بۇقالار ءتۇستى اجىراتا الا ما؟ جوق. زەرتتەۋلەرگە سۇيەنسەك, بۇقالار قىزىل ءتۇستى باسقا رەڭكتەردەن, مىسالى, كوك نە جاسىلدان اجىراتا المايدى. دەمەك, ولار قىزىل تۇسكە ەشقانداي رەاكتسيا تانىتپايدى.
وسى ورايدا «ولاي بولسا بۇقانى نە اشۋلاندىرادى؟» دەگەن زاڭدى سۇراق تۋىندايدى. شىندىعىندا, بۇقا قىزىل ماتاعا ەمەس, قوزعالىسقا شابۋىلدايدى. ماتادور مۋلەتانى (قىزىل ماتانى) بۇلعاپ, بەلگىلى ءبىر باعىتتا قوزعالتىپ, بۇقانىڭ نازارىن سوعان اۋدارادى. سول ساتتە جانۋار قوزعالىپ تۇرعان نارسەگە نازار سالادى ءارى قورعانۋ نەمەسە شابۋىلداۋ ينستينكتى ىسكە قوسىلادى. بۇل – مىنەز-ق ۇلىق بيولوگياسىندا ءجيى كەزدەسەتىن رەاكتسيا.
ەندى كوكەيىڭىزدە «وندا نەلىكتەن ءدال قىزىل ءتۇس تاڭدالادى؟» دەگەن سۇراق تۋىنداۋى مۇمكىن. ايتايىق. قىزىل ماتا – تەك ءداستۇر مەن كوركەمدىك شەشىم ءۇشىن تاڭدالعان. بۇقانىڭ دەنەسىنەن جاراقات العان سوڭ اعىپ جاتقان قان كورەرمەنگە تىم ايقىن كورىنبەۋى ءۇشىن قىزىل ءتۇس قولدانىلعان. ياعني, بۇل – كورىنىستىڭ ۆيزۋالدى اسەرىن جۇمسارتۋ ءتاسىلى. قان مۋلەتاعا جۇقسا دا, ول كورىنبەيدى, سول ارقىلى شوۋ جالعاسادى, ال كورەرمەن ەموتسيالىق تۇرعىدا از سوققى الادى. سونىمەن قاتار, قىزىل ءتۇس ادامنىڭ نازارىن ەرىكسىز اۋداراتىن رەڭك بولعاندىقتان, كورەرمەن نازارى دا ماتادور مەن مۋلەتاعا اۋادى. دەمەك, ءتۇس جانۋار ءۇشىن ەمەس, ادام ءۇشىن ماڭىزدى.
