فوتو: اشىق دەرەككوز
ەجەلگى گرەكتەر تاريحي جازبالارىن, ەسكەرتكىشەرىن, ونەر تۋىندىلارىن ساقتايتىن عيماراتتى «مۋزەي» دەپ اتاعان. وندا ونەر يەلەرىنە شابىت سىيلاۋشى پىرلەر ياكي مۋزالار ءومىر سۇرەدى دەپ ەسەپتەگەن. وسىلايشا الەمگە «مۋزەي» سوزى كەڭ تارالىپ كەتتى.
بۇل تۋرالى استانا قالاسىنداعى ۇلتتىق مۋزەيدىڭ ءباسپاسوز ءبولىمىنىڭ باسشىسى ايگۇل ايتمۇحانوۆا دا ايتىپ بەردى:
«مۋزەي» – جالپىعا تۇسىنىكتى حالىقارالىق تەرمين. ەلىمىزدىڭ باس قالاسىندا ورنالاسقان سوڭ, الىس-جاقىن ەلدەردەن كەلگەن قوناقتارعا بۇل عيماراتتىڭ مادەنيەت كومبەسى, ونەر سارايى – مۋزەي ەكەندىگى تۇسىنىكتى بولۋى كەرەك. ماماندار سول سەبەپتەن وسى اتاۋعا تۇراقتاعان», دەيدى ول.
بۇعان قوسا قازىرگى مۋزەيلەر – مۇرالاردى ساقتاۋمەن عانا ەمەس,ء تۇرلى مادەني ءىس-شارالاردى وتكىزىپ, حالىققا ونەردى تانىتۋمەن اينالىساتىنىن جەتكىزدى.
«سوندىقتان «مۇراجاي» دەپ اتايتىن بولساق, بۇل اتاۋ ونىڭ قىزمەتىنىڭ ءمانىن تولىق اشپايدى. ال «مۋزەي» تەرمينىنىڭ اياسى كەڭ. وعان ءبارى سيادى. مۋزىكالىق, پەداگوگيكالىق, ءتىپتى تەاتر باعىتىندا جۇيەلى جۇمىستار اتقارىلاتىن بۇل مەكەمەگە حالىقارالىق تەرميندى بەكىتۋ ابدەن ورىندى», دەيدى مۋزەي قىزمەتكەرى ا. ايتمۇحانوۆا.
فيلولوگيا عىلىمدارىنىڭ كانديداتى, SDU University پروفەسسورى بايان كەرىمبەكوۆانىڭ ايتۋىنشا, «مۇراجاي» –مۋزەيدىڭ بالاماسى رەتىندە كوپشىلىك قۇلاعى ۇيرەنگەن ءسوز.
«ەگەر تىلىمىزدە سول ماعىنانى بەرەر ءسوز بولسا, نەگە وزگە تىلدەگى ءسوزدى پايدالانامىز؟» دەگەن كوزقاراسپەن قاراساق, «مۋزەيدى» «مۇراجاي» دەگەنىمىز دۇرىس. دەگەنمەن, ەسكەرەر ءبىر ماسەلە بار سياقتى. ەگەر «مۋزەي» ءسوزىن اۋداراتىن بولساق, وندا «ۋنيۆەرسيتەت», «اكادەميا», «تەاتر» دەگەن سوزدەردى دە اۋدارۋ كەرەك بولادى. ال بۇلاردى قازاقشالاۋ كەرەك پە؟», دەيدى ول.
بۇعان ارداگەر مۇعالىم كەڭەسكۇل اياپوۆا دا قوسىلادى.
«قازاقستان تاۋەلسىزدىك العالى كوپتەگەن ءسوزدىڭ قازاقشا اتاۋى پايدا بولدى. «مۋزەي» ەمەس «مۇراجاي» دەگەنىمىز دۇرىس. ءسوزدىڭ تۇبىرىنە قاراساڭ, «مۇرا» – اتا-بابامىزدان جەتكەن اسىل قازىنا. «جاي» – سول اسىلدى ساقتايتىن ورىن. ءبىزدىڭ جان-جاقتى جەتىلۋىمىز ءۇشىن, جاھاندىق وزگەرىستەرگە جۇتىلماي, ەل بولىپ قالۋىمىز ءۇشىن-مۇراجاي ءسوزىنىڭ ورنى ەرەكشە. قازاق ءتىلىنىڭ تازالىعىن ساقتاۋ– ەڭ باستى مىندەت», دەيدى ول.
ءيا, بۇل تاقىرىپ توڭىرەگىندە كەسىپ-ءپىشىپ پىكىر ايتۋ قيىن.ء تىل ماماندارىنىڭ اراسىندا دا ورتاق مامىلە جوق. ال عىلىم جانە جوعارى ءبىلىم مينيسترلىگىنە قاراستى ءتىل ساياساتى كوميتەتىنىڭ 2017 جىلى بەكىتكەن نۇسقاسىنا سايكەس, اتالعان مادەنيەت وشاعىنىڭ رەسمي اتاۋى – مۋزەي بولىپ وتىر.
داميرا تولەگەن,
ەۇۋ ستۋدەنتى.
