60 كگ سالماق دارەجەسىندە ايدوس سۇلتانعاليعا تەڭ كەلەر ەشكىم تابىلمادى. الەم چەمپيوناتىندا ەكى مارتە قولا مەدال ولجالاعان وعىلان بۇل جولى دا ءوزىنىڭ مىقتىلىعىن مويىنداتتى. شەشۋشى بەلدەسۋدە سىر بويىنىڭ ساڭلاعى كانىگى قارسىلاسى جەتىسۋلىق عالىم قابدۋناساروۆتى جەڭدى. ايدوستىڭ كوماندالىق ارىپتەسى الپامىس داستانبەك 55 كگ سالماقتا توپ جاردى.
قوستاناي وبلىسى وكىلدەرى اراسىنان يۋسۋپ ماتسيەۆ (97 كگ) پەن مانسۋر شادۋكاەۆتىڭ (130 كگ) مەرەيى ۇستەم بولدى. ماتسيەۆ اقتىق سىندا شىعىسقازاقستاندىق سالاۋات احمەتقاليدى جەڭدى. مانسۇر فينالدا الماتى وبلىسىنىڭ سپورتشىسى اقارىس بەرداشوۆتان باسىم ءتۇستى. تاعى ءبىر التىندى فينالدا سولتۇستىك وڭىردەن كەلگەن دانيار قالەنوۆتى قاپى قالدىرعان استانالىق مەرەي ماۋلەتقانوۆ (72 كگ) ولجالادى.
63 كگ سالماقتا الماتىلىق ەركەبۇلان ارداقوۆتىڭ ايى وڭىنان تۋدى. فينالدا ول جارىس قوجايىنى اساۋحات مۇحاماديەۆتىڭ ورەسكەل قاتەلىگىن ۇتىمدى پايدالاندى. «قازاقستان» سپورت كەشەنىنە جينالعان جانكۇيەرلەر 67 كگ سالماق دارەجەسىندە 2023 جىلعى جاستار اراسىنداعى (U-23) الەم بىرىنشىلىگىنىڭ جەڭىمپازى, ازيا چەمپيونى, جامبىل وبلىسىنىڭ وكىلى سۇلتان اسەت ۇلى جەڭىمپاز دەپ تانىلدى. تارازدان كەلگەن تاعى ءبىر بالۋان تالاس ءاشىرحانوۆ 77 كگ سالماقتا الدىنا جان سالمادى. 82 كگ سالماقتا المير تولەباەۆ توپ جاردى. فينالدا ول الماتى وبلىسىنىڭ وكىلى, تاجىريبەلى قاھارمان قيسمەتوۆتى قاپى قالدىردى.
87 كگ سالماقتىڭ فينالدىق سايىسىندا استانالىق ماقسات سايلاۋ مەن سولتۇستىكقازاقستاندىق يسلام ەۆلوەۆ كۇش سىناستى. بەلدەسۋدىڭ اياقتالۋىنا 10 سەكۋند قالعاندا يسلام قارسىلاسىن كەۋدەسىنەن اسا لاقتىرىپ, ايقىن جەڭىسكە قول جەتكىزدى.
