فوتو: جاساندى ينتەللەكتپەن جاسالدى
ىشكى ىستەر مينيسترلىگىنىڭ باستاماسى بويىنشا قوعامدىق جۇمىستارعا تارتىلعاندارعا ارنالعان جاڭا فورما قوعامدىق ءتارتىپتى ساقتاۋ جانە قۇقىق بۇزۋشىلىقتىڭ الدىن الۋ ماقساتىندا ەنگىزىلەدى. جوبالىق قۇجاتتاردا بۇل كيىمنىڭ ء«تارتىپ بۇزعان ازاماتتاردى قوعام الدىندا جاۋاپتى ەكەنىن كورسەتەتىن بەلگى» رەتىندە قولدانىلاتىنى جازىلعان.
جوبا قوعامدىق تىڭداۋعا شىعارىلىپ, 2025 جىلدىڭ 14 ماۋسىمىنا دەيىن قوعام پىكىرىن جينايدى. بۇل باستاما قوعامدا ەكىۇداي پىكىر تۋدىردى: ءبىر تاراپ ونى ءتيىمدى ەسكەرتۋ شاراسى دەپ ەسەپتەسە, ەندى ءبىرى مۇنى ادامنىڭ ار-نامىسىنا ءتيۋى مۇمكىن جازالاۋ ءتاسىلى رەتىندە باعالاپ وتىر.
2025 جىلدىڭ 1 قىركۇيەگىنەن باستاپ قازاقستاندا قابىلدانعان جاڭا زاڭعا سايكەس, اكىمشىلىك ايىپپۇلدىڭ ورنىنا قوعامدىق جۇمىستار تاعايىندالۋى مۇمكىن. بۇل جازا تەك قۇقىق بۇزۋشىنىڭ كەلىسىمىمەن عانا قولدانىلادى جانە جۇمىستان نەمەسە وقۋدان تىس ۋاقىتتا, كۇنىنە 1–4 ساعاتتان اسپاۋى ءتيىس.
قوعامدىق جۇمىستار كەلەسى قۇقىق بۇزۋشىلىقتار ءۇشىن تاعايىندالۋى مۇمكىن:
- كوشەلەردى لاستاۋ (قوقىس تاستاۋ, تۇكىرۋ);
- ۇساق بۇزاقىلىق (بالاعات سوزدەر ايتۋ);
- قوعامدىق ورىندا ماس كۇيىندە ءجۇرۋ;
- وتباسىلىق كيكىلجىڭدەر كەزىندە قورلاۋ نەمەسە زاتتاردى ءبۇلدىرۋ;
- جالعان شاقىرتۋلار (جەدەل جاردەم, ءورت ءسوندىرۋ);
- جول ەرەجەسىن بۇزۋ (جەدەل قىزمەتتەردى وتكىزبەي قويۋ, جاياۋ جۇرگىنشى رەتىندە ەرەجەنى بۇزۋ).
ءىىم مالىمەتىنشە, ارنايى كوكىرەكشە ءتارتىپ بۇزعان ازاماتتارعا قوعام الدىندا ءوز ارەكەتتەرى ءۇشىن جاۋاپكەرشىلىك بار ەكەنىن ەسكە سالادى. الايدا كەي ساراپشىلار بۇل باستامانىڭ قوعامدى ۇيالتۋ ارقىلى «تاربيەلەۋ» سيپاتى بارىن ايتىپ, ونىڭ ادامنىڭ قادىر-قاسيەتىنە قايشى كەلۋى مۇمكىن ەكەنىن العا تارتتى.
قازىرگى ۋاقىتتا بۇل ۇسىنىس زاڭدى تۇردە قابىلدانعان جوق, تەك قوعام تالقىلاۋىنا ۇسىنىلىپ وتىر. سوڭعى شەشىم 14 ماۋسىمنان كەيىن قابىلدانادى. قوعامدىق پىكىر مەن ازاماتتىق بەلسەندىلەردىڭ رەاكتسياسى بۇل وزگەرىستىڭ بولاشاعىن ايقىندايتىن نەگىزگى فاكتورلاردىڭ ءبىرى بولماق.
جانەل تولەۋبەكوۆا, ەۇۋ ستۋدەنتى
