قازىرگى تاڭدا وبلىستا حالىقتىڭ دەنە بەلسەندىلىگىن ارتتىرۋ ماقساتىندا 600-دەن استام سپورت نىسانى جۇمىس ىستەپ تۇر. سونىمەن قاتار, بىرنەشە اۋداندا جاڭا سپورتتىق ينفراقۇرىلىمداردىڭ قۇرىلىسى قارقىندى جۇرگىزىلۋدە.
وبلىستىق دەنە شىنىقتىرۋ جانە سپورت باسقارماسىنىڭ مالىمەتىنشە, وڭىردە 1 ستاديون, 25 سپورت كەشەنى, 12 ءجۇزۋ باسسەينى, 75 اشىق حوككەي كورتى, 1 اتۋ ءتيرى, 1 تەننيس كورتى, 7 يپپودروم جانە 488 الاڭ, ولاردىڭ قاتارىندا شاعىن فۋتبول, سپورتتىق جانە ۆوركاۋت الاڭدارى تۇرعىنداردىڭ دەنساۋلىعىن نىعايتۋعا جانە بوس ۋاقىتتارىن ءتيىمدى ءارى پايدالى وتكىزۋى ءۇشىن جابدىقتالعان.
– بۇقارالىق سپورتتى دامىتۋ, حالىقتىڭ بارلىق جاس ساناتىن دەنە بەلسەندىلىگىنە تارتۋ باعىتىندا ايماعىمىزدا جاڭا نىسانداردىڭ قۇرىلىسى جالعاسۋدا. قازىرگى ۋاقىتتا بەسقاراعاي اۋىلىندا ءجۇزۋ باسسەينى, كوكا اۋىلىندا «قازاقستان حالقىنا» قورىنىڭ قولداۋىمەن انگار تيپىندەگى مودۋلدىك سپورت زالى, كۋرچاتوۆ قالاسىندا دەنە شىنىقتىرۋ-ساۋىقتىرۋ كەشەنى, اباي اۋدانىنىڭ كوكباي اۋىلىندا سپورتتىق مودۋل, جاڭاسەمەي اۋدانىنىڭ العاباس اۋىلىندا دەنە شىنىقتىرۋ-ساۋىقتىرۋ كەشەنى جانە بورودۋليحا اۋدانىنىڭ پەتروپاۆلوۆكا اۋىلىندا سپورتتىق-ساۋىقتىرۋ ورتالىعىنىڭ قۇرىلىسى جۇرگىزىلىپ جاتىر, – دەدى اباي وبلىسى دەنە شىنىقتىرۋ جانە سپورت باسقارماسى باسشىسىنىڭ ورىنباسارى باقىت بەكبوسىنوۆ.
ونىڭ ايتۋىنشا, دەمەۋشىلەردىڭ قولداۋىمەن دە بىرقاتار نىساندار بوي كوتەرۋدە. اتاپ ايتقاندا, ءۇرجار اۋدانىنىڭ جاناي اۋىلىندا جاڭا سپورت زالى, سەمەي قالاسىندا جابىق فۋتبول مانەجىنىڭ قۇرىلىسى جالعاسۋدا.
سونداي-اق, 2026–2028 جىلدارعا جوسپارلانعان ءىرى جوبالار قاتارىندا اياگوز قالاسىندا دەنە شىنىقتىرۋ-ساۋىقتىرۋ كەشەنى, اباي اۋدانىنىڭ سارجال اۋىلىندا جانە جارما اۋدانىنىڭ جاڭعىزتوبە اۋىلىندا سپورتتىق مودۋلدەر, سەمەي قالاسىنىڭ ۆودنىي جانە بوبروۆكا كەنتتەرىندە سپورت كەشەندەرى بار. سونىمەن قاتار سەمەيدىڭ جاڭا ىقشام اۋدانىندا تەننيس ورتالىعى, امبەباپ مۇز ايدىنى, ستاديون, ۇلكەن تەننيسكە ارنالعان سپورت كەشەنى, مۇز ايدىنى جانە لوكوموتيۆ ستاديونى اۋماعىندا 80 ورىندىق قوناقۇيى بار كوپفۋنكتسيونالدى سپورت كەشەنىنىڭ قۇرىلىسى جوسپارلانعان.
