تالدىقورعان قالاسىنداعى وقۋشىلار سارايىندا حالىقارالىق جانە رەسپۋبليكالىق زياتكەرلىك بايقاۋلاردىڭ جەڭىمپازدارى مەن جۇلدەگەرلەرى اتانعان مەكتەپتەر مەن ليتسەيلەردىڭ وقۋشىلارىن ماراپاتتاۋ سالتاناتى ءوتتى.
سالتاناتتى شارانى دارىندى بالالار مەن تالانتتى جاستاردى قولداۋدا ەلەۋلى ۇلەس قوسىپ كەلە جاتقان وبلىستىق ءبىلىم باسقارماسى مەن «جەتىسۋ دارىنى» وڭىرلىك وقۋ-ادىستەمەلىك ورتالىعى ۇيىمداستىردى. شاراعا جەتىسۋ وبلىسى اكىمىنىڭ ورىنباسارى مارلەن كولباەۆ قاتىسىپ, قۇتتىقتاۋ ءسوز سويلەدى. ول ءوز سوزىندە جەتىسۋ وقۋشىلارى حالىقارالىق ءبىلىم سايىستارىندا بەس التىن, ءبىر كۇمىس جانە ەكى قولا مەدال, ال رەسپۋبليكالىق ءپان وليمپيادالارىندا سەگىز التىن, ون التى كۇمىس جانە وتىز توعىز قولا مەدال جەڭىپ العانىن اتاپ ءوتتى.
حالىقارالىق جانە رەسپۋبليكالىق عىلىمي جوبا بايقاۋلارى مەن جالپى ءبىلىم بەرەتىن پاندەر بويىنشا رەسپۋبليكالىق وليمپيادا جەڭىمپازدارى مەن جۇلدەگەرلەرى وبلىس اكىمىنىڭ اتىنان اقشالاي سەرتيفيكاتتارمەن جانە گراموتالارمەن ماراپاتتالدى. سالتاناتتى جيىندا جۇزگە جۋىق وقۋشى اتاپ ءوتىلدى.
ءوڭىردىڭ ەڭ ۇزدىك وليمپيادالىق كومانداسى رەتىندە الاكول اۋدانىنىڭ جىلاندى اۋىلىنداعى دارىندى بالالارعا ارنالعان ليتسەي-ينتەرناتتىڭ «Water 7» كومانداسى تانىلدى. بۇل كوماندا مامىر ايىندا شانحايدا وتكەن حالىقارالىق روبوتوتەحنيكا بايقاۋىندا «Connect Award» كۋبوگىن جەڭىپ العان بولاتىن. ال «وليمپ شىڭىنا جەتەلەۋشى» نوميناتسياسىمەن تالدىقورعان قالاسىنداعى №24 دارىندى بالالارعا ارنالعان مامانداندىرىلعان ليتسەي ۇزدىك وقۋ ورنى رەتىندە تانىلىپ, قوماقتى اقشالاي سىيلىققا يە بولدى.
ماراپاتتالعانداردىڭ ىشىندەگى ەڭ جاس دارىن يەلەرىنىڭ ءبىرى — ەسكەلدى اۋدانىنداعى گەرمان تيتوۆ اتىنداعى مەكتەپتىڭ 2-سىنىپ وقۋشىسى عالىمبەك ايبەك ۇلى بولدى.
— مەن 2-4 سىنىپ وقۋشىلارى اراسىندا وتكەن ماتەماتيكا وليمپياداسىنا قاتىسىپ, 2-ورىن الدىم. ماعان وتە ۇنادى. ۇستازىم تاتىگۇل اپايعا جانە اتا-اناما ۇلكەن العىسىمدى بىلدىرەمىن, — دەيدى جاس ماتەماتيك.
رەسپۋبليكالىق گەوگرافيا وليمپياداسىندا ءۇشىنشى ورىن العان ەرحات تاقاتبەك تە ءوز اسەرىمەن ءبولىستى:
— اشىق ايتقاندا, كارتالارمەن جۇمىس ىستەۋ, قوسىمشا ادەبيەتتەردى ىزدەۋ, كەزەكتى, وڭاي ەمەس كەزەڭدەردەن ءوتۋ – ءبارى وڭاي بولعان جوق. بىراق تاباندىلىق پەن مۇعالىمدەر مەن تالىمگەرلەردىڭ ەموتسيونالدىق ءارى پسيحولوگيالىق قولداۋىنىڭ ارقاسىندا ءبارى مۇمكىن بولدى, — دەيدى ەرحات.
ۇيىمداستىرۋشىلاردىڭ ايتۋىنشا, مۇنداي ماراپاتتاۋ راسىمدەرى وقۋشىلاردى زياتكەرلىك وليمپيادالار مەن بايقاۋلارعا قاتىسۋعا ىنتالاندىرۋعا باعىتتالعان.
