بۇل قالقىمالى قوقىس جوباسى – قورشاعان ورتاعا پايداسىن تيگىزەدى. اسىرەسە سۋ بەتىندە جينالىپ قالعان قوقىستاردى تازارتادى. قۇرىلعىنىڭ ءپروتوتيپى سۋ ايدىندارىن تازارتۋ جانە ەكولوگيالىق جاعدايدى جاقسارتۋ بويىنشا ۇلكەن جوباعا نەگىز بولا الادى.
ستارتاپ جوبا «قازاقمىس كورپوراتسياسى» جشس جانە «The Ulytau educational foundation» قوعامدىق قورى ۇيىمداستىرعان «تۋعان جەرگە قامقورلىق» اتتى بايقاۋدا جۇلدەلى ورىن الىپ, 1 500 000 تەڭگە سىياقى الدى.
سونداي-اق «TAU» كومانداسى «ەكوتازارتقىش» جوباسىن وبلىس كولەمىندە قورعاپ, استانا قالاسىندا وتكەن «Smart city» يننوۆاتسيالىق جوبالار بايقاۋىندا سەرتيفيكاتقا يە بولسا, رەسپۋبليكالىق «Steam local change» بايقاۋىندا جەڭىمپاز اتانىپ, ارنايى گرانتقا قول جەتكىزدى.
سونىمەن قاتار بالالاردى عىلىمعا باۋلىعان مۇعالىمدەردىڭ ەڭبەگى دە رەسپۋبليكا دەڭگەيىندە ناسيحاتتالىپ وتىر. قازىر جوباعا اۆتورلىق پاتەنت الۋ جۇمىسى جۇزەگە اسىپ, جوبا جەتەكشىسى مارجان احانوۆا ى.التىنسارين اتىنداعى ۇلتتىق ءبىلىم اكادەمياسى ۇسىنعان «اۋىل مەكتەپتەرى پەداگوگتەرىنىڭ وزىق تاجىريبەلەرىن تاراتۋ بويىنشا ادىستەمەلىك ۇسىنىمدار» ادىستەمەلىك جيناعىنا ەندى.
جاقىندا ۇلىتاۋ وبلىسى ءبىلىم باسقارماسىنىڭ دارىندى بالالاردى انىقتاۋ جانە قولداۋ جونىندەگى « ۇلىتاۋ دارىنى» ورتالىعىنىڭ ۇيىمداستىرۋىمەن №8 گيمنازيادا جالپى ءبىلىم بەرەتىن پاندەر بويىنشا 8-11 سىنىپ وقۋشىلارىنىڭ رەسپۋبليكالىق عىلىمي جوبالار بايقاۋى ءوتتى. وسى بايقاۋدىڭ ەكىنشى كەزەڭىنىڭ قورىتىندى ناتيجەسىندە ۇلىتاۋ اۋدانىنداعى №1 تىرەك مەكتەبىنىڭ وقۋشىسى ايدا ەركەعۇلوۆا «ەكونوميكالىق جانە الەۋمەتتىك ۇردىستەردى ماتەماتيكالىق مودەلدەۋ» باعىتى بويىنشا «ەكوتازارتۋشى» تاقىرىبىندا جوباسىن قورعاپ, جۇلدەلى ورىن يەلەندى.
ۇلىتاۋ وبلىسى
