فوتو: اشىق دەرەككوز
وقيعا مەيرامحانانىڭ ويىن بولمەسىندە بولعان. بالا دوسىمەن بىرگە قۇرعاق باسسەيندە ويناپ جۇرگەن. ولار ءبىر-بىرىنە جۇمساق شارلار لاقتىرعان ساتتە, سول ماڭدا وتىرعان باسقا بالانىڭ اكەسى كەنەتتەن تۇرىپ, ەشقانداي ەسكەرتۋ جاساماستان, بالانى بىرنەشە رەت ۇرعان.
«بالا پسيحولوگيالىق جاراقات الدى. قازىر ول بارلىق ەرەسەك, تولىق دەنەلى ادامداردان قورقادى. كوشەدە بىرەۋ جانىنان وتە قالسا – «ول سول ادام, ول قايتا كەلدى» دەپ ۇرەيلەنەدى», دەيدى ادۆوكات. ونىڭ ايتۋىنشا, وقيعا بەينەباقىلاۋ كامەرالارىنا جازىلىپ قالعان. كادرلاردان ەر ادامنىڭ بالانىڭ ارقا تۇسىنا, كەۋدە تۇسىنا جانە بوكسەسىنە قاتتى سوققى جاساعانى انىق كورىنەدى. كەيىن بالا اتا-اناسىمەن بىرگە №1 بالالار اۋرۋحاناسىنا جەتكىزىلىپ, كەۋدە ايماعىنداعى كوگەرگەن جەرلەرى تىركەلگەن.
اناسى دەرەۋ پوليتسياعا حابار بەرگەنىمەن, قۇقىق قورعاۋ ورگاندارى ءتيىستى ارەكەت جاساماعان.
«بىزدە دالەل رەتىندە بىرنەشە تەلەفوننان «102»-گە 11 رەت قوڭىراۋ شالعانىمىز تىركەلگەن. الايدا سول كۇنى ەشكىم كەلمەدى. اناسى ءوز بەتىمەن اۋرۋحاناعا بارىپ, تۇندە ارىز جازۋعا ءماجبۇر بولدى», دەيدى جاننا ۋرازباحوۆا.
باستاپقىدا بۇل ءىس توقتاتىلعان. الايدا مەدەۋ اۋدانىنىڭ پروكۋراتۋراسى تەرگەۋدىڭ توقتاتىلۋىن زاڭسىز دەپ تانىپ, ءىستى قايتا قوزعاعان. قازىر تەرگەۋمەن جاڭا انىقتاۋشى اينالىسىپ جاتىر.
جابىرلەنۋشى تاراپتىڭ ايتۋىنشا, سوققى جاساعان ەر ادام الماتى قالاسى اكىمدىگىنىڭ قوعامدىق كەڭەسىنىڭ مۇشەسى بولۋى مۇمكىن. بۇل دەرەك رەسمي تۇردە ءالى ناقتىلانباعانىمەن, قوعامدا ۇلكەن رەزونانس تۋدىرىپ وتىر.
الماتى قالالىق پوليتسيا دەپارتامەنتى بۇل فاكتى بويىنشا قىلمىستىق ءىس قوزعالعانىن راستادى.
«بارلىق وبەكتيۆتى ءمان-جايلار انىقتالعاننان كەيىن, زاڭ اياسىندا شەشىم قابىلدانادى. ۋچاسكەلىك ينسپەكتور وقيعا ورنىنا «102»-گە سيگنال تۇسكەننەن كەيىن 6 مينۋت ىشىندە جەتكەن», دەپ حابارلادى ۆەدومستۆو.
جانەل تولەۋبەكوۆا, ەۇۋ ستۋدەنتى
