«بۇگىن 2024–2025 وقۋ جىلىن ءساتتى اياقتاپ, زامانداستارىنىڭ ورتاسىنان بىلىمىمەن, ونەرىمەن تانىلىپ, «جۇزدەن جۇيرىك» اتانعان, وبلىسىمىزدىڭ ابىرويىن اسقاقتاتقان جاس دارىندارمەن كەزدەسىپ وتىرعانىما قۋانىشتىمىن», – دەگەن وبلىس اكىمى مارات سۇلتانعازيەۆ بيىل وبلىستاعى 483 مەكتەپتە 352 مىڭنان استام وقۋشى ءبىلىم العانىن اتاپ ءوتتى.
جالپى ءبىلىم ساپاسى 68,3%-كە جەتكەن. بيىل 17 مىڭنان استام تۇلەك مەكتەپ بىتىرسە, ولاردىڭ 1433-ءى – «التىن بەلگى», 1513-ءى – «ۇزدىك اتتەستات» يەگەرى اتانعان.
وبلىس اكىمى مۇعالىمدەردىڭ تىنىمسىز ەڭبەگىنىڭ ارقاسىندا وقۋشىلاردىڭ ءبىلىم ساپاسى جىل سايىن ارتىپ كەلەتىندىگىن تىلگە تيەك ەتتى. اتاپ ايتساق, 2022–2023 وقۋ جىلىندا 104 وقۋشى حالىقارالىق جانە رەسپۋبليكالىق دەڭگەيدەگى ءبىلىم سايىستارىندا جەڭىمپاز اتانسا, وتكەن وقۋ جىلىندا بۇل كورسەتكىش 145-كە جەتكەن. بيىل بۇل سان 160-قا دەيىن ءوسىپ وتىر.
«الماتى وبلىسى – دارىندى جاستاردىڭ ورداسى. مۇنى تەك وبلىس ورتالىعى عانا ەمەس, شالعاي اۋىل وقۋشىلارى دا دالەلدەپ كەلەدى. استانا قالاسىندا وتكەن اۋىل مەكتەپتەرىنە ارنالعان وليمپيادادا وبلىس كومانداسى «ەڭ ۇزدىك وليمپيادالىق كوماندا» اتانىپ, ءى جانە ءىى ورىندارعا يە بولدى», – دەدى ءوڭىر باسشىسى.
ءىس-شارا اياسىندا 22 وقۋشى وبلىس اكىمىنىڭ العىس حاتىمەن ماراپاتتالدى. سونىمەن قاتار, دارىندى شاكىرتتەر دايىنداعان الاتاۋ قالاسىنداعى №47 ورتا مەكتەپتىڭ فيزيكا ءپانى مۇعالىمى سۆەتلانا بەكمۇحامبەتوۆا, ەسىك قالاسىنداعى ء«بىلىم-يننوۆاتسيا» ليتسەيىنىڭ گەوگرافيا ءپانى مۇعالىمى تامارا ەششانوۆا, ىلە اۋدانىنداعى №38 مەكتەپتىڭ قۇقىق ءپانى مۇعالىمى لەيلا نارىموۆا, ەڭبەكشىقازاق اۋدانى راحات №1 ورتا مەكتەبىنىڭ حيميا ءپانى مۇعالىمى نۇرتاي ەرنازارعا ءوڭىر باسشىسى العىسىن ءبىلدىردى.
دارىندى وقۋشىلار قاتارىندا حالىقارالىق وليمپيادا جەڭىمپازدارى مەن بەدەلدى ۋنيۆەرسيتەتتەردىڭ گرانت يەگەرلەرى بار. ولاردىڭ قاتارىندا تالعار اۋدانى «دانا» مەكتەبىنىڭ وقۋشىسى, ەكونوميكا سالاسىنداعى حالىقارالىق وليمپيادالاردىڭ بىرنەشە دۇركىن جەڭىمپازى, اقش, ۇلىبريتانيا جانە رەسەي ۋنيۆەرسيتەتتەرىنىڭ گرانت يەگەرى جاڭگىر يلجانوۆ, ەسىك قالاسىنداعى ء«بىلىم-يننوۆاتسيا» ليتسەيىنىڭ وقۋشىسى حالەل ءمۇسلىم, ىلە اۋدانىنىڭ وكىلى بەكمۇحامەت ايشا جانە ۇيعىر اۋدانىنان يبادۋللاەۆا شاحريزاتتىڭ ەسىمدەرى ايرىقشا اتالادى.
«قۇرمەتتى وقۋشىلار! ءبىلىم – شەكسىز مۇمكىندىككە باستايتىن جول. ىزدەنۋدەن, وقۋدان, جاڭاشىلدىقتان ەشقاشان جالىقپاڭىزدار. ەلىمىزدىڭ بولاشاعى – سىزدەرسىزدەر. ءاربىر قادامدارىڭىز تەك بيىك ماقساتتارعا جەتەلەي بەرسىن», – دەپ ءسوزىن قورىتىندىلاعان ءوڭىر باسشىسى وقۋشىلارعا ۇلكەن سەنىم ارتىپ, اق جول تىلەدى.
الماتى وبلىسى.
