مايقايىڭ كەنتىنىڭ تۇرعىنى ماحاببات ءابساتتاروۆانىڭ ايتۋىنشا, قىزىل-قوڭىر تۇستەس قوڭىزدار كەيىنگى كۇندەرى جەر ۇيلەردىڭ ماڭايىنا تولىپ كەتكەن.
– ۇيلەرىمىزدىڭ ماڭايىندا قوڭىزدان اياق الىپ جۇرەتىن جەر جوق. قوڭىزدار جەر استىنان شىقتى ما, بىلمەيمىز, ايتەۋىر كەن جىنىستارى ۇيىلگەن جاقتان توپ-توبىمەن ۇزدىكسىز كەلىپ جاتىر. باۋ-باقشالاردى, جاسىل ءشوپتى جەرلەردى بىلاي قويىپ, ءۇي قابىرعالارىنا ورمەلەپ, ءتىپتى كەيبىر ءۇيدىڭ ىشىنە كىرىپ جاتقانى بايقالادى. بۇعان قوسا ۇلكەن بۇيىلەر پايدا بولدى. بالالارىمىز توسەككە جاتۋدان قورقادى, – دەيدى تۇرعىن.
كوپشىلىكتىڭ ايتۋىنشا, قوڭىزدارعا ءۇي جاعدايىنداعى حيميالىق زاتتار ەشقانداي اسەر ەتپەيتىن كورىنەدى. كەيبىرەۋلەر سىركە سۋىن قۇيىپ, سارىمساق سۋىمەن دە وڭدەپ كورىپتى. ودان ەش ناتيجە شىقپاعان سوڭ جەرگىلىكتى اكىمدىككە حابارلاسىپ, كومەكتەسۋدى وتىنگەن.
كەنت اكىمى ەرباتىر مولداتاەۆ اتالعان جايت جونىندە فيتوسانيتاريا ورگاندارىنا حات جازىلعانىن جەتكىزدى. ەندى جاۋابىن كۇتىپ وتىر. ايتۋىنشا, قوڭىزدار مەن بۇيىلەردىڭ قاپتاۋى ازىرشە جەر ۇيلەر ورنالاسقان «شانحاي» شاعىن اۋدانىندا عانا بايقالىپ وتىر. جاعداي بۇلاي جالعاسا بەرسە جاندىكتەر كەنتتىڭ بارلىعىن جايلاۋى عاجاپ ەمەس. سوندىقتان فيتوسانيتاريالىق مەكەمەلەر قولۇشىن بەرەدى دەگەن ۇمىتتە. قازىرگى ۋاقىتتا كەنتتە 10 مىڭعا تارتا حالىق تۇرادى.
اگروونەركاسىپتىك كەشەندەگى مەملەكەتتىك ينسپەكتسيا كوميتەتىنىڭ پاۆلودار وبلىستىق اۋماقتىق ينسپەكتسياسىنىڭ باسشىسى ارمان شۇيكەنوۆتىڭ مالىمدەۋىنشە, بۇل قوڭىزدار «راپس جاپىراق جەمىرى» دەپ اتالادى. سىرتقى ءتۇرى كولورادو قوڭىزىنا ۇقسايدى.
– راپس جاپىراق جەمىرى ورامجاپىراق تۇقىمداسىنىڭ جابايى وسىمدىكتەرىمەن, سونداي-اق شالقان, ارپا, قىرىققابات, شالعاممەن قورەكتەنەتىن زيانكەس. جاندىك وسىمدىكتەر كارانتينى شارالارى بەلگىلەنەتىن, جۇرگىزىلەتىن كارانتيندىك وبەكتىلەر مەن وزگە دە تۇرلەرىنىڭ تىزىمىنە كىرمەيدى. سوعان سايكەس, ونى وڭدەۋگە بيۋدجەتتەن اقشا قاراستىرىلمايدى. قازىرگى جاعدايدا جاپىراق جەمىرى پاۆلودار وبلىسى بويىنشا اقسۋ قالاسىنا قاراستى اقجول اۋىلىندا, باياناۋىلدىڭ مايقايىڭ كەنتىندە, پاۆلودار اۋدانىنىڭ چەرنوياركا اۋىلىندا تىركەلىپ وتىر. باۋ-باقشاسى بارلارعا بۇل اسا زور قاۋىپ. ەلدى مەكەندەردە تارالسا, وعان حيميالىق وڭدەۋ جۇرگىزۋگە بولمايدى. تەك قولمەن تەرىپ الۋ, ورلار قازۋ سياقتى مەحانيكالىق جۇمىستار جۇرگىزىلۋگە ءتيىس. اۋماقتىق ينسپەكتسيا ماماندارى جەكە تۇرعىندارعا, باۋ-باقشالار مەن شارۋا قوجالىقتارىنىڭ يەلەرىنە پرەپاراتتاردى قولدانۋعا قاتىستى ۇسىنىستار بەرەدى. ازىرگە بىزگە مايقايىڭ كەنتىنەن شاعىم تۇسكەن جوق, – دەيدى باسقارما باسشىسى.
مامانداردىڭ ايتۋىنشا, راپس جاپىراق جەمىرىنىڭ كوبەيۋى ەلىمىزدە بىلتىردان بەرى بايقالعان. بۇعان ىلعالدىڭ مول بولۋى اسەر ەتۋى ىقتيمال. جاندىكتىڭ ادامعا ەش زيانى جوق.
پاۆلودار وبلىسى
