فوتو: اشىق دەرەككوز
22 مامىر كۇنى بايماحانوۆ كوشەسىندە ورنالاسقان «سىر بولاشاعى» بالاباقشاسىندا قايعىلى جاعداي تىركەلدى. 2023 جىلى تۋعان ءبۇلدىرشىن تاربيەشى مەن كۇتۋشىنىڭ جاۋاپسىزدىعىنان قايناعان سۋعا كۇيىپ قالدى. بالانىڭ اناسىنىڭ ايتۋىنشا, قىزدىڭ دەنەسىنىڭ شامامەن 40 پايىزى كۇيىپ, ءبىرىنشى, ەكىنشى جانە ءۇشىنشى دارەجەلى كۇيىك جاراقاتىن العان. العاشقىدا قىز بالا جانساقتاۋ بولىمىنە جاتقىزىلىپ, كەيىن پالاتاعا اۋىستىرىلعانىمەن, جاعدايى ءالى دە اۋىر.
اناسى تەك بالاباقشا قىزمەتكەرلەرىن عانا ەمەس, مەكەمە باسشىلىعى مەن سالاعا جاۋاپتى شەنەۋنىكتەردى دە جاۋاپقا تارتۋدى تالاپ ەتىپ وتىر. ونىڭ ايتۋىنشا, بۇل وقيعا ەلىمىزدەگى كوپتەگەن جەكە بالاباقشالارداعى باقىلاۋدىڭ السىزدىگىن, سانيتارلىق جانە ءورت قاۋىپسىزدىگى تالاپتارىنىڭ ورىندالمايتىنىن كورسەتەدى.
قىزىلوردا وبلىستىق پوليتسيا دەپارتامەنتىنىڭ حابارلاۋىنشا, «كامەلەتكە تولماعان بالانى تاربيەلەۋ جونىندەگى مىندەتتەردى تيىسىنشە ورىنداماۋ» بابى بويىنشا قىلمىستىق ءىس قوزعالعان. قازىرگى تاڭدا تەرگەۋ امالدارى جۇرگىزىلىپ, ءىس وبلىس باسشىلىعىنىڭ جەكە باقىلاۋىنا الىنعان.
سونىمەن قاتار, يۋۆەنالدى پوليتسيا بولىمشەسى پروفيلاكتيكالىق جۇمىستاردى باستادى. وبلىستىق ءبىلىم باسقارماسىنا دا رەسمي تۇردە سۇرانىس جولداندى. الايدا اتا-انالار مەن قوعام بەلسەندىلەرى مۇنداي وقيعالاردىڭ الدىن الۋ ۇشىن مەملەكەتتىك بالاباقشالارعا تەكسەرۋدى كۇشەيتۋدى, پەرسونالداردىڭ كاسىبي دايارلىعىن ارتتىرۋدى جانە بالالار قاۋىپسىزدىگىن ءبىرىنشى ورىنعا قويۋدى تالاپ ەتىپ وتىر.
جانەل تولەۋبەكوۆا, ەۇۋ ستۋدەنتى
