەلسەندى تۇردە ساۋداعا قاتىسىپ جاتىر. بۇل – اسىرەسە شاعىن قالا مەن اۋىل كاسىپكەرلەرى ءۇشىن تاپتىرماس مۇمكىندىك. ولار ەندى استانا مەن الماتىداعى ءىرى كورپوراتسيالارمەن ءبىر الاڭدا باسەكەگە تۇسە الادى.
وتاندىق تاۋار وندىرۋشىلەرگە باسىمدىق بەرىلەدى
«Skstore.kz» ەلەكتروندىق دۇكەنىندە وتاندىق تاۋار وندىرۋشىلەردىڭ تاۋارلارىن ساتىپ العان كەزدە ولارعا باسىمدىق ناقتى قالاي بەرىلەدى؟ بۇل ءىس جۇزىندە قالاي جۇزەگە اسىرىلادى؟ بۇل تۋرالى بريفينگتە سۇراق قويىپ, ناقتى جاۋابىمىزدى دا الدىق.
«QazCloud» كومپانياسىنىڭ كوممەرتسيالىق ديرەكتورى سەرىكبول ءورازاليننىڭ ايتۋىنشا, ەلەكتروندى دۇكەننىڭ باستى ارتىقشىلىعى – جۇيەنىڭ الگوريتمى. ياعني ساتىپ الۋشىلار پلاتفورماعا كىرىپ, بەلگىلى ءبىر تاۋاردى ىزدەگەندە جۇيە ەڭ الدىمەن وتاندىق وندىرۋشىلەردىڭ ۇسىنىستارىن كورسەتەدى.
ەلەكتروندى دۇكەن ىسكە قوسىلعان العاشقى جىلى نەبارى 7 كاتەگوريامەن جۇمىس ىستەسە, بۇگىندە بۇل كورسەتكىش 49 كاتەگورياعا دەيىن جەتكەن. ولاردىڭ سانىنىڭ ارتۋى ءارتۇرلى سالاداعى وتاندىق وندىرۋشىلەرگە نارىققا شىعۋعا كەڭ مۇمكىندىك بەرەدى دەگەن ءسوز. جىلدان-جىلعا بۇل ءتىزىم كەڭەيىپ كەلەدى. مۇنىڭ ءبارى جۇيەنىڭ دامۋ قارقىنىن, ال وتاندىق تاۋار وندىرۋشىلەردىڭ پلاتفورماعا دەگەن سەنىمىن كورسەتەدى. الداعى ۋاقىتتا وتاندىق ونىمدەردىڭ ۇلەسى ەسەلەپ ارتپاق.
ساتىپ الۋ جۇيەسى اشىق ءارى ءتيىمدى
ءبارىمىزدى الاڭداتاتىن سۇراقتىڭ ءبىرى – تەندەرلىك الاڭداعى ادىلدىك. كەي جاعدايدا قيتۇرقى سحەمالار ارقىلى جەڭىسكە جەتىپ, كەيىن ساپاسىز ءونىم بەرەتىن جەتكىزۋشىلەرگە قوعام تاراپىنان نارازىلىق تۋىندايتىنى بەلگىلى. وسى ماسەلە بويىنشا دا ناقتى قادامدار جاسالىپ جاتىر.
قور وكىلدەرىنىڭ ايتۋىنشا, قازىر ساتىپ الۋ جۇيەسىنە بىرنەشە ادالدىق تەتىكتەرى ەنگىزىلگەن. سونىڭ ءبىرى – ەلەكتروندى شوت-فاكتۋرالارمەن اۆتوماتتى تۇردە ينتەگراتسيالاۋ. بۇل تەتىك ارقىلى جەتكىزۋشىنىڭ ناقتى جۇمىس تاجىريبەسى مەن شىنايى ءىس-ارەكەتى تەكسەرىلەدى. بۇرىنعىداي جالعان قۇجاتتارمەن تەندەرگە قاتىسۋعا جول بەرىلمەيدى. وسىنداي ەرەجەلەرى ءۇشىن دە قوردىڭ ساتىپ الۋلارى حالىقارالىق قارجى ۇيىمدارىنىڭ جوعارى باعاسىن الدى دەيدى «سامۇرىق-قازىنا» قورىنىڭ دامۋ جانە جەكەشەلەندىرۋ جونىندەگى باسقارۋشى ديرەكتورى سالتانات ەربولقىزى.
«جۇيەنىڭ سەنىمدىلىگى مەن تيىمدىلىگى حالىقارالىق دەڭگەيدە مويىندالعان. ەۋروپا قايتا قۇرۋ جانە دامۋ بانكى «سامۇرىق-قازىنانىڭ» ساتىپ الۋ جۇيەسىن ءوزىنىڭ ۇسىنىستارىنا ەنگىزگەن. ولار قوردىڭ ساتىپ الۋ جۇيەسىن اشىق ءارى ءتيىمدى دەپ تانىدى. بۇل حالىقارالىق ۇيىمداردىڭ رەسمي باعاسى», دەدى ول.
ءوندىرىستى نىعايتۋداعى ەرەكشە ءتاسىل
«سامۇرىق-قازىنا» قورى جۇزەگە اسىرىپ جاتقان يمپورتتى الماستىرۋ جوبالارى بۇگىندە ءوندىرىستى جانداندىرىپ قانا قويماي, وڭىرلىك جۇمىسپەن قامتۋ, بيۋدجەتكە تۇسەتىن سالىق كولەمى, ەكسپورتتىق الەۋەت سياقتى ماڭىزدى باعىتتارعا ناقتى ۇلەس قوسىپ كەلەدى.
مىسالى, ترانسفورماتورلار شىعاراتىن «Asia Trafo» كومپانياسىمەن 39,9 ملرد تەڭگەگە وفتەيك-كەلىسىمشارت جاسالعان. ول قورعا قاراستى ءۇش ءىرى ۇيىم – «KEGOC», «قازاقستان تەمىر جولى» جانە «قازمۇنايگازعا» قاجەتتى ءونىمدى جەتكىزىپ جاتىر. بۇدان بولەك, تمد ەلدەرىنە باعىتتالعان ەكسپورت كولەمى دە ارتىپ, 15 ميلليارد تەڭگەنىڭ ءونىمى سىرتقا شىققان.
تاعى ءبىر مىسال, «پرومماشكومپلەكت» كومپانياسىمەن سەرىكتەستىك اياسىندا باعىتتامالى بۇرمالار ءوندىرىسى جولعا قويىلدى. بۇل – ەلىمىزدىڭ ترانزيتتىك الەۋەتىن ارتتىرۋدا ماڭىزدى قادام. جوبا اياسىندا جالپى قۇنى شامامەن 78 ملرد تەڭگە بولاتىن كەلىسىمدەر جاسالىپ, بۇگىندە ونىڭ 6,1 ملرد تەڭگەسى ورىندالعان. جەرگىلىكتى قامتۋ ۇلەسى – 62,8 پايىز.
سونىمەن قاتار اقتوبە رەلس-ارقالىق زاۋىتىمەن شامامەن 336 ميلليارد تەڭگەلىك ۇزاقمەرزىمدى كەلىسىم جاسالدى. قازىردىڭ وزىندە 141 مىڭ توننا دايىن ءونىم جەتكىزىلگەن. تەك 2024 جىلدىڭ وزىندە بۇل جوبادان مەملەكەت بيۋدجەتىنە 3 ملرد تەڭگەدەن استام سالىق تۇسكەن.
كەلەسى ءىرى باستاما – «قازاقستان تەمىر جولى» جانە الەمدىك ءىرى كومپانيا «Alstom»-مەن بىرلەسىپ, ەلىمىزدە ەلەكتروۆوز شىعارۋ جوباسى. جوبانىڭ جالپى قۇنى – 967,3 ملرد تەڭگە, استاناداعى زاۋىتتا 1 200-دەن استام جاڭا جۇمىس ورنى اشىلعان. سونىمەن قاتار 2022 جىلدان بەرى شتادلەرمەن بىرلەسىپ ۆاگون ءوندىرىسى جولعا قويىلعان. العاشقى پارتيا 2025 جىلدىڭ جەلتوقسانىندا جەتكىزىلەدى. زاۋىتتا 560 جۇمىس ورنى اشىلماق, جەرگىلىكتى ءوندىرىس ۇلەسى – 35 پايىز.
ال «قازمۇنايگاز» بەن «كاسكور-ماشزاۆود» بىرلەسكەن جوباسى اياسىندا جاڭاوزەن قالاسىندا مۇنايعا ارنالعان جابدىقتار وندىرەتىن جاڭا زاۋىت سالىنىپ جاتىر. 130 ميلليارد تەڭگەنىڭ كەلىسىمشارتى جاسالىپ, زاۋىت اشىلعان سوڭ, 251 جەرگىلىكتى تۇرعىن جۇمىسقا الىنباق.
«سامۇرىق-قازىنا» وكىلدەرىنىڭ ايتۋىنشا, قور بۇل جۇمىستارمەن شەكتەلمەيدى. وتاندىق تاۋار وندىرۋشىلەردى قولداۋعا ارنالعان ءىس-شارالار جالعاسىن تاۋىپ, الداعى ۋاقىتتا كورسەتكىشتەردى ارتتىرۋ, وتاندىق ءوندىرىستى دامىتۋ ماقساتىندا جاڭا جوبالاردى ازىرلەپ, جۇزەگە اسىرۋ جوسپارلانىپ وتىر.
