كەزدەسۋ بارىسىندا تاراپتار بۇرىن قول قويىلعان كەلىسىمدەر شەڭبەرىندە بىرلەسكەن جوبالاردى ىسكە اسىرۋ ماسەلەلەرىن تالقىلاپ, ەكىجاقتى قاتىناستاردى ودان ءارى دامىتۋ پەرسپەكتيۆالارى تۋرالى ۇسىنىستارمەن ءبولىستى.
قابىلدانعان اسا ماڭىزدى شەشىمنىڭ ءبىرى – KazNARU بازاسىندا ەكى ۋنيۆەرسيتەتتىڭ اكادەميالىق رەسۋرستارىن بىرىكتىرەتىن ءبىلىم بەرۋ جانە عىلىمي-زەرتتەۋ پلاتفورماسى بولا الاتىن بىرلەسكەن قازاقستان-نەمىس ينستيتۋتىن قۇرۋ تۋرالى كەلىسىم.
«قازاقستان-نەمىس ينستيتۋتى باكالاۆريات, ماگيستراتۋرا جانە PhD دوكتورانتۋرا باعدارلامالارى بويىنشا جاس مامانداردى دايارلاۋدى جۇزەگە اسىرادى, سونداي-اق اگروونەركاسىپتىك كەشەندى دامىتۋعا بايلانىستى ءتۇرلى باعىتتار بويىنشا بىرلەسكەن زەرتتەۋلەر جۇرگىزۋ ءۇشىن عىلىمي پوتەنتسيالدى ۇيلەستىرۋ ورتالىعىنا اينالادى», - دەپ اتاپ ءوتتى اقىلبەك كۇرىشباەۆ.
جاڭا بىرلەسكەن ينستيتۋتتى ءساتتى ىسكە قوسۋ ءۇشىن جانە بەلگىلەنگەن ۋاعدالاستىقتى ىسكە اسىرۋ بويىنشا جول كارتاسى ازىرلەنبەك. وندا ءبىلىم بەرۋ باعدارلامالارى قۇرىلىمىن بەكىتۋ, وقىتۋشىلار قۇرامىن ىرىكتەۋ تەتىكتەرىن قالىپتاستىرۋ, سونداي-اق حالىقارالىق ساراپشىلاردى تارتۋ ت.ب. مۇمكىندىكتەرقاراستىرىلادى.
دوكتور ۆولراد روممەلدىڭ پىكىرىنشە, جاڭا قۇرىلىمدى قۇرۋعا گەرمانيا مەن ەۋروداقتىڭ حالىقارالىق قارجى ۇيىمدارى تاراپىنان قولداۋ كورسەتىلپ, سونداي-اق ستۋدەنتتەردى وقىتۋعا مەملەكەتتىك گرانتتار ءبولىنىپ, تەحنولوگيالار ترانسفەرى جۇزەگە اسىرىلماق.
قازاقستان-نەمىس ينستيتۋتى ءبىلىم بەرۋ جانە وقىتۋ ورتالىعى عانا ەمەس, سونىمەن قاتاروزارا تاجىريبە الماسۋ جانە وزىق عىلىمي ازىرلەمەلەردى ەنگىزۋ پلاتفورماسى بولادى دەپ جوسپارلانىپ وتىر. ونىڭ شەڭبەرىندە اگروونەركاسىپتىك ءوندىرىس سالاسىندا تۇراقتى جانە يننوۆاتسيالىق تەحنولوگيالاردى دامىتۋعا باعىتتالعان بىرلەسكەن زەرتتەۋ جوبالارى ىسكە اسىرىلماق.
كەزدەسۋ قورتىندىسىندا تاراپتار بەلگىلەنگەن جوسپارلاردى ودان ارى تەرەڭدەتە وتىرىپ, ارىپتەستىكتى جاڭا دەڭگەيگە كوتەرۋدىڭ ناقتى قادامدارىن بەلگىلەۋگە دايىن ەكەندىكتەرىن اتاپ ءوتتى.
الماتى
