فوتو: اشىق دەرەككوز
مينيسترلىكتىڭ جاريالاعان قۇجاتىندا قازاقستانداعى كاسىبي مەرەكەلەر تىزبەسىنە كەلەسى جاڭا اتاۋلى كۇندەردى قوسۋ ۇسىنىلعان:
• قازاقستان كاسىپكەرلەرى كۇنى
• قازاقستان قولونەر شەبەرلەرى كۇنى
• تابيعي مونوپوليا قىزمەتكەرلەرى كۇنى
• سانيتاريالىق-ەپيدەميولوگيالىق قىزمەتكەرلەر كۇنى
• كادر قىزمەتى ماماندارى كۇنى
• قوعامدىق تاماقتانۋ قىزمەتكەرلەرى كۇنى
سونداي-اق ەنەرگەتيكتەر كۇنىنە قاتىستى وزگەرىس ەنگىزىلمەك. بۇعان دەيىن بۇل مەرەكە جەلتوقسان ايىنىڭ ءۇشىنشى جەكسەنبىسىندە اتالىپ وتسە, ەندى ناقتى كۇنى – 22 جەلتوقسان بولىپ بەلگىلەنۋى مۇمكىن.
اتالعان بۇيرىق جوباسى قوعامدىق تالقىلاۋعا شىعارىلعان. قۇجاتقا قاتىستى پىكىرلەر مەن ۇسىنىستاردى 12 ماۋسىمعا دەيىن جولداۋعا بولادى.
بۇعان دەيىن ءماجىلىس دەپۋتاتى كەنجەگۇل سەيىتجان قازاقستاندا بالالاردى قورعاۋ كۇنىنە (1 ماۋسىم) رەسمي مەملەكەتتىك مەرەكە مارتەبەسىن بەرىپ, بۇل كۇندى دەمالىس كۇنى رەتىندە بەكىتۋدى ۇسىنعان بولاتىن.
سونىمەن قاتار ماۋسىم ايىندا قازاقستاندىقتاردى قوسىمشا دەمالىس كۇتىپ تۇر. 6 ماۋسىم – جۇما كۇنى قۇربان ايت مەيرامىنا وراي رەسمي تۇردە دەمالىس كۇنى بولىپ بەكىتىلگەن.
ارايلىم مىرزاحان, ەۇۋ 2 كۋرس ستۋدەنتى
