فوتو: وقۋ-اعارتۋ مينيسترلىگى
اقتاۋ قالاسىنىڭ 6-سىنىپ وقۋشىسى سامير ۆالەريدىڭ قابىلەتى كوپشىلىكتى تاڭداندىردى. مينيسترلىكتىڭ مالىمدەۋىنشە, ونىڭ وقۋ جىلداماعى مينۋتىنا 16-17 مىڭ سوزگە جەتەدى.
اقپاراتتى جوعارى جىلدامدىقپەن قابىلداۋ ساميرگە ساباقتا وزىنە سەنىمدى بولۋعا جانە تەك گۋمانيتارلىق پاندەردە عانا ەمەس, ناقتى عىلىم پاندەرىندە دە جەتىستىككە جەتۋگە كومەكتەسىپ جاتىر. ول قالالىق جانە اۋداندىق وليمپيادالاردىڭ جۇلدەگەرى, ال 2023 جىلى مەكتەبىندە «جىل وقۋشىسى» اتاعىنا يە بولعان.
«سامير - سىنىپتاستارى اراسىندا ۇيىمشىل, ماقساتكەر جانە جاۋاپتى وقۋشى. ول مەكتەپ ومىرىنە بەلسەنە ارالاسىپ, كوشباسشىلىق قابىلەتىن جانە وسۋگە دەگەن ۇمتىلىسىن كورسەتىپ ءجۇر. ونىڭ ايتۋىنشا, بولاشاقتا ەل يگىلىگى ءۇشىن قىزمەت ەتىپ, ءبىلىم, ونەر جانە سپورت سالالارىندا ءوزىن تانىتقىسى كەلەدى», دەلىنگەن مينيسترلىك حابارلاماسىندا.
