سۋرەت: egov.kz
ەڭبەك جانە حالىقتى الەۋمەتتىك قورعاۋ مينيسترلىگى ءباسپاسوز قىزمەتىنىڭ مالىمەتىنشە, 2025 جىلعى 1 مامىردا جاردەماقى الۋشىلار سانى 540,4 مىڭ ادام بولسا, بۇعان قوسا اسىراۋشىسىنان ايىرىلعان 196,7 مىڭ ادامعا تولەم بەرىلگەن.
مۇگەدەكتىگى بويىنشا مەملەكەتتىك الەۋمەتتىك جاردەماقىلاردىڭ مولشەرى مۇگەدەكتىكتىڭ توبىنا, سىرقاتىنىڭ سەبەبىنە قاراي بەلگىلەنەدى. قارجى «رەسپۋبليكالىق بيۋدجەت تۋرالى» زاڭدا بەلگىلەنگەن ەڭ تومەن كۇنكورىس دەڭگەيىنىڭ شاماسىنا بايلانىستى بولادى.
اسىراۋشىسىنان ايىرىلۋ جاعدايىندا مەملەكەتتىك الەۋمەتتىك جاردەماقىلاردىڭ مولشەرى قايتىس بولعان اسىراۋشىنىڭ قامقورلىعىنداعى ادامداردىڭ سانىنا, قايتىس بولۋ سەبەپتەرىنە, ەڭ تومەن كۇنكورىس دەڭگەيىنە قاتىستى.
بۇدان باسقا, مىندەتتى الەۋمەتتىك ساقتاندىرۋ جۇيەسىنە قاتىسۋشىلارعا الەۋمەتتىك تاۋەكەلدەر تۋىنداعان جاعدايدا تولەم اۋدارىلادى. بيىل 91,7 مىڭ ادام ەڭبەك ەتۋ قابىلەتىنەن ايىرىلعاندىقتان الەۋمەتتىك تولەم العان. 63,5 مىڭعا جۋىق وتباسىنا اسىراۋشىسىنان ايىرىلۋىنا بايلانىستى الەۋمەتتىك تولەم بەرىلگەن.
تولەمدەردىڭ مولشەرى كەيىنگى 2 جىلداعى ماسق-عا الەۋمەتتىك اۋدارىمدار جۇرگىزىلگەن ورتاشا ايلىق تابىس, ەڭبەككە قابىلەتتىلىگىنەن ايىرىلۋ كوەففيتسيەنتتەرى, اسىراۋىنداعى ادامدار سانى, مىندەتتى الەۋمەتتىك ساقتاندىرۋ جۇيەسىنە قاتىسۋ ءوتىلى مەن تابىستى اۋىستىرۋىنا قاراي بەلگىلەنەدى.
بۇل تولەمدەر رەسپۋبليكالىق بيۋدجەتتەن تولەنەتىن ۇقساس جاردەماقىلارعا قوسىمشا بەرىلەدى.
مۇگەدەكتىگى مەن اسىراۋشىسىنان ايىرىلۋ جاعدايىندا مەملەكەتتىك الەۋمەتتىك جاردەماقىلاردىڭ مولشەرى كوبەيدى. بيىلعى 1 قاڭتاردان باستاپ ەڭ تومەن كۇنكورىس دەڭگەيىنىڭ ۇلعايۋىنا بايلانىستى 6,5%-عا ءوستى. ۇكىمەتتىڭ شەشىمىمەن ەڭبەككە قابىلەتتىلىگىنەن, اسىراۋشىسىنان ايىرىلعاندا ماسق-دان بەرىلەتىن تولەمدەردىڭ مولشەرى دە 6,5%-عا ارتتى.
ماسەلەن, بيىل اۋرۋدان مۇگەدەكتىگى بويىنشا ءماج مولشەرى 1-توپ ءۇشىن – 101 702, 2-توپ ءۇشىن – 81 362, 3-توپ ءۇشىن – 55 474 تەڭگەگە جەتتى. ەڭبەككە قابىلەتتىلىگىنەن ايىرىلعاندارعا الەۋمەتتىك تولەمدەردىڭ ورتاشا مولشەرى 70 124 تەڭگە بولسا, اسىراۋشىسىنان ايىرىلعاندارعا 72 524 تەڭگە كولەمىندە قاراجات اۋدارىلادى.
