فوتو: اشىق دەرەككوز
كوفە — تابيعي ستيمۋلياتور. ونىڭ قۇرامىنداعى كوفەين ميداعى ادەنوزين دەپ اتالاتىن, ۇيقىعا جاۋاپتى مولەكۋلالاردى ۋاقىتشا بوگەيدى. سونىڭ ارقاسىندا ءبىز سەرگەك جۇرەمىز. بىراق بۇل — تەك ۋاقىتشا اسەر. ادەنوزين اعزاعا جينالا بەردى. كوفەين ديۋرەتيك رەتىندە اسەر ەتەدى جانە كەيدە ىشەك قىزمەتىن جەدەلدەتەدى. ول جۇرەك سوعۋ جيىلىگىن ارتتىرىپ, دەنە تەمپەراتۋراسىن كوتەرۋى مۇمكىن. شىعارۋ جۇيەسىنىڭ بەلسەندىلىگىنىڭ ارتۋى كەي جاعدايلاردا دەگيدراتاتسياعا اكەلەدى. ەگەر ادام سۋ ءىشۋدى ۇمىتسا, كوفەين شولدەۋ سەزىمىن تومەندەتىپ قانا قويماي, ورگانيزمدەگى سۇيىقتىقتى تەز جۇمسايدى. بۇل جاعداي سۋسىزدانۋ, لەتارگيا مەن شارشاۋدىڭ نەگىزگى سەبەپتەرىنىڭ ءبىرى.كوفەيننىڭ اسەرى باسىلعان كەزدە, ول قايتا «شابۋىلداپ», ءسىزدى بۇرىنعىدان دا قاتتى شارشاتۋى مۇمكىن.
ياعني, كوفە شارشاۋدى جويمايدى, تەك كەيىنگە شەگەرەدى. سونىڭ سالدارىنان كەشكە قاراي السىزدىك باسىپ, كۇنى بويى ءبىر-ەكى شىنى كوفە ىشسەڭىز دە, سەرگەك بولۋدىڭ ورنىنا كەرىسىنشە — مازاسىزدانىپ, كۇيزەلىسكە ءتۇسىپ, اشۋلانشاق بولىپ كەتۋىڭىز مۇمكىن.
كوفە نەگە كەي ادامداردى شارشاتادى؟
1. ۇيقىنىڭ ورنىنا كوفە ءىشۋ
ۇيقىڭىزدى تولىق قاندى الا الماساڭىز, كوفە ءىشىپ العانمەن ول سىزگە دەمالىس سىيلامايدى. ۇيقى تاپشىلىعى جيناقتالىپ, كوفە ونى تەك جاسىرادى
2. كوفەگە تاۋەلدىلىك
اعزا كۇن سايىن كوفەينگە ۇيرەنىپ كەتەدى. ونىڭ اسەرى ازايا بەرەدى. بۇرىن ءبىر شىنى جەتكىلىكتى بولسا, كەيىن ەكى-ءۇش شىنىدان دا پايدا كورمەۋىڭىز مۇمكىن. ال تاۋەلدىلىك ارتا تۇسەدى.
3. قانت پەن ءسۇت قوسىلعان كوفە
قانت پەن ءتاتتى ءسۇتتىڭ اسەرىنەن ەنەرگيا كۇرت كوتەرىلەدى دە, ارتىنان تەز تومەندەيدى. بۇل — شارشاۋ مەن اشۋشاڭدىققا سەبەپ بولادى.
4. كەشكى ۋاقىتتا كوفە ءىشۋ
كوفەين اعزادا 6-8 ساعات ساقتالادى. ەگەر ءسىز تۇستەن كەيىن نەمەسە كەشكە كوفە ىشسەڭىز, ۇيقىڭىز بۇزىلادى. ال ۇيقى بۇزىلسا — ەرتەڭگى كۇنى دە شارشاپ تۇراسىز.
كوفە ورنىنا نە ىستەۋگە بولادى؟
· سۋدى كوبىرەك ءىشىڭىز — كەيدە شارشاۋ تەك سۋسىزدانۋدىڭ سالدارى بولۋى مۇمكىن.
· تازا اۋادا ءجۇرىڭىز — ميعا وتتەگى بارعان سايىن سەرگەك بولاسىز.
· ازداعان جاتتىعۋ جاساڭىز — 2 مينۋتتىق دەنە قيمىلىنىڭ ءوزى كوفەدەن ارتىق اسەر بەرەدى.
· ۇيقى رەجيمىن رەتتەڭىز — ەڭ ءتيىمدى ەنەرگيا كوزى — ساپالى ۇيقى.
كوفە — دوس پا, جاۋ ما؟ بۇل سۇراقتىڭ جاۋابى ءسىزدىڭ وعان قانشالىقتى تاۋەلدى ەكەنىڭىزگە بايلانىستى. ەگەر ءسىز كوفەنى تەك ءلاززات ءۇشىن ىشسەڭىز — بۇل ءبىر بولەك. ال ەگەر كوفەمەن عانا كۇن كورىپ جۇرگەن بولساڭىز — شارشاۋدىڭ سەبەبىن باسقا جاقتان ىزدەۋ كەرەك.
مۇمكىن, ءسىزدى كوفە ەمەس, دۇرىس دەمالىس پەن ءومىر ىرعاعىن تابۋ عانا وياتا الادى.
جانەل تولەۋبەكوۆا, ەۇۋ 2 كۋرس ستۋدەنتى
