فوتو sportplustv.kz
27 مامىردا جاقسىلىق ۇشكەمپىروۆ اتىنداعى جەكپە-جەك سارايىندا وتەتىن حالىقارالىق تارتىسقا الەمدەگى ەڭ بەدەلدى ۇيىم سانالاتىن UFC ليگاسىنىڭ ەكس-چەمپيوندارى مەن اتالعان ليگادا باعىن سىناعان ساڭلاقتار دا سايىسقا تۇسەدى. ALASH PRIDE-108 ءتۋرنيرى ورتالىق ازياداعى جەتەكشى مما ليگالارىنداعى بەدەلدى دودا سانالادى. سەبەبى مەرەيتويلىق تۋرنيرگە ەلىمىزدىڭ ۇزدىك سپورتشىلارىمەن قاتار الەمدىك مما جۇلدىزدارى, ونىڭ ىشىندە – UFC-ءدىڭ ەكس- چەمپيوندارى, ارداگەرلەر سپورتشىلار استاناعا كەلەدى. ولاردىڭ اراسىندا جەڭىل سالماقتا وسى ليگانىڭ ۇزدىگى اتانىپ, چەمپيوندىق بەلبەۋ يەلەنگەن الدجامەين ستەرلينگ سىندى ايگىلى سپورتشىلار بار.
جەرلەستەرىمىزگە قارسى ايقاسقا تۇسەتىن قارسىلاستاردىڭ بارلىعى دەرلىك وسى UFC ليگاسىندا سىنعا ءتۇسىپ, كەيبىرى ءتىپتى چەمپيوندىق بەلبەۋدى دە يەلەنگەن. اتاپ ايتقاندا دامير يسماعۇلوۆ برازيليالىق الان پاتريككە قارسى ايقاسادى. جانكۇيەرلەرىنىڭ نازارىنا تۇسپەي جۇرگەن قايرات احمەتوۆ تە وكتاگونعا ورالىپ, كەزىندە UFC چەمپيونى اتانعان امەريكالىق الدجامەين ستەرلينگكە قارسى كۇشىن سىنايتىنى ايتىلعان ەدى. الايدا سايىستىڭ قارساڭىندا قارسىلاسى كەلمەۋىنە بايلانىستى احمەتوۆ مما-دان ەمەس, گرەپپلينگتەن سىنعا تۇسپەك. قارسىلاسى وڭايدان ەمەس: ەركىن كۇرەستەن بەيجىڭ وليمپياداسىنىڭ (2008) چەمپيونى, ارالاس جەكپە-جەكتەن UFC-ءدىڭ چەمپيونى اتانعان ايگىلى امەريكالىق سپورتشى گەنري سەحۋدو. ارمان وسپانوۆ تا گرەپپلينگتەن UFC-ءدىڭ ەكس-چەمپيونى برازيليالىق رەنان باراوعا قارسى ايقاسادى. جۋىردا قازاقستان ازاماتتىعىن العان رەسەيلىك ەتنيكالىق قازاق سالامات يسبۋلاەۆتىڭ دا قارسىلاسى تانىمال سپورتشى, ديلەنو لوپەس برازيليا سپورتشىسى, UFC-دە ونەر كورسەتكەن جامپوز. رۋسلان ساريەۆ تە برازيليالىق دەانرادو فيگەرەدومەن ايقاسادى. سانجار ءادىلوۆتىڭ دە قارسىلاسى برازيليانىڭ تاڭداۋلى سپورتشىسى, UFC-ءدىڭ كاردىندا شايقاسقان جامپوز. جانىبەك تىنىشتىق تا برازيليالىق راۋليان پايۆامەن ايقاسقا تۇسەدى. ەرحان جۇماباەۆ پەن برازيليالىق ۆيلينگتون لوبو جەكپە-جەگى دە تارتىسقا تولى بولماق. وزبەكستاندىق بوبۋر ابدۋلازيزوۆ برازيليالىق ۆاندەرسون پانتوحا سيلۆانىڭ قارىمىن بايقايدى. جەرلەسىمىز راسۋل حاتاەۆ برازيليا وكىلى فرانسيمار بارروزۋگە قارسىلاس اتاندى.
ALASH PRIDE نەگىزىن قالاۋشىسى دانيار قاسقاراۋوۆ تۋرنير تارتىسقا تولى وتەتىنىنە سەنىم ءبىلدىردى.
«2010 جىلى العاشقى تۋرنيرلەردى ۇيىمداستىرىپ سايىس وتكىزگەندە, ەشكىم ءبىزدىڭ پروموۋتەرلىك كومپانيا مۇنداي دەڭگەيگە كوتەرىلەتىنىنە سەنگەن جوق. ءبىزدىڭ كاسىپقوي سپورت الەمىندەگى باعىتىمىز دا, جوسپارىمىز دا ايقىن بولدى. قازاق جىگىتتەرىنىڭ الەۋەتىن, ولاردىڭ سپورتقا دەگەن قۇلشىنىسىن الەمگە پاش ەتە الدىق. بۇگىندە ALASH PRIDE – ەلىمىزدەن تىس جەرلەردە دە تانىمال حالىقارالىق برەند. ونىڭ ارتىندا ىنتىماعى ۇيىعان ۇجىم, تىنباي ەڭبەكتەنگەن كوماندا مەن قازاقستاندى الەمگە تانىتىپ جۇرگەن سپورتشىلار تۇر. ءبىزدىڭ قاتارىمىزدا العاش جەكپە-جەككە شىققان كوپتەگەن سپورتشىلار كەيىن الەمدىك ارەنالاردا ونەر كورسەتتى, سونىڭ ارقاسىندا قازاقستاندى مما الەمى دە ايقىن تانىپ, سپورتشىلارىمىزعا قۇرمەتپەن قارادى. استانا قالاسىندا وتەتىن ALASH PRIDE 108 ءتۋرنيرىنىڭ ەرەكشەلىگى مول. ءبىز UFC ليگاسىنىڭ داڭقتى جۇلدىزدارى مەن چەمپيوندارىن شاقىرىپ, كورەرمەنگە ناعىز مما مەرەكەسىن سىيلاعىمىز كەلەدى. بۇل تەك سپورتتىق سايىس قانا ەمەس – قازاق جاۋىنگەرىنىڭ رۋحى مەن مىنەزىن بۇكىل الەمگە تانىتاتىن مۇمكىندىك», دەدى د.قاسقاراۋوۆ.
سايىس الدىنداعى ءباسپاسوز ءماسليحاتىندا مما جاۋىنگەرلەرى وزدەرىنىڭ قارسىلاستارى جايىندا ءسوز قوزعادى. ارمان وسپانوۆ بىرنەشە جىل وكتاگونگا ورالماعانىن ايتتى. كەلەشەكتە جەكپە-جەك الەمىنە ورالاتىنىن جەتكىزدى.
