تەحنيكالىق جانە كاسىپتىك, ورتا بىلىمنەن كەيىنگى ءبىلىمى بار كادرلاردى دايارلاۋعا ارنالعان مەملەكەتتىك ءبىلىم بەرۋ تاپسىرىسىن قالىپتاستىرۋ مەن ءبولۋ جونىندەگى كوميسسيا ارنايى تالداۋ جاساپ, تالاپكەرلەردىڭ ماماندىقتارعا ءتۇسۋ جانە تۇسپەۋىن زەردەلەگەن. سونىڭ ناتيجەسىندە بولىنگەن گرانتتار تولىق يگەرىلىپ كەلەدى. وبلىستىق ءبىلىم باسقارماسى باسشىسىنىڭ ورىنباسارى ايگۇل قاسىمبەكوۆانىڭ ايتۋىنشا, وبلىس اكىمدىگىنىڭ سالالىق باسقارمالارى, وڭىرلىك كاسىپكەرلەر پالاتاسى, 17 اۋدان جانە قالا اكىمدىگى, كاسىپورىنداردان 110 ماماندىق بويىنشا 23 مىڭنان اسا ورىنعا سۇرانىس كەلگەن. بيىل وڭىردەگى كوللەدجدەرگە 15 500 ورىنعا گرانت قاراستىرىلىپ وتىر. ونىڭ ىشىندە 9600-ءى جۇمىسشى ماماندىقتارىنا ارنالعان.
