مازمۇندى جيىننىڭ اشىلۋىندا NU پرەزيدەنتى, پروفەسسور ۆاكار احماد كليماتتىڭ وزگەرۋى مەن قورشاعان ورتانىڭ دەگراداتسياسى اياسىندا تۇراقتى ەنەرگەتيكالىق شەشىمدەر وتە ماڭىزدى ەكەنىن جەتكىزدى.
«جاڭارتىلاتىن ەنەرگيا كوزدەرى سالاسىنداعى ءبىلىم مەن زەرتتەۋلەر — نەگىزگى مىندەتىمىزدىڭ ءبىر بولىگى. سوندىقتان ءبىز كۇن, جەل جانە تازا ەنەرگيانىڭ باسقا دا تۇرلەرى سالاسىندا يننوۆاتسيالىق تەحنولوگيانى ازىرلەيتىن بولاشاق كوشباسشىلاردى دايارلاپ جاتىرمىز», دەدى ول.
سيمپوزيۋمدا عالىمداردىڭ 46-دان استام بايانداماسى تىڭدالدى. وندا كۇن باتارەيالارى, بيوماسسا, سۋتەكتى ءوندىرۋ جانە ساقتاۋ, كۆانتتىق قوسىمشالارعا ارنالعان توپولوگيالىق ماتەريالدار تۋرالى ءسوز بولدى. سونىمەن قاتار ءىس-شارا اياسىندا قوناقتارعا وتاندىق عالىمداردىڭ وسى سالاداعى عىلىمي ازىرلەمەلەرى ۇسىنىلدى. اسىرەسە ولاردى NU جانىنداعى جاڭارتىلاتىن ەنەرگيا كوزدەرى زەرتحاناسى عالىمدارى دايىنداعان يكەمدى ەلەكترونيكا مەن بيوسەنسورلارعا ارنالعان كەۋەكتى پوليمەرلەر ەرەكشە قىزىقتىردى. بۇل ماتەريال دەفورماتسياعا ءتوزىمدى ءارى كيىلەتىن قۇرىلعىلاردىڭ تيىمدىلىگىن ارتتىرادى. سونداي-اق بيوماسسا ماتەريالىمەن جۇمىس ىستەيتىن توپتىڭ اعا عىلىمي قىزمەتكەرى م.شايمارداننىڭ جەتەكشىلىگىمەن جاسالعان فۋرفۋرال (جۇگەرى قۇلاقتارىنان الىنعان ورگانيكالىق قوسىندى) نەگىزىندەگى گيپەرتونياعا قارسى ءدارى دە ۇسىنىلدى. فۋرفۋرال اقش ەنەرگەتيكا مينيسترلىگىنىڭ نۇسقاسى بويىنشا ەڭ پەرسپەكتيۆالى بيوزاتتاردىڭ ءبىرى سانالادى.
ءبىر جاعىنان, NU جانىنداعى جاڭارتىلاتىن ەنەرگيا كوزدەرى زەرتحاناسىنىڭ باسشىسى, پروفەسسور نۇرشات نۇراجىنىڭ ايتۋىنشا, مۇنداي جيىن عالىمداردىڭ ءبىر-بىرىمەن تاجىريبە الماسىپ, بىرلەسكەن زەرتتەۋلەردى دامىتۋعا پايداسى مول.
ال باتىس شوتلانديا ۋنيۆەرسيتەتىنىڭ پروفەسسورى مودجتابا ميرزاەيان ءبىزدىڭ ەل عىلىمىنىڭ بەلسەندى دامۋىنا ءتانتى بولعانىن جەتكىزدى.
«قازاقستاننان كەلگەن تالانتتى ستۋدەنتتەر شوتلانديا جانە وكسفوردتاعى زەرتحانامدا تاعىلىمدامادان ءوتىپ, ۇزدىك ناتيجەلەر كورسەتتى», دەدى ول.
قىسقاسى, سيمپوزيۋم NU-دىڭ وڭىرلىك عىلىمي حاب رەتىندەگى ورنىن نىعايتا تۇسكەنىن تاعى ءبىر دالەلدەدى.
