سولاردىڭ ءبىرى – بۇقار-جىراۋ اۋدانىنىڭ جاڭاقالا اۋىلىندا انىقتالعان جاسىرىن ەسىرتكى زەرتحاناسى. جەدەل-ىزدەستىرۋ شارالارى بارىسىندا سينتەتيكالىق ەسىرتكى – مەفەدرون وندىرىسىمەن اينالىسقان زەرتحانا قىزمەتى توقتاتىلدى.
– ارنايى ءتىنتۋ كەزىندە ءتارتىپ ساقشىلارى ءبىر تونناعا جۋىق حيميالىق پرەكۋرسور مەن 500 گرامنان استام دايىن ەسىرتكى زاتىن تاركىلەدى. كۇدىكتى الماتى وبلىسىنىڭ 38 جاستاعى تۇرعىنى ۇستالىپ, ۋاقىتشا ۇستاۋ يزولياتورىنا قامالدى. اتالعان دەرەك بويىنشا قىلمىستىق كودەكستىڭ ءتيىستى بابى بويىنشا ءىس قوزعالدى, – دەپ حابارلادى قاراعاندى وبلىسىنىڭ پوليتسيا دەپارتامەنتىنىڭ باستىعى نەگمەت يسماگۋلوۆ.
بۇل بيىلعى جىلى انىقتالعان ەكىنشى ءىرى ەسىرتكى زەرتحاناسى. بۇعان دەيىن اسىل اۋىلىندا جۇرگىزىلگەن ارنايى وپەراتسيا بارىسىندا ءتارتىپ ساقشىلارى 200 كەلىگە جۋىق ەسىرتكى جانە ونى وندىرۋگە ارنالعان كاسىبي جابدىقتى تاركىلەگەن بولاتىن. وسى ىسكە قاتىسى بار دەگەن كۇدىكپەن الماتى قالاسىنىڭ 25 جاستاعى ەر ازاماتى مەن 29 جاستاعى ايەل ۇستالدى.
قازىرگى تاڭدا تەرگەۋ امالدارى جالعاسۋدا. قۇقىق قورعاۋ ورگاندارى ەسىرتكى وندىرىسىنە جانە تارالۋىنا قاتىسى بار بارلىق تۇلعالاردى انىقتاۋعا باعىتتالعان كەشەندى شارالاردى قولعا الدى.
قاراعاندى وبلىسىنىڭ پوليتسيا دەپارتامەنتى ەسىرتكى قىلمىستارىنا قارسى كۇرەس – قۇقىق قورعاۋ ورگاندارىنىڭ باستى باسىمدىعى بولىپ قالا بەرەتىنىن اتاپ وتەدى. زاڭسىز ەسىرتكى اينالىمىنا قارسى ءىس-قيمىل باعىتىنداعى جۇمىستار الداعى ۋاقىتتا دا جۇيەلى ءارى ۇزدىكسىز جالعاسىن تابادى.
قاراعاندى وبلىسى
