اتىراۋ وبلىسىنىڭ كاسىپكەرلەر پالاتاسىنا وبلىس اكىمدىگىنىڭ «اتىراۋ وبلىسى بويىنشا 2025 جىلعا ارنالعان اۋىلشارۋاشىلىق مال ازىعىنىڭ قۇنىن ارزانداتۋعا سۋبسيديالاۋ نورماتيۆتەرىن, سونداي-اق سۋبسيديا الۋ كريتەريلەرىن, ءوتىنىم نىسانى مەن وتىنىمدەردى قابىلداۋ مەرزىمدەرىن بەكىتۋ تۋرالى» قاۋلىسىنىڭ جوباسى ساراپتاما جاساۋعا تۇسكەن.
كاسىپكەرلەردىڭ قۇقىقتارىن قورعاۋ جونىندەگى ۋاكىلدىڭ اتىراۋ وبلىسى سەكتور مەڭگەرۋشىسى, وبلىستىق كاسىپكەرلەر پالاتاسى ديرەكتورىنىڭ ورىنباسارى سارسەنباي جولدىباەۆتىڭ ايتۋىنشا, پالاتا ساراپشىلارى شارۋالارعا تولەنۋگە ءتيىس سۋبسيديالار مولشەرى مەن تالاپ ەتىلەتىن نورماتيۆتەر اراسىنداعى سايكەسسىزدىكتى انىقتاعان.
«جەمشوپتى سۋبسيديالاۋ نورماتيۆتەرىن قالىپتاستىرۋ ءتارتىبى اۋىل شارۋاشىلىعى مينيسترلىگىنىڭ 2019 جىلعى 15 ناۋرىزداعى №108 بۇيرىعى نەگىزىندە جۇزەگە اسىرىلۋى ءتيىس. وسى بۇيرىقتىڭ 10-تارماعىنا سايكەس ستاندارتتار اۋىل شارۋاشىلىعى سالاسىنداعى مامانداندىرىلعان عىلىمي مەكەمەنىڭ ۇسىنىسى نەگىزىندە جەرگىلىكتى اتقارۋشى ورگانداردىڭ قاۋلىسىمەن بەكىتىلەدى. تالداۋ كورسەتكەندەي, وبلىستىق اۋىل شارۋاشىلىعى جانە جەر قاتىناستارى باسقارماسى عىلىمي مەكەمەلەردىڭ جەمنىڭ نارىقتىق باعاسىنىڭ وسۋىنە بايلانىستى قوسىمشا زەرتتەۋلەر جۇرگىزۋى قاجەتتىگى تۋرالى ۇسىنىستارىنا قاراماستان, ءىرى قارانىڭ بىرەۋىنە 270 مىڭ تەڭگە سۋبسيديا بولەتىن جوبانى بەكىتۋگە ۇسىنىپ وتىر. بۇل ستاندارت قازىرگى نارىقتىق جاعدايعا سايكەس كەلمەيدى. ءتىپتى 2021 جىلعى ستاندارتتان دا تومەن. مۇنداي ستاندارت اۋىل شارۋاشىلىعىمەن اينالىساتىن كاسىپكەرلەرگە ەكونوميكالىق تۇرعىدان ءتيىمسىز, ءارى سالانىڭ دامۋىنا كەرى اسەرىن تيگىزەدى», دەيدى س.جولدىباەۆ.
جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىنىڭ وكىلى ايگۇل قازامباەۆانىڭ ايتۋىنشا, اتىراۋ وبلىستىق اۋىل شارۋاشىلىعى جانە جەر قاتىناستارى باسقارماسىنىڭ ماماندارى بىلتىر بايلانىسقا شىققان. بەلگىلى ءبىر ايماق ءۇشىن ستاندارتتاردى دايىنداۋعا قوسىمشا زەرتتەۋ جۇمىستارى قاجەت. ء«بىز جالپى ستاندارتتاردى ۇسىندىق. بيىل مەملەكەتتىك ورگاننان بايلانىس تا, سۇرانىس تا بولعان جوق», دەدى ا.قازامباەۆا.
اۋىل شارۋاشىلىعى جانە جەر قاتىناستارى باسقارماسىنىڭ باس مامانى جاسۇلان سۇلتانعاليەۆتىڭ دەرەگىنە سۇيەنسەك, 2020 جىلدان بەرى جەمشوپكە بولىنەتىن سۋبسيديا كولەمى ەكى ەسەگە وسكەن. ماسەلەن, 2020 جىلى سۋبسيديا كولەمى ءىرى قارانىڭ ءبىر باسىنا 120 مىڭ تەڭگەنى قۇرادى.
«اۋىل شارۋاشىلىعى مينيسترلىگىنىڭ بۇيرىعىنا 2021 جىلى وزگەرتۋلەر ەنگىزىلدى. وسىعان بايلانىستى س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ زەرتتەۋ ەسەبىنە سۇيەنىپ, قاۋلىمەن 240 مىڭ تەڭگە كولەمىندە سۋبسيديا بەلگىلەندى. وسى سۋبسيديا ءتۇرىن ءبىزدىڭ وبلىستا تەك «پەرۆومايسكي» عانا الىپ وتىر. بىلتىر بۇيرىققا تاعى دا وزگەرتۋلەر ەنگىزىلدى. سوندىقتان س.سەيفۋللين اتىنداعى ۋنيۆەرسيتەتكە قايتادان سۇرانىس جىبەردىك. ولار ءوز جاۋابىندا عىلىمي زەرتتەۋ جۇمىستارىن جۇرگىزۋ قاجەتتىگىن, بىراق سۋبسيديا الۋشىلاردىڭ شاعىمدارى بولماعان جاعدايدا قاۋلىنى بەكىتۋگە بولاتىنىن اتاپ كورسەتتى. سول سەبەپتەن, ءبىز بۇل ستاندارتتى 2025 جىلعا دەيىن بەكىتتىك», دەپ ءمالىم ەتتى ج.سۇلتانعاليەۆ.
الايدا, اتىراۋ وبلىسى كاسىپكەرلەرى پالاتاسىنىڭ وكىلدەرى وبلىستىق اۋىل شارۋاشىلىعى جانە جەر قاتىناستارى باسقارماسىنىڭ بۇل ۇستانىمىمەن كەلىسپەي وتىر. پالاتا وكىلدەرىنىڭ پىكىرىنشە, سۋبسيديا مولشەرىن بەكىتۋ كەزىندە بىرنەشە جايتقا نازار اۋدارىلۋعا ءتيىس. بىرىنشىدەن, نارىقتاعى جاعداي ەسكەرىلىپ, سۋبسيديا مولشەرىن انىقتايتىن ستاندارت ناقتى ەسەپتەلۋى قاجەت. ەكىنشىدەن, سۋبسيديا مولشەرى جىل سايىن وزگەرتىلگەنى ءجون. ەڭ باستىسى, مەملەكەت تاراپىنان بەرىلەتىن سۋبسيديا تولىعىمەن تولەنۋى كەرەك.
اتىراۋ وبلىسى
