سولتۇستىك قازاقستان وبلىسىنىڭ اۋماعى 98 مىڭ, قورعان وبلىسىنىڭ اۋماعى 71,5 مىڭ شارشى شاقىرىم. بىزدەگى حالىق سانى 540 مىڭداي بولسا, قورعاندا 744 مىڭ حالىق ءومىر سۇرەدى. قازىر ەكى ءوڭىردىڭ دە حالقى ازايۋ ۇستىندە. سولتۇستىك قازاقستاننىڭ حالقى 2020 جىلى 548 مىڭ ادام بولسا, قازىر 540 مىڭعا تۇسكەن, قورعان وبلىسىندا 2002 جىلى حالىق سانى ءبىر ميللوننان اسسا, قازىر 740 مىڭنىڭ توڭىرەگىندە. قورعان وبلىسىنىڭ اۋماعىندا تەمىر كەن ورىندارى مول, ءتىپتى تيتان-تسيركوني ۋچاستوكتارى دا تابىلعان. سونىمەن بىرگە ونەركاسى ءبىرشاما جاقسى دامىعان. ءبىزدىڭ وبلىسىمىزداعى نەگىزگى ونەركاسىپ ورىندارىنىڭ ءبارى اسكەري-ونەركاسىپتىك كەشەنىنىكى بولىپ, كەڭەس وداعى قۇلاعاندا ولارعا سۇرانىس جوعالىپ, زاۋىتتار توقىراپ قالسا, قورعاننىڭ بەيبىت ءومىردىڭ ونىمدەرىن شىعاراتىن كاسىپورىندارى ساقتالىپ قالعان.
كەيىنگى بەس جىلدا ەكى وبلىستىڭ اراسىنداعى تاۋار اينالىمى 1,6 ەسە ءوسىپ, 700 ملن دوللار كولەمىنە جەتتى. بىراق ونىڭ ەكىجاققا ءتيىمدى جاعدايدا بۇدان دا كوبىرەك وسۋگە مۇمكىندىگى بار. جۋىردا سولتۇستىك قازاقستان وبلىسىنىڭ اكىمى عاۋەز نۇرمۇحامبەتوۆ باستاعان رەسمي دەلەگاتسيا قورعان وبلىسى گۋبەرناتورىنىڭ شاقىرۋىمەن رەسەي فەدەراتسياسىنا ساپارلاپ باردى. ونىڭ ناتيجەلى بولۋىنا قازاقستاننىڭ رەسەيدەگى توتەنشە جانە وكىلەتتى ەلشىسى د.اباەۆ پەن قازاقستاننىڭ ەكاتەرينبۋرگ قالاسىنداعى باس كونسۋلى ج.مامىتبەكوۆ ۇلەس قوستى.
قورعان وبلىسىنىڭ گۋبەرناتورى ۆاديم شۋمكوۆپەن وتكەن كەزدەسۋدە ەكىجاقتى ارىپتەستىكتى ودان ءارى كەڭەيتۋ كەلەشەگى تالقىلاندى. وسى ماقساتتا ساۋدا-ەكونوميكالىق, عىلىمي-تەحنيكالىق, گۋمانيتارلىق سالالارداعى ىنتىماقتاستىق تۋرالى ەكىجاقتى كەلىسىمدەرگە قول قويىلدى.
بيزنەس-باستامالار مەن بىرلەسكەن ينۆەستيتسيالىق جوبالاردى جۇزەگە اسىرۋ ماسەلەلەرىنە ەرەكشە كوڭىل ءبولىندى. بۇل تاقىرىپتار شەكارالاس ەكى وبلىستىڭ ىسكەر توپتارىمەن وتكەن ديالوگتىڭ وزەگىنە اينالدى. سولتۇستىك قازاقستان مەن قورعان وبلىسىنىڭ كاسىپكەرلەرى B2B فورماتىندا ماسەلەلەرگە ناقتىراق توقتالدى.
قول قويىلعان قۇجاتتار اراسىندا – ءبىزدىڭ وبلىس پەن قورعان وبلىسىنىڭ ساۋدا-ونەركاسىپ پالاتاسى اراسىنداعى كەلىسىم, «سولتۇستىك» اكك جانىنداعى ينۆەستورلاردى قولداۋ جانە يننوۆاتسيالاردى دامىتۋ ورتالىعى مەن «اگروكومپلەكس كۋرگانسەمەنا» جشق اراسىنداعى مەموراندۋم, سونداي-اق «كۋرگاندورماش» اق مەن «قىزىلجار» اەا اراسىنداعى ىنتىماقتاستىق تۋرالى مەموراندۋمدار بولدى. كوممۋنالدىق جانە ارنايى تەحنيكا شىعاراتىن «كۋرگاندورماش» «قىزىلجار» ارنايى ەكونوميكالىق ايماعىندا كاسىپورىن اشۋدى جوسپارلاپ وتىر.
وندىرىستىك الەۋەتتى تەرەڭىرەك زەردەلەۋ ماقساتىندا ءبىزدىڭ دەلەگاتسيا «كۋرگاندورماش», «كۋرگانستالموست», «ۆەزدەحودى بۋرلاك» كاسىپورىندارى مەن يندۋستريالىق پاركىنە بارىپ, ءوندىرىس ۇدەرىستەرىمەن تانىستى. بۇل نىساندار ونەركاسىپتىك كووپەراتسيا مەن تەحنولوگيا الماسۋ تۇرعىسىنان پراكتيكالىق قىزىعۋشىلىق تۋدىردى.
سونىمەن قاتار وبلىس اكىمى عاۋەز تورسان ۇلى قورعاندا تۇراتىن قازاق دياسپوراسىمەن جىلى ءجۇزدى كەزدەسۋ وتكىزدى. جۇزدەسۋ بارىسىندا قولداۋ, ءبىلىم بەرۋ جانە مادەني بايلانىستاردى كەڭەيتۋ ماسەلەلەرى قوزعالدى.
ساپار بارىسىندا وبلىس اكىمى رەسەي فەدەراتسياسىنىڭ قورعان وبلىسىنىڭ شەكاراسىنا دەيىنگى رەسپۋبليكالىق اۆتوجولدى قايتا جاڭارتۋ جۇمىستارىنىڭ بارىسىن تەكسەردى. «قازاۆتوجول» اق سالىپ جاتقان جولدىڭ قۇرىلىسى بەلگىلەنگەن مەرزىمدە اياقتالماي, سوزىلىپ كەتكەن ەدى. ع.نۇرمۇحامبەتوۆ جۇمىستى قارقىندى جۇرگىزۋ ءۇشىن جاڭا مەردىگەرمەن قول قويىلىپ, ونىڭ جوندەۋ جۇمىستارىنا كىرىسكەنىن ەسكەرتتى.
جول «جاڭاجول» شەكارالىق وتكىزۋ-تەكسەرۋ پۋنكتتە اپارادى, ونى دا بيىل اۋقىمدى قايتا جاڭعىرتۋ جوسپارلانعان. جوبا اياسىندا جاڭا قۇرىلىستار سالۋ, كىرەبەرىس, شىعۋ باعىتتارىن ءبولۋ, جولدى ءتورت جولاقتى ەتىپ كەڭەيتۋ, زاماناۋي تەكسەرۋ جۇيەلەرىن ەنگىزۋ جانە جاراقتار ورناتۋ كوزدەلگەن. مۇنىڭ بارلىعى شەكارادان وتەتىن ازاماتتارعا قولايلى جاعداي جاساپ, ءوتۋ ۋاقىتىن ايتارلىقتاي قىسقارتۋعا باعىتتالعان.
سولتۇستىك قازاقستان وبلىسى
